ވިނަރެސް ފްލެޓް: މާލީ ގާބިލުކަން ކަށަވަރު ނުވާ މީހުންނަށް އިތުރު ފުރުސަތެއް ދީފި

ވިނަރެސް ފްލެޓް ލިބުނު މީހުންގެ ތެރެއިން ދިގު މުއްދަތަށް ފައިސާ ބަހާލައިގެން ދައްކާ އުސޫލު (ލީސް ޓު އޯން) މޮޑެލްގެ ދަށުން މިހާތަނަށް މާލީ ގާބިލުކަން ސާބިތުކޮށްދެވިފައި ނުވާ 499 މީހުންނަށް އަލުން މާލީ މައުލޫމާތު ހުށަހަޅަން އާބަންކޯއިން ފުރުސަތެއް ދީފި އެެވެ.

އާބަންކޯ އިން މިއަދު ކުރި އިއުލާނުގައި، މާލީ ގާބިލުކަން ސާބިތު ނުކުރެވި ތިބި ފަރާތްތަކަށް އެކަން ކަށަވަރު ކުރަން މައިގަނޑު ތިން ލިޔުމެއް ހުށަހަޅަން ފުރުސަތު ދިނެވެ.

މާލީ ގާބިލުކަން ކަށަވަރު ކުރަން ހުށަހަޅަން ޖެހޭ ލިޔުންތައް

- އާމްދަނީ ސާބިތު ކުރަން ބޭނުންވާ އިތުރު ލިޔުންތައް

- އެމްއެމްއޭގެ ކްރެޑިޓް ރިޕޯޓު

- އެލިޖަބަލް އީއެމްއައި (އީކުއޭޓެޑް މަންތްލީ އިންސްޓޯލްމަންޓް) ސާބިތުނުވާ ފަރާތްތަކުން ގެރެންޓާއެއް ހުށަހެޅުން

އާބަންކޯ އިން ބުނީ ގެރެންޓާއެއްގެ ގޮތުގައި އާއިލީ ގުޅުން ނެތް ފަރާތެއް ވެސް ހަމަޖެއްސި ދާނެ ކަމަށެވެ. ގެރެންޓާގެ ގޮތުގައި ހުށަހަޅާ ފަރާތުގެ، އެމްއެމްއޭ ކްރެޑިޓް ރިޕޯޓު ވެސް ހުށަހަޅަން ޖެހެ އެވެ. ކްރެޑިޓް ރިޕޯޓު ހުށަހެޅި ނަމަވެސް، ގެރެންޓާގެ ގޮތުގައި ހުށަހަޅާ ފަރާތުގެ މާލީ ގާބިލުކަން ސާބިތުކޮށްދޭން ނުޖެހޭނެ ކަމަށް ވެސް އެ ކޯޕަރޭޝަނުން ބުންޏެވެ.

ގެރެންޓާއެއް ހުށަހަޅާ ނަމަ އެކަމަށް ހާއްސަ ފޯމެއް ވެސް އާބަންކޯ އިން ވަނީ ހުށަހަޅަން އެދިފަ އެވެ. އެކަމާ ގުޅޭ ފޯމު އެ ކޯޕަރޭޝަންގެ ވެބްސައިޓުން ލިބޭނެ އެވެ.

މާލީ ގާބިލުކަން ކަށަވަރު ކުރަން ދިން މި ފުރުސަތުގައި ހުށަހަޅަން ޖެހޭ ލިޔެކިޔުންތައް އޮކްޓޫބަރު މަހުގެ ނިޔަލަށް އާބަންކޯއަށް ހުށަހެޅުމަށް ވަނީ އެދިފަ އެވެ.

އާބަންކޯ އިން ބުނީ، މާލީ ގާބިލުކަން ސާބިތުކޮށްފައިވާ ފަރާތްތަކުންގެ ތެރެއިން ޔުނިޓް އިހްތިޔާރު ކުރަން މިހާތަނަށް ދައުވަތު ދީފައިވާ ފަރާތްތަކުން ވެސް އޮކްޓޫބަރުގެ 31ގެ ކުރިން އެ މަރުހަލާ ފުރިހަމަ ކުރުމަށް ވަނީ އެދިފަ އެވެ.

ވިރަނެސް ފްލެޓްތަކުގެ ގޮތުގައި 1،344 ފްލެޓް ހިމެނޭ 13 ބުރީގެ 10 ޓަވަރު ވަނީ އިމާރާތް ކޮށްފަ އެވެ. އޭގެ ތެރެއިން ގުޅިފަޅުން ފްލެޓް ގަތް 140 ފަރާތަކަށް ވިނަރެސް ފްލެޓް ދޫކުރި އެވެ. އަދި ސީލައިފް އިން 123 މީހުންނަށް އަދި ހިޔާ އިން ފްލެޓް ދޫކޮށްލި 78 ފަރާތަކަށް ވެސް ވިނަރެސް އިން ވަނީ ފްލެޓް ލިބިފަ އެވެ. އެ ފަރާތްތަކަށް އާބަންކޯއިން މިހާރު އަންނަނީ ފްލެޓް ތަޅުގަނޑި ހަވާލު ކުރަމުންނެވެ.

އެފަރާތްތަކުގެ އިތުރުން ވިނަރެސް އިން ފްލެޓަށް ހޮވުނީ މާލޭގައި ރަޖިސްޓްރީނުވެ، ދިރިއުޅޭތާ 15 އަހަރުވެފައިވާ މީހުންގެ ކެޓަގަރީއިން 1094 މީހުންނާއި މާލޭގައި ރަޖިސްޓްރީ ވެފައިވާތާ 15 އަހަރުވެފައިވާ މީހުންގެ ކެޓަގަރީން 267 މީހުންނެވެ.

ވިނަރެސްގައި ހުރި ތިން ކޮޓަރީގެ އެޕާޓްމެންޓްތައް ވިއްކަނީ 2.5 މިލިއަން ރުފިޔާ އާއި 2.7 މިލިއަން ރުފިޔާއާ ދެމެދުގެ އަގުތަކެއްގަ އެވެ.