ޔާމީންގެ ކުޑަ ޓެސްޓަކުން ސެނެޓު ފެއިލްވެއްޖެ: ޓޮމް

ކުރީގެ ރައީސް އަބްދުﷲ ޔާމީން ޕީޕީއެމް/ޕީއެންސީގެ ސެނެޓަރުންނަށް ދޫކޮށްލެއްވީ އެމަނިކުފާނުގެ އަސާސީ ހައްގެއް ނިގުޅައިގެންފި ކަމަށް ގަބޫލު ކުރައްވާ ނަމަ ރިޔާސީ އިންތިހާބު ބޮއިކޮޓްކުރަން ކަމަށާއި އެވަރުގެ ކުޑަ ޓެސްޓަކުން ދެ ޕާޓީގެ ސެނެޓު ފެއިލްވެ އެމަނިކުފާނަށް އިހާނެތިކޮށްހިތާފައިވާ ކަމަށް މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް) ވިދާޅުވެއްޖެ އެވެ.

ތޯރިގު މިހެން ވިދާޅުވީ، ކުރިޔަށް އޮތް ރިޔާސީ އިންތިހާބު ބޮއިކޮޓް ކުރަން ޔާމީން އަންގަވާފައި ވަނިކޮށް ޕީޕީއެމް/ޕީއެންސީގެ ސެނެޓުން އެ އެންގެވުން ބަލައިނުގަނެ، މާލޭގެ މޭޔަރު ޑރ. މުހައްމަދު މުއިއްޒުގެ ފަހަތަށް އަރަން ނިންމުމާ ގުޅިގެންނެވެ.

ރޭ ޕީޕީއެމް އޮފީހުގެ ކުރިމަތީ ބޭއްވި ޖަލްސާއެއްގައި ވާހަކަ ދައްކަވަމުން ޓޮމް ވަނީ ސެނެޓަރުންގެ ނިންމުމާއި އެ މެންބަރުން ދެއްކެވި ވާހަކަތަކަށް ވަރަށް ބޮޑަށް ފާޑު ވިދާޅުވެފަ އެވެ.

އޭނާ ވިދާޅުވީ ޔާމީންގެ ނޯޓުކޮޅު އައިސްފައި ވަނީ އެމަނިކުފާނުގެ މަންމާފުޅު އަވަހާރަވުމާއި އިލެކްޝަންސް ކޮމިޝަން (އީސީ) އިން ޔާމީންގެ ފޯމް ރިޖެކްޓު ކުރުމާއި ސުޕްރީމް ކޯޓުން ވެސް އެމަނިކުފާނުގެ ހައްގު ގެއްލުވާލި ވަގުތެއްގައި ކަމަށެވެ.

އިންސާނަކު އަސަރުގައި ހުންނެވި ވަގުތެއްގައި ނިންމެވި ނިންމުމަކާ ދޭތެރޭގައި ޕީޕީއެމް/ޕީއެންސީގެ ސެނެޓުން ކަންތައް ކުރެއްވި ގޮތާމެދު ހިތާމަ ކުރައްވާ ކަމަށް ޓޮމް ވިދާޅުވި އެވެ.

"ތެދުވެރިކަމަށް ދެއްކިގެން ކޮންމެ ފަހަރަކު ޔާމީން ދޫކޮށްލާ ދޫކޮށްލާ އޭ ގޮވާއިރު އިއްޔެ އެންމެ ޓެސްޓަކުން ޔާމީން ޓެސްޓު ކުރަން ދެންނެވީމާ ކީކޭތޯ ވިދާޅުވީ. ނޫނެކޭ،" ޓޮމް ވިދާޅުވި އެވެ.

ޓޮމް ވިދާޅުވި ގޮތުގައި ޔާމީންގެ ނޯޓު ކޮޅުގައި އޮތީ ވަރަށް އާދައިގެ ވާހަކައެކެވެ. އެމަނިކުފާނު ވިދާޅުވީ އިންތިހާބެއްގައި ވާދަ ކުރުމުގެ އަސާސީ ހައްގު މި ސަރުކާރުން ނިގުޅައިގެންފި ކަމަށް ގަބޫލު ކުރާ ކަމަށާއި އެމަނިކުފާނު ޖަލު ހުކުމެއް ތަންފީޒު ކުރަމުން މިދަނީ ހައްގުގައިތޯ ނުހައްގުންތޯ ކަމަށް ޓޮމް ވިދާޅުވި އެވެ.

"މިދެންނެވި ނޯޓުގައި އޮތް އިބާރާތުގައި [ކަން ކުރެއްވީ] ރައީސް ޔާމީނާ ދޭތެރޭގައި ވަރަށް އިހާނެތި ގޮތަކަށް،" ޓޮމް ތަކުރާރު ކުރެއްވި އެވެ.

"ރައީސް ޔާމީން ބޮޑުކުރި ޕާޓީއެއް، މެމްބަރުންތަކެއް އެ ޕާޓީގެ އޮފީހުގައި ތިބެގެން ރައީސް ޔާމީނާ ދޭތެރޭގައި ދެއްކެވި ވާހަކަފުޅުތައް އަޅުގަނޑުގެ ހިތަކުން ފިލައިގެން ނުދާނެ."

ވޭތުވެދިޔަ ދުވަސްތަކުގައި ޕީޕީއެމްގެ މެންބަރުން ވަރަށް ބުރަކޮށް މަސައްކަތް ކުރެއްވި ކަމަށާއި އިންތިހާބެއް ބޮއިކޮޓް ކުރަން އެދުމުން އުނދަގޫ ވާނެ ކަމަށް ގަބޫލު ކުރައްވާ ކަމަށް ޓޮމް ވިދާޅުވި އެވެ. ޔާމީން އާ މަޝްވަރާ ކޮށްގެން ގޮތެއް ހޯއްދެވޭނެ ކަމުގެ އުންމީދު ވެސް އޮތް ކަމަށް އޭނާ ވިދާޅުވި އެވެ. ނަމަވެސް ސެނެޓަރުން އެ ޓެސްޓުން ވަރަށް ބޮޑަށް ފެއިލްވީ ކަމަށް ޓޮމް ވިދާޅުވި އެވެ.

އެހެންވެ، ޕީޕީއެމްގައި ތިއްބެވި ޔާމީންގެ ސަޕޯޓަރުން އަރިހުން ޓޮމް އެދިވަޑައިގެންނެވީ އެ މެންބަރުންގެ ހިތުން ޔާމީންގެ ނަން ގެއްލޭނެ އެއްވެސް ކަމެއް ނުކުރުމަށެވެ. އެހެން ޕާޓީތަކަށް ދިމާވި ހާލަތު ޕީޕީއެމް އަށް ވެސް ދިމާވެދާނެ ކަމަށް ބަލައި ޔާމީންގެ ޓީމުތައް ރުކުރުވާލަން ޖެހޭ ކަމަށް ޓޮމް ވިދާޅުވި އެވެ.