"ހަސަން ކުރުސީ" އަކީ ކާކުތޯ ބަލަން ނަޝީދު ޕޮލިހަށް

"ހަސަން ކުރުސީ" ގެ ނަމުގައި ހިންގާ ޓްވިޓާ އެކައުންޓުގެ މައްސަލަ ބަލައިދިނުމަށް އެދި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފުލުހުންނަށް މައްސަލަ ހުށަހަޅުއްވައިފި އެވެ.

ނަޝީދު އިއްޔެ ފުލުހުންނަށް ފޮނުއްވި ސިޓީގައި ވިދާޅުވީ ހަސަން ކުރުސީގެ ނަމުގައި ހިންގާ ޓުވިޓާ އެކައުންޓަކީ އެމަނިކުފާނުގެ އެކައުންޓެއް ކަމަށް ބައެއް ފަރާތްތަކަށް ހީކުރެވި އެތައް އޮޅުންތަކެއް އަރާފައިވާ ކަމަށާއި އެކަމުގެ ސަބަބުން އެ މަނިކުފާނަށް އިންތިހާއަށް ގެއްލުން ލިބެމުންދާ ކަމަށެވެ.

އެހެންކަމުން އެ ޓްވިޓާ އެކައުންޓުގެ އަސްލު ހޯދައިދެއްވުމަށް ނަޝީދު ވަނީ އެދިވަޑައިގެންފަ އެވެ.

ހަސަން ކުރުސީގެ ނަމުގައި ހިންގާ ޓުވީޓާ އެކައުންޓުން އަންނަނީ ވަކިވަކި އެމްޑީޕީގެ މެންބަރުންނާއި ސަރުކާރުގެ އިސް މަގާމުތަކުގައި ތިއްބެވި ބޭފުޅުންނަށް އަމާޒުކޮށް ފާޑުކިޔައި ފުރައްސާރަކުރަމުންނެވެ. އަދި ނަޝީދުގެ "ފިކުރެއްގެ ދިރުން" ޕްރޮމޯޓުކޮށް އެ ފެކްޝަނާ ހިޔާލު ތަފާތު މީހުންނާ ދެކޮޅަށް ސޯޝަލް މީޑިއާގައި އެ އެކައުންޓުން އަޑުއުފުލަ އެވެ.

ހަސަން ކުރުސީގެ ޓުވީޓާ އެކައުންޓުގެ ފަހަތުގައި ހުންނެވީ ނަޝީދު ކަމަށް ވެސް އެމްޑީޕީގެ އިސް ބޭފުޅުންނާއި ބައެއް އެހެން މީހުން ވެސް ތުހުމަތު ކުރެ އެވެ. އަދި އެ އެކައުންޓަކީ ނަޝީދާއި އެމަނިކުފާނުގެ އަރިހުގައި އުޅުއްވާ ބައެއް އެހެން ބޭފުޅުން ވެސް ގެންގުޅޭ އެކައުންޓެއް ކަމަށް ވެސް ތުހުމަތު ކުރެ އެވެ.

ނަމަވެސް އެމްޑީޕީގެ ވަކިވަކި މެންބަރުންނަށް ވެސް އަމާޒުވާ ގޮތަށް އެ އެކައުންޓުން ކުރަމުން އަންނަ ޓުވީޓުތަކުގެ ސަބަބުން ނަޝީދަށް ގެއްލުންވާ ކަމަށް ވެސް ގިނަ ބަޔަކު ދެކެ އެވެ.