އެގްރޯ ނެޓުގެ ކުރީގެ އެމްޑީ ހާރޫނާ އެކު އެމްޑީޕީގެ 100 އެއްހާ މީހުން ޕީޕީއެމަށް

ދަނޑުވެރިކަން ކުރިއަރުވަން ސަރުކާރުން އުފައްދާފައިވާ އެގްރޯ ނޭޝަނަލް ކޯޕަރޭޝަން (އެގްރޯ ނެޓް) ގެ މެނޭޖިން ޑިރެކްޓަރު ކަމުން ވަކިކުރި، ހާރޫން ރަޝީދު މިއަދު ޕީޕީއެމަށް ސޮއިކުރައްވައިފި އެވެ.

ކެމްޕެއިނު ނިންމާލުމުގެ ގޮތުން ދެކުނުގެ ހަތަރު އަތޮޅަށް އިދިކޮޅު ރިޔާސީ ކެންޑިޑޭޓު ޑރ. މުހައްމަދު މުއިއްޒު ކުރައްވަމުން ގެންދަވާ ދަތުރުގައި މިއަދު ގއ. ވިލިނގިލީގައި ބޭއްވި ޖަލްސާގައި ހާރޫން ވަނީ އޭނާގެ މެމްބަޝިޕް ފޯމު ހަވާލުކުރައްވައިފަ އެވެ.

މި ސަރުކާރުން އުފެއްދި އެގްރޯ ކުންފުނީގެ އެމްޑީއަކަށް ހާރޫން އައްޔަން ކުރީ 2020 ވަނަ އަހަރު އެވެ. އެމްޑީޕީގެ ރިޔާސީ ޕްރައިމަރީގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދު ކުރެއްވި ހާރޫން މަގާމުން ވަކިކުރީ މި އަހަރުގެ ކުރީކޮޅުގަ އެވެ.

ކުރީގެ ރައީސް މުހައްމަދު ނަޝީދުގެ އަރިސް ބޭފުޅެއް ކަމަށްވާ ހާރޫން މިހާތަނަށް ހުންނެވީ އެމްޑީޕީން މެންބަރުންތަކެއް ވަކިވެ އުފެއްދި ޑިމޮކްރެޓްސްގަ އެވެ، ރިޔާސީ އިންތިހާބުގެ ފުރަތަމަ ބުރުގައި އޭނާ ތާއީދު ކުރައްވާފައިވަނީ އެ ޕާޓީގެ ރިޔާސީ ކެންޑިޑޭޓު އިލްޔާސް ލަބީބަށެވެ.

ހާރޫނާ އެކު، ވިލިނގިލީގެ އެމްޑީޕީ މެންބަރުންގެ ގޮތުގައި ތިބި 100 އެއްހާ މީހުން ވަނީ މިއަދު ޕީޕިއެމާ ގުޅިފަ އެވެ. އޭގެ ތެރޭގައި ޖެންޑާ މިނިސްޓްރީގެ ސީނިއާ އެގްޒެކްޓިމް މަގާމުގައި ހުންނެވި ޝަރީފް އަހުމަދާއި މި ސަރުކާރުގެ ސީނިއާ ޕޮލިސީ ޑިރެކްޓަރުގެ މަގާމުގައި ހުންނެވި ރިފާއަތު ރަޝީދު ހިމެނެ އެވެ.

މި ރަށުގައި ބޭއްވި ޖަލްސާގައި ވަރަށް ކުރުކޮށް ވާހަކަ ދައްކަވަމުން މުއިއްޒު ވަނީ ތަރައްގީ ގެނައުމަށް ވެފައިވާ ހުރިހާ ވައުދެއް ފުއްދައިދޭނެ ކަމުގެ ޔަގީންކަން ވިލިނގިލީގެ ރައްޔިތުންނަށް ދެއްވައިފަ އެވެ. އަދި، ފުރަތަމަ ބުރުގައި މި ރަށުން ހޯދި އަޣްލަބިއްޔަތަށް ވުރެ ބޮޑު ތާއީދެއް ދެ ވަނަ ބުރުގައި ދޭނެ ކަން ގަބޫލުކުރައްވާ ކަމަށާއި ވަރަށް އަވަހަށް މި ރަށު ރައްޔިތުންނާ ބައްދަލުކުރައްވަން ވަޑައިގަންނަވާނެ ކަމަށް ވެސް މުއިއްޒު ވިދާޅުވި އެވެ.