މަޝްވަރާނުކޮށް ވޯޓުލާ ގަޑި އިތުރުކުރީ ނުފޫޒު ފޯރުވަން: ޕީޕީއެމް

ގުރައިދޫ ދާއިރާގެ ވޯޓުލުމުގެ ވަގުތު އިލެކްޝަންސް ކޮމިޝަނުން އެއްވެސް ޕާޓީއަކާ މަޝްވަރާ ކުރުމެއް ނެތި އިތުރު ކުރީ މި ސަރުކާރުން ބޭނުން ވެގެން އެ ވޯޓަށް ނުފޫޒު ފޯރުވަން ކަމަށް އިިދިކޮޅު ޕީޕީއެމުން ބުނެފި އެވެ،

އެކަން ކުށްވެރިކޮށް އެ ޕާޓީން ނެރުނު ނޫސްބަޔާނެއްގައި ބުނީ، މިއީ ސަރުކާރުން ބޭނުންވެގެން ވޯޓަށް ނުފޫޒު ފޯރުވުމުގެ ގޮތުން ހިންގާފައިވާ ކަމެއް ކަމަށެވެ. މިކަން ކުރީ، ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީ އަށް މިއަދުގެ ބައި އިލެކްޝަންގައި ނާކާމިޔާބީއާ ކުރިމަތިލާން ޖެހިދާނެތީ އެކަން ފޫބެއްދުމުގެ ގޮތުން ކަމަށް އެ ބަޔާނުގައި ބުންޏެވެ.

ޕީޕީއެމުން ބުނީ މިއީ ނުފޫޒު ފޯރުވަން ވެގެން ކުރި ކަމެއް ކަން އެނގެނީ، ވިލިމާލެ ދާއިރާގެ ބައި އިލެކްޝަން ބޭއްވިއިރު، ކަނޑުގަދަވެ، ވިއްސާރަވެގެން ވަގުތު އިތުރުކޮށްދިނުމަށް އީސީގައި އެ ޕާޓީން އެދުމުން އެއީ ގެންގުޅޭ ސިޔާސަތެއް ނޫން ކަމަށް ބުނެ އެ ފަހަރު ވަގުތު އިތުރު ނުކޮށްދިނުން ކަމަށެވެ.

ޕީއެންސީގެ ރައީސް އަބްދުލްރަހީމް އަބްދުﷲ (އަދުރޭ) ކުރެއްވި ޓުވީޓެއްގައި ވިދާޅުވީ ވޯޓުގެ ވަގުތު އިތުރުކުރީ މި ބައި އިލެކްޝަންގައި ވާދަކުރާ އެއްވެސް ޕާޓީއަކާ އީސީން މަޝްވަރާކުރުމެއް ނެތި ކަމަށެވެ. އަދި އެކަން ކުރީ ސަރުކާރުން، އީސީގެ ރައީސް ފުވާދު ތައުފީގަށް ނުފޫޒު ފޯރުވައިގެން ކަމަށް ވެސް އަދުރޭ ތުހުމަތުކުރެއްވި އެވެ.

"... ވޯޓުލުމުގެ ވަގުތު އިތުރުކުރީ ސަރުކާރުން އިލެކްޝަންސް ކޮމިޝަނުންގެ ރައީސް ފުވާދު ތައުފީގަށް ނުފޫޒު ފޯރުވައިގެން ކަމަށް ފުވާދު އެއްބަސްވެއްޖެ. މީ އެމްޑީޕީގެ ހިސާބު ދިމާނުވެގެން ކުރި ކަމަކަށް ވަނީ،" އަދުރޭ ވިދާޅުވި އެވެ.

އީސީގެ ބަޔާނުގައި ބުނި ގޮތުގައި، ވޯޓުލުމުގެ ވަގުތު 17:00 އަށް އިތުރުކުރަން ޖެހުނީ ވާރޭ ވެހުމުގެ ސަބަބުން ވޯޓުލާ މަރުކަޒުތަކަށް ދާން މީހުންނަށް ދަތިވެގެންނެވެ. ނަމަވެސް، އިދިކޮޅުން ބުނަނީ އެއީ އީސީން ސަރުކާރަށް ވާގިވެރިވެގެން ދައްކާ ބަހާނައެކެވެ.

އެކަމާ ކަންބޮޑުވުން ފާޅުކުރައްވައި ވިލިމާލެ ދާއިރާގެ މެމްބަރު އަދި އެމްއެންޕީގެ މެމްބަރު އަހްމަދު އުޝާމް ވިދާޅުވީ އީސީން އިންތިހާބުތަކުގައި ވޯޓުލާ ވަގުތު އިތުރުކުރުމަކީ ކޮމިޝަންގެ މެމްބަރުން ބޭނުންވާއިރަށް ކުރެވޭ ކަމެއްގެ ބަދަލުގައި، އެކަން ކުރެވޭނެ ހާލަތްތައް ލިޔުމުން ފެންނަން އޮތުމަކީ މުހިންމު ކަމެއް ކަމަށެވެ.

"މިހާރު މިކަން ކުރުމުގައި އެއްވެސް ކޮންސިސްޓެންސީއެއް އޮންނަ ކަމަށް ނުފެނޭ،" އުޝާމް ވިދާޅުވި އެވެ.

އިންތިހާބުތަކުގެ ގާނޫނާއި ގަވާއިދުތަކުގައި ވެސް ވޯޓުލާ ވަގުތު އިތުރުކުރެވޭނެ ހާލަތްތައް ބަޔާންކޮށްފައެއް ނޯވެ އެވެ. މިހާރު އަމަލުކުރަމުން އަންނަ އުސޫލަކީ އީސީން ބޭނުންވެއްޖެ ނަމަ ވަގުތު އިތުރުކުރަނީ އެވެ.

ގުރައިދޫ ދާއިރާގެ ބައި އިލެކްޝަންގައި ތިން ޕާޓީއަކުން ވާދަކުރެ އެވެ. އެއީ ޕީޕީއެމްގެ ޓިކެޓުގައި ހުސެއިން ރިޒާ އާއި އެމްޑީޕީން އިބްރާހިމް ޝާޒް އަދި އެމްއެންޕީން އަލީ އަރީފެވެ.