6 ދުވަހުގެ ރަސްމީ ދަތުރުފުޅަށްފަހު ސީޝެލްސްގެ ރައީސް ފުރާވަޑައިގެންފި

ސީޝެލްސްގެ ރައީސް ވޭވަލް ރާމްކަލާވަން ގެ ދެ ކަނބަލުން ރާއްޖެއަށް ކުރެއްވި ރަސްމީ ދަތުރުފުޅު ނިންމަވާލައްވައި، މިއަދު ފުރާވަޑައިގެންފި އެވެ.

ސޭޝެލްސްގެ ރައީސް ވޭވަލް ރާމްކަލާވަން އާއި އެމަނިކުފާނުގެ އަނބިކަނބަލުން ލިންޑާ ރަމްކަލަވަން ރާއްޖެއަށް ވަޑައިގެންނެވީ މިދިޔަ އާދީއްތަ ދުވަހު އެވެ.

ރައީސް ވޭވަލް ރާމްކަލާވަން ހަ ދުވަހަށް ކުރެއްވި މި ދަތުރުފުޅުގައި ރައީސް އިބްރާހިމް މުހައްމަދު ސޯލިހާ ބައްދަލުކުރައްވައި ދެ ގައުމުގެ ދެމެދު އެކި ދާއިރާތަކުން އެއްބާރުލުން ދިނުމުގެ ހަތަރު އެއްބަސްވުމެއް ވަނީ ބަދަލުކުރައްވައިފަ އެވެ.

އޭގެ ތެރޭގައި އެއާ ސާވިސް އެގްރިމެންޓެއް ހިމެނޭއިރު، އެ އެއްބަސްވުމުގެ ދަށުން ރާއްޖެ އާއި ސީޝެލްސްއާ ދެމެދު ވައިގެ މަގުން ސީދާ ދަތުރުތައް ފަށާނެ ކަމަށް ސަރުކާރުނަ ވަނީ ބުނެފަ އެވެ.

ސީދާ ދަތުރުތައް ފެށުމުގެ އިތުރުން، ކުރިން ވިސާ ނެގުމަކާ ނުލައި ދިވެހިންނަށް 30 ދުވަހަށް ސީޝެލްސް އަށް ދަތުކުރެވޭނެ ގޮތް ވެސް ވަނީ، އެ ގައުމުގެ ރައީސްގެ ރަސްމީ ދަތުރުފުޅުގައި ހަމަޖައްސަވައިފަ އެވެ.

ގިނަ ގައުމުތައް މެދުވެރިކޮށް، ރޭވިގެން ހިންގާ ކުށްތައް ހުއްޓުވުމާއި ކަނޑުމަގުން ކުރިމަތިވާ އެހެނިހެން ނުރައްކާތަކާ ގުޅޭގޮތުން ވެސް ރާއްޖެ އާއި ސީޝެލްސް ސަރުކާރާ ދެމެދު އެކުލަވާލާފައިވާ ޕްރޮޓޮކޯލެއްގައި ސޮއިކޮށްފައި ވެ އެވެ.

އެންމެ ފަހު އެއްބަސްވުމަކަށް ސޮއިކޮށްފައި ވަނީ ދެ ގައުމުގެ ޒުވާނުންގެ ތަރައްގީއަށާއި ހުނަރުވެރިކަން އިތުރުކުރުމަށެވެ.

މި ފުރަމާނަ ދަރުފުޅުގެ ނިމުން ފާހަގަކޮށް ދެ ގައުމު ގުޅިގެން، ޖޮއިންޓް ކޮމިއުނިކޭއެއް ނެރެފައިވާއިރު ދެ ގައުމުގެ އެކުވެރިކަމުގެ ގުޅުން އެގޮތުގައި ކުރިއަށް ގެންދިއުމާއި ދެ ގައުމަށްވެސް ފައިދާހުރި ދާއިރާތަކުގައި ގުޅިގެން މަސައްކަތްކުރަމުން ގެންދާނެކަން ފާހަގަކޮށްފައި ވެ އެވެ.