ބަސް ދަތުރުތައް 24 ގަޑިއިރަށް، ކޮލެޖު/ޔުނިވާސިޓީ ދަރިވަރުންނަށް ހިލޭ ދަތުރުކުރެވޭ

އެމްޓީސީސީން މާލެ އާއި ހުޅުމާލެއާ ދެމެދު ކުރަމުން އަންނަ ބަސް ދަތުރުތައް 24 ގަޑިއިރު ދޭ ގޮތަށް ހަމަޖައްސައި، ކޮލެޖު/ޔުނިވާސިޓީތަކުގެ ދަރިވަރުންނަށް ހިލޭ ދަތުރުކުރެވޭ ގޮތް ވެސް ހަދައިފި އެވެ.

އެމްޓީސީސީން އިއްޔެ ކުރި އިއުލާނެއްގައި ބުނީ މާލެ، ވިލިމާލެ، ހުޅުމާލެ އަދި ރަށްރަށުގައި ބޭނުންކުރާ އެ ކުންފުނީގެ އާންމު ދަތުރުފަތުރުގެ ބަސްތަކުން ކޮލެޖު އަދި ޔުނިވާސިޓީތަކުގެ ދަރިވަރުންނަށް މިއަދުން ފެށިގެން ހިލޭ ދަތުރުކުރެވޭނެ އިންތިޒާމު ހަމަޖައްސާފައިވާ ކަމަށެވެ.

މީގެ ކުރިން ބަސްތަކުގައި ހިލޭ ދަތުރުކުރެވެނީ ގުރޭޑް 12 އިން ދަށުގެ ގްރޭޑްތަކުގެ ދަރިވަރުންނަށެވެ.

ކޮލެޖު އަދި ޔުނިވާސިޓީތަކުގެ ދަރިވަރުން ބަހުގައި ހިލޭ ދަތުރުކުރުމަށް ދަރިވަރުންނަށް ދޫކޮށްފައިވާ ސްޓޫޑެންޓް ކާޑު ދައްކަން ޖެހޭނެ ކަމަށް އެމްޓީސީސީގެ އިއުލާނުގައި ބުންޏެވެ.

މާލެ އާއި ހުޅުމާލެއާ ދެމެދު ވެސްޓް ޕާކް ރޫޓުން ދަތުރުކުރާ ބަހުގެ ހިދުމަތް 24 ގަޑިއިރު ލިބޭނެ އިންތިޒާމު ވެސް އެ ކުންފުނިން މިހާރު ވަނީ ހަމަޖައްސައިފަ އެވެ. މީގެ ކުރިން ރޭގަނޑުގެ އެންމެ ފަހު ދަތުރު ކުރަނީ 0:15 ގަ އެވެ. ނަމަވެސް މި ގެނައި ބަދަލާ އެކު، 00:15 ގެ ފަހުން ކޮންމެ އެއް ގަޑިއިރަކުން ބަސް ދަތުރެއް އޮންނާނެ އެވެ.