އެމްޑީޕީގެ ކޮންމެ ވެރިކަމެއްގައި ރާއްޖެ ފަހަތަށް ސޮއްސާލާ: ކެޕްޓަން އަމީން

ފާއިތުވި އަހަރުތަކުގައި ރާއްޖެ ކުރިއަރަމުން އައިސް 2018 ވަނަ އަހަރު ނިމުނު އިރު ދިވެހިން ތިބީ އިންގިލާބީ ބަދަލެއްގެ ބިންގަލުގެ މަތީގައި ކަމަށް ވިޔަސް، މި އަހަރު ނިމޭއިރު، އެ ބިންގާ މުޅި ފުނޑުފުނޑު ވެފައިވާ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕެއިން މެނޭޖަރު ކެޕްޓަން މުހައްމަދު އަމީން ވިދާޅުވެއްޖެ އެވެ.

ރިޔާސީ އިންތިހާބުގެ ދެ ވަނަ ބުރުގައި ވޯޓު ލާން މާދަމާ ދިވެހިން ނުކުންނަ އިރު، ރައްޔިތުންނަށް ކުރެއްވި އިލްތިމާސެއްގައި އަމީން ވިދާޅުވީ ރާއްޖޭގެ ސިޔާސީ މާޒީ އަށް ބަލާ އިރު، އެމްޑީޕީން ވެރިކަން ކުރި ކޮންމެ ދައުރެއްގައި ގައުމު ފަހަތަށް ސޮއްސާލައި، ރައުސުލްމާލު ބަނގުރޫޓުވެ، އުމްރާނީ ވަސީލަތްތައް ވީރާނާވެ، ސިޔާދަތާއި މިނިވަން ކަމަށް ލޮޅުން އަރާ ކަމަށެވެ.

"ނިމެމުންމިދާ ދައުރުގެ ހިތި ހަގީގަތަކީ ވެސް އެއީ އެވެ. ބިނާކުރެވުނު މުއައްސަސާތަކާއި އިންފްރާސްޓްރަކްޗާ ވީރާނާ ވެއްޖެ އެވެ. ދިވެހި ދައުލަތުގެ މުޅި ރައުސުލްމާލު ބަނގުރޫޓުވުމުގެ ތުންފަތްމަތީގަ އެވެ. އިގުތިސޯދީ މިނިވަންކަމާއި ސިޔާދަތީ މުސްތަގިއްލުކަން އެކީ ގެއްލިއްޖެ އެވެ،" އަމީން ނެރުއްވި ބަޔާނުގައި ވިދާޅުވި އެވެ.

"ދިވެހިންގެ ކަންކަން ދިވެހިން އަމިއްލައަށް ނިންމުމުގެ ބާރު ދޫވެއްޖެ އެވެ. އަލިވިލެމުން މި ދާ އާ ދައުރާ އެކު، މި ހުރިހާ ކަމެއް ސުމަކުން ފަށަން ޖެހުން ވަރަށް ގާތެވެ."

އެކަން އެ ގޮތަށް ވާން އެއްވެސް ދިވެއްސަކު ބޭނުންނުވާނެ ކަން ޔަގީންކުރައްވައި އަމީން ވިދާޅުވި ގޮތުގައި ރާއްޖޭގެ ހަގީގީ މަގާމަށް އުފުލައިލުމުގެ ހިތްވަރާއި އަޒުމާއި އުއްމީދު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުއިއްޒާއި ރަނިންމޭޓު ހުސެއިން މުހައްމަދު ލަތީފްގެ ކިބައިގައި އެބަހުއްޓެވެ.

އެހެންކަމުން، އެކަން ހާސިލުކުރުމަށްޓަކައި މާދަމާ ހުރިހާ އެންމެން ވެސް ނުކުމެ ޑރ. މުއިއްޒަށް ވޯޓު ދިނުމަށް އަމީން އިލްތިމާސް ކުރެއްވި އެވެ.

ދެ ވަނަ ބުރުގެ ކެމްޕެއިން މިއަދު ހަވީރު ހައެއް ޖަހާއިރު ނިންމާލައި ވޯޓުލުން ފަށާނީ މާދަމާ ހެނދުނު އަށެއް ޖަހާއިރު އެވެ. ވޯޓު ލުން ނިންމާ ގަޑިއަކީ މާދަމާގެ ހަވީރު ފަހެއް ޖަހާއިރެވެ.

ދެ ވަނަ ބުރުގައި ވާދަކުރައްވަނީ މުއިއްޒާއި އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހެވެ. ފުރަތަމަ ބުރުގައި މުއިއްޒު 101،635 ވޯޓު ހޯއްދެވިއިރު، ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86،161 ވޯޓެވެ.