އަދީބު ރާއްޖެ އިން ބޭރުގައި ހުންނަވާ މުއްދަތު އަންނަ މަހުގެ 28 އާ ހަމައަށް އިތުރު ކޮށްފި

ކުރީގެ ނައިބު ރައީސް އަހުމަދު އަދީބު ބޭސްފަރުވާ އަށް ސިންގަޕޫރުގައި ހުންނެވުމުގެ މުއްދަތު އަންނަ މަހުގެ 28 އާ ހަމައަށް މޯލްޑިވްސް ކަރެކްޝަނަލް ސާވިސް އިން މިއަދު އިތުރުކޮށްދީފި އެވެ.

އެމްއެމްޕީއާރުސީގެ ބޮޑު ހިޔާނާތަށް އިއުތިރާފުވެ 20 އަހަރުގެ ޖަލު ހުކުމެއް އިއްވިޔަސް ގޭބަންދަށް ބަދަލުކޮށްފައިވާ އަދީބު ބޭސްފަރުވާ އަށް ސިންގަޕޫރަށް ފުރާވަޑައިގަތީ މިދިޔަ ހަފުތާގަ އެވެ.

އޭނާ ރާއްޖެ އިން ބޭރުގައި ހުންނަވަން ކަރެކްޝަންސް އިން ފުރަތަމަ ދިނީ ޑޮކްޓަރުންގެ ލިޔުންތަކަށް ބަލައި 10 ދުވަހެވެ.

އެކަމަކު، އެ އިދާރާ އިން މިއަދު ކުރި ޓުވީޓެއްގައި ބުނީ، ރާއްޖެ އިން ބޭރުގައި ބޭސްފަރުވާ ކުރުމަށް ހުންނަވަން ދިން މުއްދަތު ހަމަވުމުގެ ކުރިން ހުށަހަޅާފައިވާ މެޑިކަލް ޑޮކިއުމެންޓްތަކަށް ރިއާޔަތްކޮށް، އޭނާ އަށް ދީފައިވާ ހުއްދަ އަންނަ މަހު 28 އާ ހަމައަށް އިތުރު ކޮށްފައިވާ ކަމަށެވެ.