ބީއެމްއެލްގެ ދައުރު ފުޅާކުރުމަށް އަބަދުވެސް ވާގިވެރިވާނެ: ސަރުކާރު

ރާއްޖޭގެ ތަރައްގީއަށާއި ދިވެހިންގެ ފުދުންތެރިކަން އިތުރުކޮށްދީ، މާލީ މުއާމަލާތްތައް ފަސޭހަކޮށްދިނުމުގައި ބޭންކް އޮފް މޯލްޑިވްސް (ބީއެމްއެލް) ގެ ދައުރު ފުޅާކުރުމަށް ސަރުކާރުން އަބަދުވެސް ވާގިވެރިވަމުން ދާނެ ކަމުގެ ޔަގީންކަން ދޭ ކަމަށް ރައީސް އޮފީހުން މިރޭ ބުނެފި އެވެ.

އެ އޮފީހުން އެހެން ބުނީ، ރާއްޖެ އިން ބޭރުގައި ކިޔަވާ ދަރިވަރުންނަށް ބީއެމްއެލް އިން ދޫކުރާ ޑޮލަރުގެ ލިމިޓް 1،200 ޑޮލަރަށް ބޮޑުކުރަން އެ ބޭންކުގެ ބޯޑުން މިއަދު ނިންމުމާ އެކު، އެކަމަށް މަރުހަބާ ކިޔައި ސަރުކާރުން ނެރުނު ބަޔާނެއްގަ އެވެ.

ރާއްޖެ އިން ބޭރުގައި ކިޔަވާ ދަރިވަރުންގެ ޑޮލަރު ލިމިޓު ބޮޑުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.

ރާއްޖެ އިން ބޭރުގައި ކިޔަވާ ދިވެހި ދަރިވަރުންނަށް މަހަކު 1،200 އާ ހަމައަށް ޑޮލަރުގެ މުއާމަލާތްތައް ހިންގޭނެ ގޮތަށް އަމަލުކުރަން ފަށާނީ އަންނަ މަހުގެ ފުރަތަމަ ދުވަހުން ފެށިގެންނެވެ.

ރައީސް މުއިއްޒުގެ ވައުދު ބީއެމްއެލް އިން ފުއްދިކަން ފާހަގަކޮށް، ނެރުނު ބަޔާނުގައި ސަރުކާރުން ބުނީ، ދިވެހިންގެ ލާބަޔާއި މަންފާއަށްޓަކައި އަދި ދިވެހިންނަށް ދަތިވާ ކަންކަން ހައްލު ކުރުމަށް ރައީސް ކަނޑައަޅުއްވާ ސިޔާސަތުތައް ތަންފީޒު ކުރުމަށް އެ ބޭންކުން ދޭ އެއްބާރުލުމަށް ދިވެހި ސަރުކާރުން ޝުކުރު އަދާކުރާ ކަމަށެވެ.

ސަރުކާރުން ބުނީ، މިދިޔަ އަހަރުގެ ޑިސެމްބަރު 24 ގައި ކެބިނެޓުގެ ލަފާގެ މަތިން ރައީސް މުއިއްޒު ނިންމަވާފައިވާ ނިންމެވުން ތަންފީޒު ކުރަން ފެށުމުގެ ފުރަތަމަ ކަމެއްގެ ގޮތުން ބޭރު ގައުމުތަކުގައި ކިޔަވާ ދަރިވަރުންނަށް ބީއެމްއެލް ރުފިޔާ ޑެބިޓް ކާޑުތަކުން ޑޮލަރު ލިބޭ އަދަދު 1،200 ޑޮލަރަށް އިތުރު ކޮށްދިނުމަށް ނިންމުމަކީ އެ ދަރިވަރުންނާއި އާއިލާތަކަށް ލިބޭ ވަރަށް ބޮޑު ފަސޭހައަކަށް ވާނެ ކަމަށެވެ.

"...އަދި ދައުލަތުގެ ހަރަދުތައް ކުޑަކޮށް، ދަރަނި ކުޑަކޮށް، ދައުލަތަށް ލިބޭ އާމުދަނީގެ މަންފާ ރައްޔިތުންނަށް އިތުރުވަމުން ދާނެ ތިޔާގި ދުވަސްތަކެއް ގައުމަށް ހޯދައިދިނުމަށް ސަރުކާރުން އަޅަން ފަށާފައިވާ އިސްލާހީ ފިޔަވަޅުތައް ހަރުދަނާކަންމަތީ ދެމެހެއްޓުމަށް ސަރުކާރުން އަބަދުވެސް އިސްކަން ދެމުން ގެންދާނަމެވެ،" ބަޔާނުގައި ވެ އެވެ.

ބީއެމްއެލްގެ ތާރީހުގައި ފުރަތަމަ ފަހަރަށް މި މަހު ވަނީ އެ ބޭންކުގެ ސީއީއޯ ކަމަށް ދިވެއްސަކު ހަމަޖައްސައިފަ އެވެ. އެއީ ބީއެމްއެލްގެ ޑެޕިއުޓީ ސީއީއޯކަން ކުރެއްވި އަދި މާލީ ދާއިރާގައި 25 އަހަރު ހޭދަކުރައްވާފައިވާ މުހައްމަދު ޝަރީފެވެ. އަދި އެ ބޭންކުގެ ޗެއާމަންގެ މަގާމަށް ރައީސް އޮފީހުގެ ކެބިނެޓް ސެކްރެޓަރީ އަހުމަދު އަލީ ހަބީބު ވަނީ މިދިޔަ މަހު އައްޔަންކޮށްފަ އެވެ.