ދެ މީހަކު މަރާލި ކަމުގެ ތުހުމަތުވާ އަހަނދުގެ މައްސަލަ އިސްތިއުނާފެއް ނުކުރާނެ

ނޫސްވެރިޔާ އަހުމަދު ރިލްވާން ގެއްލުވާލުމާއި ބްލޮގަރު ޔާމީން ރަޝީދުގެ މަރާ ގުޅިގެން ދައުލަތުން ދައުވާކުރާ ތިން މީހުންގެ ތެރޭގައި ހިމެނޭ އަހްމަދު އިސްމާއިލް (އަހަނދު) ބަންދުން ދޫކޮށްލި އަމުރު އިސްތިއުނާފު ނުކުރަން ޕްރޮސިކިއުޓާ ޖެނަރަލްގެ އޮފީހުން ނިންމައިފި އެވެ.

ރިލްވާނާއި ޔާމީންގެ މަރާ ގުޅިގެން، އަހުމަދު އިސްމާއިލްގެ މައްޗަށް ދައުލަތުން އުފުލާފައި ވަނީ ޓެރަރިޒަމްގެ އަމަލެއް ކުރަން ރޭވުމުގެ ދައުވާއަކާއި ޓެރަރިޒަމްގެ އަމަލެއް ކުރުމަށް އެހީތެރިވުމުގެ ދައުވާއެކެވެ. އެ ދެ ދައުވާއާ ގުޅޭ ޝަރީއަތް ކްރިމިނަލް ކޯޓުގައި ދަނީ ކުރިއަށެވެ.

ސިއްރުން ކުރިއަށް ގެންދާ މި ޝަރީއަތްތަކުގައި ކޯޓުން ވަނީ ޝަރުތުތަކަކާ އެކު އޭނާ ބަންދުން ދޫކޮށްލުމަށް އަމުރުކޮށްފަ އެވެ. މި އަމުރާ ގުޅިގެން ފާޑުކިޔުންތައް އަމާޒުވެފައިވަނިކޮށް ޕްރޮސިކިއުޓާ ޖެނަރަލްގެ އޮފީހުން ވަނީ މައްސަލަ އިސްތިއުނާފު ނުކުރަން ނިންމައިފަ އެވެ.

ޕްރޮސިކިއުޓާ ޖެނަރަލް އޮފީހުގެ މީޑިއާ އޮފިސަރު އަހުމަދު ޝަފީއު ވިދާޅުވީ އަހުމަދު އިސްމާއިލް ބަންދުން ދޫކޮށްލާފައިވަނީ ޓެގް އަޅުވައި، ޕާސްޕޯޓް ހިފަހައްޓައި އަދި ޒަރޫރީ ބޭނުމަކަށް ނޫން ގޮތަކަށް ގެއިން ބޭރަށް ނުނުކުމެވޭ ގޮތަށް ޝަރުތުކޮށްފައި ކަމުން، އެ އަމުރު އިސްތިއުނާފު ނުކުރަން ނިންމާފައިވާ ކަމަށެވެ.

އަހްމަދު އިސްމާއިލް ބަންދުން ދޫކޮށްލުމާ އެކު ކްރިމިނަލް ކޯޓުން ވަނީ މައްސަލާގައި ހިމެނޭ ހެކިންނަށް ޖިސްމާނީ ރައްކާތެރިކަންދޭން ވަކި އަމުރެއް ނެރެފައިކަން ވެސް ޝަފީއު ފާހަގަކުރެއްވި އެވެ.

ރިލްވާނާއި ޔާމީންގެ މައްސަލާގައި ބޮޑު ތުހުމަތެއް ކުރެވޭ އަހުމަދު އިސްމާއިލްގެ ފައިގައި މިހާރު ވަނީ ޓެގް އަޅުވާފަ އެވެ. މިއީ މިފަހުން ކުށުގެ ތުހުމަތުވާ މީހެއްގެ ފައިގައި ޓެގް އެޅުވި ފުރަތަމަ ފަހަރެވެ. ހޯމް މިނިސްޓަރު އިމްރާން އަބްދުﷲ ވިދާޅުވެފައިވާ ގޮތުގައި ޒަމާނީ ވަސީލަތްތަކާ އެކު ޓެގް އަޅުވަން އަލުން ފެށީ ޖަލުގައި ބަންދުކުރާ މީހުންގެ އަދަދު މަދުކުރުމަށެވެ.

ދައުލަތުން ބުނާ ގޮތުގައި އަހުމަދު އިސްމާއިލްއަކީ ރިލްވާން މަރާލުމުގެ ކަންކަން ރާވައި އިންތިޒާމު ކުރުމުގެ އިތުރުން، ޔާމީން މަރާލުމަށް އޭނާއަށް ފާރަލުމުގެ ކަންކަން އިންތިޒާމު ކުރި މީހެކެވެ. އަދި ޔާމީން އާއި ރިލްވާންއަށް ފާރަލައި އެ ދެ މީހުން މަރާލުމަށް އޭނާ އެހީތެރިވެދީފައިވާ ކަމަށް ދައުލަތުން ބުނެ އެވެ.

އޭނާގެ އިތުރުން ދައުލަތުން ވަނީ މި މައްސަލާގައި މ. ލެގޫންވިއު، އިސްމާއިލް އަބްދުއްރަހީމް (އިސޫ) އަދި ދަފްތަރު އާރްއެސް 8499، އަހްމަދު މުއާޒު (ގަޓު މުއާ)ގެ މައްޗަށް ވެސް ދައުވާ އުފުލައިފަ އެވެ. އެ ދެ މީހުން ވެސް ތިބީ ޝަރީއަތް ނިމެންދެން ބަންދުގަ އެވެ.