މޯލްޑިވިއަން އައިޑޮލް: އެހެން މީހުންގެ އަޑުން ލަވަ ކިޔުން، މި ވެސް ހުނަރެއް

މޯލްޑިވިއަން އައިޑޮލްގެ އޮޑިޝަން ރައުންޑް މިހާރު ޓީވީއެމުން ދައްކަމުން އަންނަ އިރު، ރެއަކީ އަނެއްކާ ވެސް މަޖާ އަދި ހުނަރުވެރި ބައިވެރިންތަކެއްގެ ހުށަހެޅުންތަކެއް ފެނިގެން ދިޔަ ރެއެކެވެ.

ރޭގެ އޮޑިޝަނަކީ އައްޑޫ/ފުވައްމުލައް އަދި ލ. އަތޮޅުގެ އޮޑިޝަނެވެ.

އައްޑޫ/ފުވައްމުލައް އޮޑިޝަނަށް ބަލާ އިރު، ޖުމްލަ ނުވަ ބައިވެރިއަކު ވަނީ ގޯލްޑެން ޓިކެޓާ އެކު، ތިއޭޓާ ރައުންޑަށް ދަރުތުކޮށްފަ އެވެ.

ރޭގެ އައްޑޫ އޮޑިޝަންގެ އެންމެ ފާހަގަކޮށްލެވުނު އެއް ބައިވެރިއަކީ މީދޫން، އޮޑިޝަންގައި ވާދަކޮށް ގޯލްޑެން ޓިކެޓް ހޯދި ބަދުރުއްނަސީރެވެ. އޭނާގެ ތައާރަފު ފެށުނީ ޤުރުއާން މުދައްރިއްސެއްގެ ގޮތުން އަވަށްޓެރި ކުދިންނަށް ޤުރުއާން ކިޔައިދޭ މީހެއްގެ ގޮތުގަ އެވެ.

އެކަމަކު ގޯލްޑެން ޓިކެޓް އޭނާ ހޯދީ، ތިން ޖަޖުން ވަރަށް ބޮޑަަށް ހެއްވާލައިފަ އެވެ. އެގޮތުން ކުރީގެ މަޝްހޫރު ދެ ލަވަ ކިޔުންތެރިއެއްގެ އަޑުން ބަދުރު ލަވަ ކިޔުންވީ ވަރަށް މަޖާ ކަމަކަށެވެ. ހަމްދީ އާއި އިބްރާހީމް ޝަކީބްގެ އަޑުން ބަދުރު ކީ ލަވަތައް ހަމަ އަސްލު ވަރަށް މަޖަލެވެ.

އައްޑޫގެ އޮޑިޝަނުން ދެން އެންމެ ފާހަގަ ކުރެވުނު އެއް ބައިވެރިއަކީ ހިތަދު އަށް އުފަން ނިއާމެވެ. އޭނާގެ ހާއްސަ ކަމަކީ މަރުހޫމް ދޮހޮއްކޮބޮގެ ލަވަތައް، ދޮހޮއްކޮބެގެ ސްޓައިލަށް ކިޔުމެވެ. އެކަން ތިން ޖަޖުންނަށް ވެސްވީ ވަރަށް ސަޅި ކަމަކަށެވެ.

ނަތީޖާއަކަށްވީ ދޮހޮއްކޮބޭގެ ހަތަރު ފަސް ވަރަކަށް ލަވައިގެ ކަޑިތައް ނިއާމް ހުށަހަޅައި ދީގެން ގޯލްޑެން ޓިކެޓް ކަށަވަރު ކުރުމެވެ.

އައްޑޫގައި ކުރިއަށް ގެންދިޔައީ އައްޑޫ/ފުވައްމުލަކަށް ހާއްސަ އޮޑިޝަނެއް ކަމަށް ވިޔަސް، ފާހަގަކޮށްލެވުނު ކަމަކީ ހުވަދު އަތޮޅުން ވެސް ބައެއް މީހުން އޮޑިޝަނަށް އައްޑު އަށް އައިކަމެވެ.

މިހާތަނަށް މޯލްޑިވިއަން އައިޑޮލް އިން ފުވައްމުލަކުގެ އަންހެން ކުއްޖަކަށް ޖާގައެއް ތަނަވަސްވެފައި ނުވާތީ، ރޭގެ އޮޑިޝަންގައި އެކަން ބަދަކުކޮށްލަން ފުވައްމުލަކުން ފުރައިގެން އައިސް ނަޒްފާ ލަވަ ކިޔެ އެވެ. އެކަމަކު ލަވައަކަށް ވުރެ ބޮޑަަށް އޭނާ ކުރީ "ހިތް ކުދިކުދި" ލަވައިގެ ރެޕިން އެވެ.

އެކަމަކު އެ ހުށަހެޅުމުން ޖަޖުންގެ ހިތުން ޖާގައެއް ހޯދޭ ގޮތެއް ނުވި އެވެ. ގޯލްޑެން ޓިކެޓް ހޯދައިގެން ނޫނީ ނުދާން އަޒުމް ކަނޑައަޅައިގެން ދިޔަ ނަޒްފާ އަށް ދާން ޖެހުނީ ހިތް ކުދިކުދިވެ ހުރެ އެވެ. އެކަމަކު އޭނާ ނިކުތީ ޖަޖުންނަށް ޓާޓާ ކިޔަމުން ހިނިތުންވުމަކާ ވެސް އެކުގަ އެވެ.

ދެން އޮތީ ލ. އޮޑިޝަންގެ ވާހަކަ އެވެ. ބޮޑު އާބާދީއެއް އޮތް ލ. އޮޑިޝަނުން ތިއޭޓަ ރައުންޑަށް ދާން ފުރުސަތު ލިބުނީ އެންމެ ދެ ބައިވެރިއަކަށެވެ.

އޭގެ ތެރެއިން އަނެއްކާ ވެސް އެކަކީ ކުރީގެ ލަވަ ކިޔުންތެރިންތަކެއްގެ އަޑުތަކުން ލަވަ ކިޔައިގެން ތިން ޖަޖުން ވެސް ހެއްވާލި މުބާރިކެވެ. އޭނާ ވަނީ ހޮޅުދޫ އަބްދުﷲ އާއި މުހައްމަދު ހުޒާމްގެ އަޑު ނަކަލުކޮށްގެން ވަރަށް ފުރިހަމައަށް ލަވަތަކެއް ހުށަހަޅައި ދީފަ އެވެ.

އެކަން މަޖާވެގެން ޖަޖް މަރިޔަމް އުނޫޝާ (ކިޑީ) ވަރަށް ގަދައަށް ހީ ހެދި އެވެ.

އެކަމަކު މުބާރިކް ގޯލްޑެން ޓިކެޓް ހާސިލް ކުރީ، އެ ދެ ލަވަ ކިޔުންތެރިންގެ އަޑުން ލަވަ ކިޔައިގެނެއް ނޫނެވެ. އޭނާގެ އަސްލު އަޑުން ލަވަ ކިޔައިގެންނެވެ.

މާދަމާ ރޭ ދައްކާ އޮޑިޝަން އެޕިސޯޑް ހާއްސަ ވާނީ ހދ އަތޮޅާއި ބ. އަތޮޅަށެވެ.

މޯލްޑިވިއަން އައިޑޮލްގެ ޖަޖުންގެ ތެރޭގައި މި ފަހަރު ހިމެނެނީ މިދިޔަ އަހަރު ބޭއްވި ސީޒަން އެކެއްގެ ޖަޖުންގެ ތެރޭގައި ކިޑީ އާއި އިބްރާހީމް ޒައިދު އަލީ (ކުޑަ އިއްބެ) ގެ އިތުރުން މި ފަހަރު ޖަޖުންގެ ޕެނެލާ އަލަށް ގުޅުނު އިސްމާއިލް އައްފާނެވެ.