ފުއާދުގެ އިތުބާރު ނެތްކަމަށް ފާސް ކޮށްފި

ރިޔާސީ އިންތިހާބަށް ދެ މަހަށް ވެފައި ވަނިކޮށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގުގެ އިތުބާރު ނެތް ކަމަށް އެ ކޮމިޝަންގެ މެމްބަރުން މިދިޔަ ހަފުތާގައި ފާސްކޮށްފި އެވެ.

އެ ގޮތަށް ފާސްކުރި ނަމަވެސް ގާނޫނުގައި ބުނާ ގޮތުން މެމްބަރުން ވަކި ކުރެވޭނީ ރައްޔިތުންގެ މަޖިލީހުންނެވެ. އިލެކްޝަންސް ކޮމިޝަންގެ ގާނޫނުގައި ވާ ގޮތުން ވަކި މަގާމަކަށް އައްޔަން ކުރައްވާފައިވާ މެމްބަރެއްގެ މަގާމު ގެއްލޭނީ އޭނާ މެމްބަރުކަމުން ވަކިވުމުން ނުވަތަ ވަކިކުރުމުންނެވެ. އެހެންވެ، އިތުބާރު ނެތްކަމަށް ފާސްކުރި ނަމަވެސް އީސީގެ މެމްބަރު ކަމުގައި ފުއާދު ދެމިހުންނަވާނެ އެވެ.

އީސީގެ ނައިބު ރައީސް އިސްމާއިލް ހަބީބް "މިހާރު" އަށް ވިދާޅުވީ "ދަ ޑިމޮކްރެޓްސް" ރަޖިސްޓަރީ ކުރުމުގެ ތެރޭގައި ފުއާދު ދެއްކެވި ވާހަކަތަކާ ގުޅިގެން އެ ކޮމިޝަންގެ މެންބަރުންގެ ތެރޭގައި ފުއާދާ މެދު އިތުބާރު ގެއްލިފައިވާ ކަމަށެވެ.

ފުއާދު ބައިވެރިވެވަޑައިގަންނަވާ އެއްވެސް ޖަލްސާއެއްގައި އީސީގެ ތިން މެންބަރުން ބައިވެރިވެވަޑައިނުގަންނަވާ ކަމަށާއި ފުއާދު ވަޑައިގަންނަވާ ތަނަކަށް އަދި ކުރައްވާ ކަމަަކަށް ވެސް އެއްބާރުލުން ނުދެއްވާ ކަމަށް ހަބީބް ވިދާޅުވި އެވެ.

"އިންތިހާބުގެ ކަންކަން ކުރިއަށް ގެންދަން ބޭނުންވާތީ ފުއާދު ވަނީ ޖަލްސާތައް ބޭއްވުމާއި މި ކަންކަން އަޅުގަނޑާ ހަވާލު ކޮށްފައި،" ހަބީބް ވިދާޅުވި އެވެ.

ފުއާދުގެ އިތުބާރު ނެތްކަމުގެ މައްސަލަ ހުށަހެޅީ މިދިޔަ ހަފުތާގެ އަންގާރަ ދުވަހު އެވެ. ނަމަވެސް އެއީ ފުއާދު ވަކި ކުރެވޭނެ ގާނޫނީ ބުރަދަނެއް ހުރި މައްސަލައެއް ނޫން ކަން އެ މެނމްބަރުންނަށް ވެސް އެނގިވަޑައިގަންނަވާ ކަމަށް ހަބީބް ވިދާޅުވި އެވެ.

ފުއާދުގެ އިތުބާރު ނެތް މައްސަލަ ނެގި ބައްދަލުވުމުގައި ބައިވެރިވެވަޑައިގަތީ ހަތަރު މެންބަރެކެވެ. ރިޔާސަތު ބެލެހެއްޓެވީ ހަބީބެވެ. ބާކީ ތިން މެންބަރުންގެ އިއްތިފާގުން ފުއާދުގެ އިތުބާރު ނެތް ކަމަށް ފާސްކުރީ އެވެ.

ފުއާދުގެ އިތުބާރު ނެތް ކަމަށް ވޯޓު ދެއްވީ އަލީ ނަޝާތާއި ޑރ. މުހައްމަދު ޒާހިރު އަދި މުހައްމަދު އާސިފެވެ.

ގާނޫނުއަސާސީގެ 177 ވަނަ މާއްދާ ބުނާ ގޮތުން އީސީގެ މެންބަރަކު މަގާމާ އެކަށީގެން ނުވާ ފަދަ ކަމެއް ކުރި ކަމަށް ނުވަތަ މަގާމް އަދާކުރުމަށް އުޒުރުވެރިވާ ހާލަތެއް މެދުވެރިވެއްޖެ ކަމަށް ނުވަތަ މަގާމު އަދާކުރުމުގެ ގާބިލްކަން ނެތް ކަމަށް ފެނިއްޖެ ހިނދެއްގައި ވަކި ކުރެވިދާނެ އެވެ.

އެފަދަ ހާލަތެއް މެދުވެރިވުމުން، ރައްޔިތުންގެ މަޖިލީހުގައި ނަގާ ވޯޓުގައި ބައިވެރިވި މެމްބަރުންގެ އަޣުލަބިއްޔަތުން ވަކި ކުރެވޭނެ ކަމަށް އެ މާއްދާގައި ވެ އެވެ.