ކުރީގެ ސަރުކާރުން ބޯހިޔާވަހިކަމުގެ ލިޔުން ދިން މީހުންނަށް "ގޮތެއް" ހަމަޖައްސައިދޭން ކުއްލި ގޮތަކަށް ނިންމައިފި

ކުރީ ސަރުކާރުން ފްލެޓާއި ގޯތި ލިބުނު ކަމުގެ ލިޔުން ހަވާލު ކުރި ފަރާތްތަކަށް ގޮތްތަކެއް ހަމަޖައްސައިދޭން ކުއްލި ގޮތަކަށް ނިންމައި، އެފަރާތްތަކަށް ދޫކޮށްފައިވާ ލިޔުން ހުށަހެޅުމަށް ފުރުސަތު ވަރަށް އަވަހަށް ހުޅުވާލާނެ ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެ އެވެ.

މިއަދު ހުޅުމާލޭ ދެވަނަ ފިޔަވަހީގައި ވިނަރެސް ފްލެޓް ލިބުނު ފަރާތްތަކަށް ތަޅުދަނޑި ހަވާލުކުރަން ބޭއްވި ރަސްމިއްޔާތުގައި އަކްރަމް ވިދާޅުވީ، ސަރުކާރުން ފްލެޓާއި ގޯއްޗަށް އިއުލާނު ކުރުމުން ވަރަށް ގިނަ ފަރާތްތަކުން ކުރީގެ ސަރުކާރުން ގެދޮރު ދޭން ދީފައިވާ އެކި އެކި ލިޔުން ހިފައިގެން އަންނަ ކަމަށެވެ. އެކަމަކު އެލިޔުންތަކުގެ އެއްވެސް ރެކޯޑެއް އެ މިނިސްޓްރީގައި ނެތް ކަމަށް އޭނާ ވިދާޅުވި އެވެ.

އޭނާ ވިދާޅުވީ، ކުރީގެ ސަރުކާރުން އެންމެ ފަހު ވަގުތު ފުށިދިއްގަރު ފަޅުންނާއި އެ ނޫން ތަންތަނުން ބޯހިޔާވަހިކަން ދޭނެ ކަމަށް ބުނެ ލިޔުން ދީފައިވާ ފަރާތްތަކަށް ގޮތްތަކެއް ހަމަޖައްސައި ދެއްވާނެ ކަމަށެވެ.

"ގޯތި ދޭނެ ކަމަށް ވައުދުވެ، ދީފައި ހުރި ލިޔުން. ސެޓްފިކެޓް ގޮތަށް އެބަ ހުރި. ގޯތި ލިބޭނެއޭ ކިޔާފަ. ފުށިދިއްގަރު ފަޅުން ވެސް ގޯތި ދޭނެ ކަމަށް އެބައޮތް ބައެއް ލިޔުންތަކުގައި. އެހެންވީމަ އަޅުގަނޑުމެން ހުޅުވާލަން މިއުޅެނީ އެފަދަ ފަރާތްތަކަށް ދީފައި ހުރި ލިޔުންތައް މިނިސްޓްރީއަށް އެއް ހަފްތާގެ ތެރޭ ހުށަހަޅުއްވަން. އޭގެ ސައްހަކަން ބަލައި އެބޭފުޅުންނަށް ގޮތެއް ހޯދައި ދިނުމަށް މަސައްކަތް ކުރާނަން،" އޭނާ ވިދާޅުވި އެވެ.

ކުއްލި ގޮތަކަށް މި ނިންމުން ސަރުކާރުން ނިންމާފައިވަނީ، ކުރީގެ ރައީސް އަބްދުﷲ ޔާމީންގެ ވެރިކަމުގައި "ހިޔާ އެކޮމްޕްލިޝްޑް" ގެ ނަމުގައި މާލެ ސަރަހައްދުގައި އިއުލާނުކުރި މަޝްރޫއުގެ ދަށުން ގޯއްޗާއި ފްލެޓު ދޭނެ ކަމުގެ ލިޔުން ލިބުނު މީހުން ހިމެނޭ ގޮތަށް، ފުށިދިއްގަރުފަޅާއި ގިރާވަރުފަޅާއި ގުޅިފަޅާއި ހުޅުމާލެ އާއި މާލެ ހިމެނޭހެން 65،000 ގޯތި ނުވަތަ ފްލެޓް ދޭނެ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު އިއުލާނުކުރައްވާފައިވަނިކޮށެވެ.

މުއިއްޒުގެ ބޯހިޔާވަހިކަމުގެ މެނިފެސްޓޯ އިއުލާން ކުރުމަށް ހުޅުމާލޭގެ ހިޔާ ސަރަހައްދުގައި ރޭ ބޭއްވި ބޮޑު ޖަލްސާގައި މުއިއްޒު ވިދާޅުވީ، ފުށިދިއްގަރުފަޅުން 1،200 ހެކްޓަރުގެ ބޮޑު ސަރަހައްދެއް އޭނާގެ ވެރިކަމުގައި ހިއްކާނެ ކަމަށާއި އެތަނުން 11،900 އަށް ވުރެ ގިނަ ގޯއްޗާއި 26،000 ފްލެޓް އިމާރާތް ކުރާނެ ކަމަށެވެ.

އޭރުން ބޯހިޔާވަހިކަން ނުލިބޭ މީހަކު މާލެ ސަރަހައްދުގައި ނުހުންނާނެ ކަމަށް އޭނާ ވިދާޅުވި އެވެ.

ވިނަރެސް މަޝްރޫއު

ވިރަނެސް ފްލެޓްތަކުގެ ގޮތުގައި 1.344 ފްލެޓް ހިމެނޭ 10 ޓަވަރު ވަނީ އިމާރާތް ކޮށްފަ އެވެ. އޭގެ ތެރެއިން ގުޅިފަޅުން ފްލެޓް ގަތް 140 ފަރާތަކަށް ވިނަރެސް ފްލެޓް ދޫކުރި އެވެ. ގުޅިގަޅުން ފްލެޓް ލިބި، ފައިސާ ދެއްކި ފަރާތްތަކަށް މި ސަރުކާރުން ވަނީ ވިނަރެސްއަށް އެފަރާތްތަކަށް ވަދެވެންދެން ކޮންމެ މަހަކު ބަދަލެއްގެ ގޮތުގައި 12،000 ރުފިޔާގެ އެހީއެއް ދެމުންދެ އެވެ.

އަކްރަމް ވިދާޅުވީ، ވިނަރެސް ފްލެޓުން ކުރީ ސަރުކާރުން އަމަލުކުރި ގޮތުން މަގު މަތިވި ގުޅިފަޅު ފްލެޓު ލިބުނު ފަރާތްތަކާއި ސީލައިފް އިން ފްލެޓް ގަތް ފަރާތްތަކަށް މިސަރުކާރުން ގޮތްތަކެއް ހަމަޖައްސާ ދީފައިވާ ކަމަށެވެ.

"އޭރު ސަރުކާރުން މުހައްމަދު މުއިއްޒު މިނިސްޓަރަކަށް ހުންނަވައިގެން އެބޭފުޅުން ވަނީ އެ ފަރާތްތަކަށް [ގުޅީފަޅު ފްލެޓް ލިބުނު މީހުން] ވަރަށް އިހާނެތްތެރިކޮށް އަމަލު ކުރައްވާފައި. އަޅުގަނޑަށް މައުލޫމާތު ލިބުނު ގޮތުގައި ތަޅުދަނޑި ހަވާލުކުރަން ފުރަތަމަ ގެންދިޔަ ދުވަހު އެތަނަށް އެބޭފުޅުން ގެންދަވާފައި އިރުކޮޅަކުން ފުލުހުން އަރުވައިގެން އެއީ ދިރިއުޅެން ކަމުނުދާ ތަނެއް ކަމަށް ވިދާޅުވެ، އެމީހުން މަގުމަތި ކުރެއްވީ،" އޭނާ ވިދާޅުވި އެވެ.

ކުރީގެ ރައީސް މުހައްމަދު ނަޝީދުގެ ސަރުކާރުން ވަނީ ގުޅީފަޅުން 184 ފްލެޓް ވިއްކާފަ އެވެ. އެ ފްލެޓްތައް 158 ފަރާތަކުން ގަނެފައިވެ އެވެ. ގުޅިފަޅުން ފްލެޓް ގަތް މީހުންގެ ތެރެއިން 18 ފަރާތަކަށް ރައީސް އަބްދުﷲ ޔާމީންގެ ސަރުކާރުން ފްލެޓް ދިނެވެ. ބާކީ ފަރާތްތަކަށް ފްލެޓް ދޫކުރީ ވިނަރެސް ފްލެޓުންނެވެ.

ގުޅީފަޅުގެ އިތުރުން ސީލައިފް އިން 123 މީހުންނަށް އަދި ހިޔާ އިން ފްލެޓް ދޫކޮށްލި 78 ފަރާތަކަށް ވެސް ބިނަރެސް އިން ވަނީ ފްލެޓް ލިބިފަ އެވެ.