މެސީގެ ސޭންޑްވިޗެއް ހާޑްރޮކްގެ މެނޫއަށް

ހާޑްރޮކްގެ ގްލޯބަލް އެމްބެސަޑަރު ލިޔޮނަލް މެސީއާ ގުޅިގެން އެ ހޮޓެލްގެ މެނޫއަށް "ދަ މެސީ ޗިކަން ސޭންޑްވިޗް - މޭޑް ފޯ ޔޫ ބައި ލިއޯ މެސީ" ތައާރަފްކޮށްފި އެވެ.

މި ސޭންޑްވިޗަކީ މެސީ ކުޑައިރުގެ އެންމެ ފެވަރިޓް އާޖެންޓީނިއަން ޑިޝްއިން އިންސްޕަޔާވެ ތައްޔާރުކޮށްފައިވާ "މިލަނީޒް ސްޓައިލް" ޗިކަން ސޭންޑްވިޗެކެވެ. މި ސޭންޑްވިޗް ހާޑްރޮކްގެ ހުރިހާ ހޮޓެލްއަކަށް ވަނީ ނެރެފަ އެވެ. އެހެންވެ، މި ސޭންޑްވިޗް ކްރޮސްރޯޑްސްގައި ހުންނަ ހާޑްރޮކް ކެފޭއިން ވެސް މިހާރު ލިބޭނެ އެވެ.

ހާޑްރޮކްގެ މެނޫއަށް އިތުރުވި "ދަ މެސީ ސޭންޑްވިޗް" އާ ގުޅޭ ގޮތުން މެސީ ބުނީ ކުޑައިރުގެ ހަނދާންތައް އެކުލެވޭ ޑިޝްއަކުން އިންސްޕަޔާވެ، އަމިއްލަ ސޭންޑްވިޗެއް ތައްޔާރުކޮށް އޭނާގެ ގައުމުގެ ރަހަތަށް ދުނިޔޭގެ އެކި ހިސާބުތަކަށް ފޯރުކޮށްދޭން ލިބުމުން ވަރަށް އުފާވާ ކަމަށެވެ.

ހާޑްރޮކް ހޮޓެލް މޯލްޑިވްސްގެ މެނޭޖިން ޑިރެކްޓަރު ޓޮލްގާ އުނާން ވިދާޅުވީ ރާއްޖޭގައި ތިބި މެސީގެ ފޭނުންނަށް މެސީގެ މި ފަދަ އުފެއްދުމެއް ތަޖުރިބާކޮށްލަން ފުރުސަތު ހޯދާދެވުމަކީ ލިބޭ އުފަލެއް ކަމަށެވެ.

"މެސީ ސޭންޑްވިޗް" ރާއްޖޭގައި ހުންނަ ހާޑްރޮކް ކެފޭއަށް ތައާރަފްކުރީ ހާއްސަ އިވެންޓަކާ އެކު އެވެ. އެ އިވެންޓުގައި މެސީގެ މާޗް ހިމެނޭ ފެޝަން ޝޯއަކާއި މަޖާ ގޭމުތަކުގެ އިތުރުން ކެފޭގެ ކިޗަން މެނޭޖަރުގެ ހުނަރު ވަނީ ދައްކާލައިފަ އެވެ.

އަލަށް ތައާރަފް ކުރި ސޭންޑްވިޗް ޕްރޮމޯޓުކުރުމުގެ ގޮތުން ހާޑްރޮކް އިންޓަނޭޝަނަލްއިން މެސީ ހިމަނައިގެން އިސްތިހާރެއް ވެސް ވަނީ ތައްޔާރުކޮށްފަ އެވެ. މި އިސްތިހާރު ދުނިޔޭގެ އެކި ހިސާބުތަކުގައި ވަނީ ލޯންޗުކޮށްފަ އެވެ.

ކިއުއާރު ކޯޑެއް ސްކޭން ކޮށްގެން އޭއާރް މެދުވެރިކޮށް މެސީއާ އެކު މި ސޭންޑްވިޗްގެ ރަހަ ބެލޭނެ ގޮތް ވެސް ހާޑްރޮކް އިންޓަނޭޝަނަލުން ވަނީ ހަދައިފަ އެވެ. އެ ކޯޑު ސްކޭން ކޮށްގެން މެސީގެ ހާއްސަ މެސެޖެއް އަޑުއަހާލައި ގޭމް ކުޅެ، ޝޮޕިން ކުރެވޭނެ އެވެ.

މެސީއާ އެކު ހާޑްރޮކް ހޮޓެލްއިން ވެފައިވާ ޕާޓްނާޝިޕުގެ ދަށުން މި ދިޔަ އަހަރު "ދަ މެސީ ބާގާ"ގެ ނަމުގައި ބާގާއެއް ވެސް ވަނީ ނެރެފަ އެވެ. މި ބާގާއަށް ދިވެހިންގެ ބޮޑު ތަރުހީބެއް ލިބުނުކަމަށް ހާޑްރޮކްއިން ބުނެ އެވެ.

މި ބާގާ ވެސް ކްރޮސްރޯޑްސްގައި ހުންނަ ހާޑްރޮކް ކެފޭއިން ލިބޭނެ އެވެ.