ތްރީ އޮން ތްރީ ބާސްކެޓް އަންހެން އަދި ފިރިހެން ޓީމަށް ވެސް ބްރޯންޒް މެޑަލް

މަޑަގަސްކަރާގައި ކުރިއަށްދާ އިންޑިއަން އޯޝަން އައިލެންޑް ގޭމްސްގައި ވާދަކުރާ ރާއްޖޭގެ ތްރީ އޮން ތްރީ އަންހެން އަދި ފިރިހެން ޓީމު ވެސް ލޯ މެޑަލް ހޯދައިފި އެވެ.

މިއީ ރާއްޖޭގެ ތްރީ އޮން ތްރީ ބާސްކެޓްބޯޅަ ޓީމެއް ގޭމްސްއެއްގައި ވާދަކުރާ ފުރަތަމަ ފަހަރެވެ.

އަންހެން ޓީމު ލޯ މެޑަލް ހޯދީ އިއްޔެ ކުޅުނު ތިންވަނަ ހޮވި މެޗުގައި 19-15 އިން މަޔޯޓް ބަލިކޮށްފަ އެވެ.

މުޅިން އަލަށް ގޭމްސްއެއްގައި ވާދަކުރި ތްރީ އޮން ތްރީ ބާސްކެޓް އަންހެން ޓީމުގައި ހިމެނެނީ އީހައު ޝަމީމް، އިފާ އާތިފް، ކައިލީން ޝިރްހާން އަދި ޒުހާ އަޝްރަފް އަލީ އެވެ.

ގުރޫޕް ސްޓޭޖުގައި ރާއްޖެ ވަނީ ކުޅުނު ދެ މެޗު ވެސް ކާމިޔާބު ކޮށްގެން ސެމީ ފައިނަލް ކުޅެފަ އެވެ. އިއްޔެ ކުޅުނު ސެމީ ފައިނަލްގައި ރާއްޖެ ބަލިވީ ރީޔޫނިއަން އަތުން 18-6 އިންނެވެ.

ފިރިހެން ޓީމު ލޯ މެޑަލް ހޯދީ ތިންވަނަ ހޮވި މެޗުގައި 14-13 އިން އިއްޔެ މޮރީޝަސް ބަލި ކޮށްގެންނެވެ.

ތްރީ އޮން ތްރީ ފިރިހެން ޓީމުގައި ހިމެނެނީ އިސްމާއިލް ވިލްދާން، އަބްދުﷲ އަމްޒަރު، މުހައްމަދު ހުވައިލިދު (ހުވޭ) އަދި ޒަކަރިއްޔާ އަބްދުލް ލަތީފް (ޒަކިއްޓެ) އެވެ. މި ޓީމު ވަނީ ގުރޫޕް ސްޓޭޖުގެ ފުރަތަމަ މެޗުގައި ސީޝެލްސް ބަލިކޮށްފަ އެވެ. ނަމަވެސް ދެވަނަ މެޗުގައި މަޔޯޓް އަތުން ބަލިވުމުން ޖެހުނީ ކުއާޓާ ފައިނަލް ކުޅޭށެވެ.

އިއްޔެ ކުޅުނު ކުއާޓާ ފައިނަލް މެޗުން ރާއްޖެ ވަނީ 20-18 އިން ރީޔޫނިއަން ބަލިކޮށްފަ އެވެ. ނަމަވެސް ސެމީ ފައިނަލްގައި 21-16 އިން މަޔޯޓް އަތުން ބަލިވެގެން ތިންވަނަ ހޮވާ މެޗު ކުޅެން ޖެހުނީ އެވެ.