ޑޭޓާ ބަލަހައްޓަނީ އަޅުގަނޑު، ރައީސް ކާމިޔާބުކުރާނީ 56 ޕަސެންޓަށް ވުރެން މަތިން: ފައްޔާޒް

އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ވޯޓުގައި ރައީސް އިބްރާހިމް މުހައްމަދު ސޯލިހް ދެ ވަނަ ދައުރު ކާމިޔާބު ކުރައްވާނީ 56 ޕަސެންޓަށް ވުރެން މަތިން ކަމަށް އެމްޑީޕީގެ ޗެއާޕާސަން, އިކޮނޮމިކް މިނިސްޓަރު ފައްޔާޒް އިސްމާއިލް މިރޭ ވިދާޅުވެއްޖެ އެވެ.

ކާނިވަލުގައި މިރޭ ބޭއްވި "އުފާވެރި މާލެ" ޖަލްސާގައި ފައްޔާޒް ވިދާޅުވީ މި ކެމްޕޭންގައި އޭނާ ބަލަހައްޓަވާ ޑޭޓާތަކުން ނަތީޖާ ވަރަށް ސާފުކޮށް ފެންނަން އެބައޮތް ކަމަށެވެ. ރައީސް އިބްރާހިމް މުހައްމަދު ސޯލިހް އެއް ބުރުން އިންތިހާބު ކާމިޔާބު ކުރައްވާނީ ބޮޑު އަޣުލަބިއްޔަތަކުން ކަމަށް ވިދާޅުވި އެވެ.

"މި ކެމްޕޭނުގައި އެ ބުނާ ޑޭޓާ ބަލަހައްޓާ ކުއްޖަކީ އަޅުގަނޑު. ތި ބޭފުޅުންނަށް ޔަގީންކަމާއި ކަށަވަރުކަމާ އެކީގައި މި ދަންނަވަނީ 56 ޕަސެންޓަށް ވުރެން އެންމެ ވޯޓަކުން ވެސް އަޅުގަނޑުމެން ތިރިއެއް ނުވާނެކަން," ފައްޔާޒް ވިދާޅުވި އެވެ.

މި އިންތިހާބު ކާމިޔާބު ކުރެވޭނެ ކަމަށް ލަފާކުރައްވާ ޕަސެންޓޭޖް ވިދާޅުވެ ކާނިވަލުގައި ތިބި އެންމެންނާ އެކު ފޯރީގައި އެއްބުރުން ތަކުރާރުކުރައްވައި ފައްޔާޒް ވިދާޅުވީ "އަޅުގަނޑު ހޮވީ މި ޕާޓީ ހިންގާލަން" ކަމަށެވެ.

"ރައީސް ވިދާޅުވި ގޮތަށް އިތުރުވާ ކޮންމެ ދުވަހަކީ އެ 56 ޕަސެންޓް އިތުރުވާނެ ދުވަސް. އެއްވެސް ޝައްކެއް އޮތް ކަމެއް ނޫން. ސެޕްޓެމްބަރު 9 ގައި އަޅުގަނޑުމެން މި އިންތިހާބު ކާމިޔާބުކުރާނީ ބޮޑުކޮށް," އޭނާ ވިދާޅުވި އެވެ.

ފައްޔާޒް ވިދާޅުވި ގޮތުގައި އައްޑު އާއި ފުވައްމުލަކުގެ މެޖޯރިޓީ ވެސް ލިބޭނެ އެވެ.

އެމްޑީޕީން ވަކިވި މީހުން ބޭނުންވަނީ އަނިޔާ އިޔާދަކުރަން، ދާނީ ހަތަރަކަށް

ފައްޔާޒް ވަނީ އެމްޑީޕީން ވަކިވެވަޑައިގެން ޑިމޮކްރެޓްސް އުފައްދައި އިންތިހާބަށް ނުކުމެވަޑައިގެން ކުރައްވާ މަސައްކަތަށް ބަހުގެ ހަމަލާތަކެއް މިރޭ ދެއްވައިފަ އެވެ.

މިނިސްޓަރު ވިދާޅުވި ގޮތުގައި އަމިއްލަ އެދުމުގައި ނުކުމެ ބޭނުން ވަނީ އަނިޔާވެރިކަން އިޔާދަކުރުމެވެ.

"ވެރިކަން ނުލިބުނީމާ ނޫނީ ވެރިކަމުގެ ބޭނުމުގައި ނޫނީ ސަރުކާރުގައި ބޭނުންވާ ވަރަށް ސަރުކާރުގައި ބައިވެރިނުވެވުނީމާ އެއީ ދެން ތިބި ރައްޔިތުންނަށް އޭގެ ހަސްކާ ދޭން ޖެހޭ ކަމެއް ނޫން," ފައްޔާޒް ވިދާޅުވި އެވެ.

ފައްޔާޒް ވިދާޅުވީ ޑިމޮކްރެޓްސްގެ ކެންޑިޑޭޓް އިލްޔާސް ލަބީބް އަށް ލިބިވަޑައިގަންނަވާނީ މި އިންތިހާބުގައި ހަތަރު ވަނަ ކަމަށެވެ.

"ޑިމޮކްރެޓްސްގައި ތިބި އާއްމު މެމްބަރުންނަށް އަޅުގަނޑު ދަންނަވާނީ ތި ބޭފުޅުންގެ ވޯޓު ބޭކާރު ނުކުރައްވައި އަޅުގަނޑުމެންނާ ގުޅިވަޑައިގެން ޕަސެންޓޭޖް 60 އިން މައްޗަށް ގެންގޮސްދެއްވާށޭ،"

ރައީސްއާ ވާދަވެރި ކެންޑިޑޭޓް ޑރ. މުހައްމަދު މުއިއްޒަށް ފާޑުވިދާޅުވެ ފައްޔާޒް ވިދާޅުވީ ރާއްޖޭގެ އަންހެނުންނާއި އަންހެން ކުދިން ގެއަށް ވައްދައި ފޮރުވައި މުޖުތަމައުން އެކަހެރިކުރާ ހާލަތު މި ގައުމުގައި މެދުވެރިވާން ބޭނުން ނުވާ ކަމަށެވެ. އަފްޣާނިސްތާނުގެ ހާލަތު ވެސް މި ގައުމަށް މެދުވެރިވާން ނޭދޭ ކަމަށާއި މިއީ ވިސްނަން ޖެހޭ ކަމެއް ކަމަށް ވިދާޅުވި އެވެ.

މި ފަސް އަހަރު ހޭދަކުރީ, ފައްޔާޒް ވިދާޅުވި ގޮތުގައި, އަނިޔާނުކޮށް ބިރުވެރި ހާލަތަށް ނުވައްޓައި އެންމެންނަށް ޖާގަދީގެން އަމާންކަމުގަ އެވެ. އެކަމަކު އޭގެ ކުރީގެ ވެރިކަންތަކުގައި ގާޒީން ހައްޔަރުކޮށްފައިވާ ކަމަށާއި އެފަދަ ބިރުވެރި ހާލަތެއް މިހާރު ނެތް ކަމަށް ވިދާޅުވި އެވެ.