އިތުބާރު ނެތް ކަމަށް ފާސްކުރީ ގާނޫނާ ހިލާފަށް، އިސްތިއުފާއެއް ނުދޭނަން: ފުއާދު

ގާނޫނާ ޚިލާފު އެއްވެސް އަމަލެއް ނުހިންގަވަނީސް އިތުބާރު ނެތް ކަމަށް ފާސްކުރީ ޕްރެޝަރު ކުރަން ކަމަށާއި އިސްތިއުފާ ދެއްވުމުގެ ވިސްނުމެއް ނެތް ކަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގް މިއަދު ވިދާޅުވެއްޖެ އެވެ.

ފުއާދު "މިހާރު"އަށް ވިދާޅުވީ އޭނާގެ އިތުބާރު ނެތް ކަމަށް ކޮމިޝަނުގެ ތިން މެމްބަރަކު ވޯޓު ދެއްވައިގެން ފާސްކުރީ ގާނޫނާ ޚިލާފަށް ކަމަށެވެ.

"ދަ ޑިމޮކްރެޓްސް" ރަޖިސްޓަރީ ކުރުމުގެ ތެރޭގައި ފުއާދު ދެއްކެވި ވާހަކަތަކާ ގުޅިގެން އެ ކޮމިޝަންގެ މެންބަރުންގެ ތެރޭގައި ފުއާދާ މެދު ހިތްހަމަނުޖެހުންތަކެއް ވަނީ އުފެދިފަ އެވެ. އަދި މިދިޔަ ހަފްތާގެ ތެރޭގައި އެ މެންބަރުން ވަނީ ފުއާދުގެ އިތުބާރު ނެތް މައްސަލައެއް ހުށަހަޅައި ފާސްކޮށްފަ އެވެ.

ފުއާދު ވިދާޅުވި ގޮތުގައި މެމްބަރުންގެ ޖަލްސާއެއްގެ އެހެނިހެން ކަންކަމުގެ ތެރޭގައި ހިމަނައިގެން ފާސްކުރީ އެއްވެސް ތާކުންތާކު ޖެހޭ މައްސަލައެއް ނޫނެވެ. އެ ޖަލްސާ ބޭއްވިއިރު އެެޖެންޑާގައި އޭނާގެ އިތުބާރު ނެތް ކަމަށް ވޯޓު ނެގުން ހިމަނާފައި ނެތް ކަމަށާއި ފަހު ވަގުތު އެކަން ހިމެނީ އެހެނިހެން ކަންކަމުގެ ތެރޭގައި ކަަމަށް ވިދާޅުވި އެވެ.

މި ދައުރުގެ ކުރިން ވެސް އީސީގެ މެމްބަރުކަމުގައި ހުންނެވި ފުއާދު ވިދާޅުވީ ގާނޫނުއަސާސީ އާއި ގާނޫނުތަކާ ޚިލާފު އެއްވެސް ކަމެއް އޭނާ ކުރައްވާފައި ނޯންނާނެ ކަމަށެވެ. އޭނާއާ މެދު މެމްބަރުން ހިތްހަމަނުޖެހިގެން އުޅެނީ ބައެއް ކަންކަން ދިގުދަންމަން ބޭނުންވިޔަސް އެ ފުރުސަތު ނުދެއްވާތީ ކަމަށް ވިދާޅުވި އެވެ.

"ޕްރެޝާ ކުރިޔަސް ދުލެއް ނުދޭނަން. ގައުމަށް މާ މުހިންމު މި ވަގުތު މި މަގާމުގައި އަޅުގަނޑު ހުރުން. ކިތަންމެ އުނދަގޫ ކުރިޔަށް އިސްތިއުފާ ނުދޭނަން،" ފުއާދު ވިދާޅުވި އެވެ.

ގާނޫނުއަސާސީ ބުނާ ގޮތުން އީސީގެ މެންބަރަކު މަގާމުން ވަކި ކުރެވޭނީ ރައްޔިތުންގެ މަޖިލީހަށެވެ.

ފުއާދު ވިދާޅުވި ގޮތުގައި މަޖިލީހުން އޭނާ ވަކި ކޮށްފި ނަމަ އެކަން ގަބޫލު ކުރައްވާނެ އެވެ. އޭގެ ކުރިން މަސައްކަތްތައް އެއްގޮތަކަށް ވެސް ހުއްޓާ ނުލައްވާނެ ކަމަށް އޭނާ ވިދާޅުވި އެވެ.

އިންތިހާބަށް ދެ މަހަށް ވުރެ ކުޑަ ތަންވެފައި ވަނިކޮށް އީސީގެ ތެރޭގައި ބޮޑެތި މައްސަލަތައް ޖެހެމުން އަންނާތީ ސިޔާސީ ޕާޓީތަކާއި ކަންބޮޑުވުން ވެސް އޮވެ އެވެ.

އެކަމާ ގުޅޭ ގޮތުން ފުއާދު ވިދާޅުވީ އީސީގެ ތެރޭގައި ހިނގާ ކަމަކުން އިންތިހާބާ ގުޅޭ އެއްވެސް ކަމަކަށް އަސަރެއް ނުކުރާނެ އެވެ. މިހާރު ވެސް ހުރިހާ މަސައްކަތްތައް ކުރިޔަށް ދަނީ ޝެޑިއުލްއާ އެއްގޮތަކަށް ކަމަށާއި އިންސާފުވެރި އިންތިހާބެއް ބޭއްވޭނެ ކަމާމެދު ޝައްކު ނުކުރައްވާ ކަމަށް ފުއާދު ވިދާޅުވި އެވެ.

"އެއްވެސް ޖާގައެއް ނެތް އެއްވެސް ކަމެއް ބޭއިންސާފުން ގެންދާކަށް. އިންސާފުވެރިކަމާއެކީ ކުރިޔަށް ދާނެ. އިލެކްޝަންސް ކޮމިޝަނުން ކުރަން ޖެހޭ ހުރިހާ ކަމެއް ޝެޑިއުލްއާ އެއްގޮތަށް ދަނީ. އެކަމަށް ހުރަސް އެޅުނަ ނުދޭނަން،" ފުއާދު ވިދާޅުވި އެވެ.

ފުއާދުގެ އަމަލުތަކާ މެދު ހިތްހަމަނުޖެހި އޭނާގެ އިތުބާރު ނެތް ކަމަށް ވޯޓު ދީފައި ވަނީ މެންބަރު އަލީ ނަޝާތު އާއި ޑރ. މުހައްމަދު ޒާހިރު އާއި މުހައްމަދު އާސިފް އެވެ. އެ ތިން މެންބަރުން ފުއާދު ބައިވެރިވެވަޑައިގަންނަވާ ބައްދަލުވުންތައް ވެސް ބޮއިކޮޓް ކުރައްވަ އެވެ.

އެހެންވެ ކޮމިޝަންގެ ޖަލްސާތަކުގެ ރިޔާސަތު މިހާރު ބަލަހައްޓަވަނީ ނައިބު ރައީސް އިސްމާއިލް ހަބީބް އެވެ. ކޮމިޝަނުގެ މެމްބަރު ނަޝާތުގެ ދައުރު މި ހަފުތާގައި ހަމަވުމުން ރިޔާސީ އިންތިހާބާ ހަމައަށް ކޮމިޝަންގައި ދެން ތިއްބަވާނީ ހަތަރު މެމްބަރުންނެވެ.