ރައީސްގެ ޓީމު ނުކުތީމާ ޑިމޮކްރެޓްސް އާއި ޕީޕީއެމަށް ހިފަހައްޓައެއް ނުލެވޭނެ: އިމްރާން

ރައީސް އަދި އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހުގެ ޓީމު މުޒާހަރާ އަށް ނުކުމެއްޖެ ނަމަ ޑިމޮކްރެޓްސް އާއި ޕީޕީއެމަށް ހިފަހައްޓައި ނުލެވޭނެ ކަމަށް އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ މިރޭ ވިދާޅުވެއްޖެ އެވެ.

އިމްރާން އެގޮތަށް ވިދާޅުވީ، ރައީސް މިހާރު މ. އަތޮޅަށް ކުރައްވާ ރިޔާސީ ކެމްޕެއިން ދަތުރުފުޅާ ދިމާކޮށް ބައެއް ރަށްރަށުގައި އިދިކޮޅު ފަރާތްތަކުން މުޒާހަރާކުރަމުން ދާތީ އެ ކަމަށް ރައްދު ދެއްވަމުންނެވެ.

މ. ދިއްގަރުގައި މިރޭ ބޭއްވި ކެމްޕެއިން ޖަލްސާގައި އިމްރާން ވިދާޅުވީ، ސިޔާސީ ހަރަކާތް ހިންގަން މިހާރު ރާއްޖެ އޮތީ ތަސައްރަފު ފުދި، ޑިމޮކްރަސީ އަށް ފައްކާވެފައި ކަމަށެވެ. މިއަދު ސިޔާސީ މަސައްކަތް ކުރަނީ ރައްޔިތުންނަށް ކޮށްދޭނެ ކަންކަން ބުނެދީ، އެކަން އަމަލީ ގޮތުން ސާބިތުކޮށްދީގެން ކަމަށް ވެސް އޭނާ ވިދާޅުވި އެވެ.

ނަމަވެސް އިދިކޮޅުގައި ތިބި ވާދަވެރިން މިހާރު ދައްކަނީ ރާއްޖޭގެ މިއަދުގެ ހާލަތާ އެއްގޮތަކަށް ވެސް މުނާސަބު މަންޒަރެއް ނޫން ކަމަށް މި ސަރުކާރު ހިންގާ ކޯލިޝަންގައި ހިމެނޭ އަދާލަތު ޕާޓީގެ ރައީސް އިމްރާން ވިދާޅުވި އެވެ. ރައްޔިތުންނަށް ކޮށްދޭނެ އެއްވެސް ކަމެއް އިދިކޮޅަށް ބުނެނުދެވޭ ކަމަށް އޭނާ ވިދާޅުވި އެވެ.

"އެކަން އެގޮތަށް ކުރަން ބޭނުން ނެތް ނަމަ ދެން ވެސް އެކަން ކުރަން ރައީސްއާ އެކު މާ ބޮޑު ޓީމެއް އެބައޮތް. އަޅުގަނޑުމެން މާ ބާރަށް މުޒާހަރާ ކުރާނަން އިނގޭތޯ. މާ އަޑުގަދަވާނެ، މާ މުޒާހަރާ ކުރާނެ،" އިމްރާން ވިދާޅުވި އެވެ.

"އެކަމަކު އަޅުގަނޑުމެން ދެން މި ތިބީ އެކަން އެގޮތަށް ކުރާކަށް ނޫން."

އިމްރާން ވިދާޅުވި ގޮތުގައި، އެއްވެސް އަމާޒެއް ނެތި އިދިކޮޅުން މިހާރު މަގުމަތީގައި ހިންގާ ހަރަކާތްތަކަކީ އެއްވެސް ފައިދާއެއް ނުކުރާ، ގެއްލުން ހުރި ކަންތައްތަކެކެވެ. ރައްޔިތުން އެކަމާ މެދު ވަރަށް ފުންކޮށް ވިސްނަން ޖެހޭ ކަމަށް އޭނާ ވިދާޅުވި އެވެ.

"...ޑިމޮކްރެޓްސް ބޭފުޅުން ކަމަށް ވިޔަސް، ޕީޕީއެމް ބޭފުޅުން ކަމަށް ވިޔަސް، އެ ނޫން ޕާޓީއެއްގެ ބޭފުޅުން ކަމަށް ވިޔަސް، އަޅުގަނޑުމެން ރަށްރަށަށް އަރާއިރުގައި ތި ސަކަރާތް ޖަހަން ދެން ނުހަދާ،" އިމްރާން ވިދާޅުވި އެވެ.

"ތި ސަކަރާތް ޖަހަން ހައްދަވައިފިއްޔާ، އަޅުގަނޑުމެން މާ ވަރުގަދަވާނެ. މާ ވަރުގަދަވާނެނޫންތޯ، މި ޓީމު ނުކުތީމަ ޕީޕީއެމް މީހުންނަށާއި ޑިމޮކްރެޓްސް މީހުންނަށް ހިފަހައްޓައެއް ނުލެވޭނެ އިނގޭތޯ."

އަދާލަތު ޕާޓީ އާއީ އެމްޑީއޭ އިން އަންނަނީ އަންނަ ސެޕްޓެމްބަރު މަހު 9 ގައި އޮންނަ ރިޔާސީ އިންތިހާބުގައި އެމްޑީޕީއާއެކު ކޯލިޝަން ހަދަން ނިންމައި ރައީސް އިބްރާހިމް މުހައްމަދު ސޯލިހަށް ކެމްޕެއިން ކުރަމުންނެވެ. ރައީސްގެ ކެމްޕެއިން ދަތުރުފުޅުތަކުގައި އެ ދެ ޕާޓީގެ އިސްވެރިން ވެސް އަންނަނީ ބައިވެރިވެވަޑައިގަންނަވަމުންނެވެ.