ހާރިޖީ ސިޔާސަތު ބައްޓަންކުރީ ރާއްޖޭގެ އެންމެ މަތީ މަސްލަހަތު ރައްކާތެރިކުރުމަށް: ރައީސް

ނިމިގެން މިދާ ވެރިކަމުގެ ފަސް އަހަރު ހާރިޖީ ސިޔާސަތު ބިނާކޮށްފައިވާނީ ރާއްޖޭގެ އެންމެ މަސްލަހަތު ހިމާޔަތްކޮށް ރައްކާތެރިކުރުމުގެ މައްޗަށް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރާއްޖޭގެ ހާރިޖީ ދާއިރާގައި ދިގު މުއްދަތެއް ވަންދެން ހިދުމަތް ކުރެއްވުމަށް ފަހު ވަކިވެވަޑައިގަންނަވާ ދެ ބޭފުޅަކަށް ހާރިޖީ ހިދުމަތުގެ އެންމެ މަތިވެރި ޝަރަފު އެރުވުމަށް މިއަދު ބޭއްވި ރަސްމިއްޔާތުގައި ރައީސް ވިދާޅުވީ، ވެރިކަމަށް ވަޑައިގެންނެވިއިރު ރާއްޖެ އޮތީ ހާރިޖީ މައިދާނުގައި ވަރަށް ބޮޑަށް ބާކީވެފައި ކަމަށެވެ.

"ބައިނަލްއަގްވާމީ ޖަމިއްޔާ ޖަމާއަތްތަކާ ދެމެދު އޮންނަ ގުޅުން އޮތީ ވަރަށް ބޮޑަށް ހީނަރުވެފައި. ބައެއް އިސްލާމީ ގައުމުތަކާ ރާއްޖެއާ ދެމެދު އޮތީ ގުޅުން ކެނޑިފައި. އެއީ ދިވެހިންނަށް ލިބުނު ވަރަށް ބޮޑު ދެރައެއް އަދި ނިކަމެތިކަމެއް،" ރައީސް ވިދާޅުވި އެވެ.

ރައީސް ވިދާޅުވީ ދޭދޭ ގައުމުތަކާއި ޖަމިއްޔާތަކާ އެކު އޮތް ގުޅުން ގާއިމްކޮށް އިތުބާރާއި ޔަގީންކަން ހޯދުމަށް މި ސަރުކާރުން ގިނަ މަސައްކަތްތަކެއް ކުރަން ޖެހުނު ކަމަށެވެ. އެކަމުގައި ފޮރިން މިނިސްޓަރު އަބްދުﷲ ޝާހިދާއި ފޮރިން ސާވިސްގެ ހުރިހާ މުވައްޒަފުން އަދާކުރި ދައުރު ފާހަގަކުރައްވައި ރައީސް ވަނީ ޝުކުރު އަދާކުރައްވައިފަ އެވެ.

ހާރިޖީ ދާއިރާ ވަރުގަދަ ކުރުމަށް މި ސަރުކާރުން ގެންގުޅުނު ތަސައްވުރުގެ ތެރެއިން 2022 ވަނަ އަހަރު ތައާރަފްކުރި ފޮރިން ސާވިސްގެ ހިދުމަތް ރައީސް ފާހަގަކުރެއްވި އެވެ. ރައީސް ވިދާޅުވި ގޮތުގައި، ހާރިޖީ މުވައްޒަފުންނަކީ ސިވިލް ސާވިސްގައި ނުހިމެނޭ ވަކި ބައެއްގެ ގޮތުގައި ކަނޑައަޅައި ދިން ބާރުތަކުގެ ސަބަބުން އެދެވޭ ހެޔޮ ބަދަލެއް އައެވެ.

"މި މުހިންމު ބަދަލު ގެނައީ އެއިރެއްގައި އޮންނަ ސަރުކާރަކުން ހާރިޖީ ސިޔާސަތު ދަމަހައްޓައި ނެގެހެއްޓުމުގައި އެންމެ ފުރިހަމަ މާނައިގައި އެއިރެއްގައި ހުންނަވާ ރައީސުލްޖުމްހޫރިއްޔާއަށާއި ސަރުކާރަށް އެހީތެރިކަން ދިނުމަށް،" ރައީސް ވިދާޅުވި އެވެ.

ހާރިޖީ ދާއިރާގައި ދިގު މުއްދަތަކަށް ހިދުމަތް ކުރެއްވުމަށް ފަހު ވަކިވެވަޑައިގަންނަވާ ބޭފުޅުންނަށް އަލަށް އަރުވާ ޝަރަފު މިއަދު އެރުވީ ފޮރިން މިނިސްޓްރީގެ ސްޓޭޓްގެ މަގާމުގައި ހުންނެވި އަހުމަދު ހަލީލަށާއި ފޮރިން ސެކެރެޓަރީ އަހުމަދު ލަތީފަށެވެ.

ރައީސް ވަނީ ހާރިޖީ ދާއިރާއަށް މި ދެ ބޭފުޅުން ކޮށްދެއްވާފައިވާ ހިދުމަތްތައް ފާހަގަކުރައްވައި އެ ބޭފުޅުންނަށް ޝުކުރު އަދާކުރައްވައިފަ އެވެ.