ނަޔަންތާރާ އަށް ބަންސާލީގެ ފިލްމަކުން ރޯލެއް ލިބިއްޖެ

ބޮލީވުޑްގެ ކުޅަދާނަ ޑައިރެކްޓަރު ސަންޖޭ ލީލާ ބަންސާލީގެ ފިލްމަކުން ނަޔަންތާރާ އަށް ރޯލެއް ލިބިއްޖެ އެވެ.

ދެކުނު އިންޑިއާގެ ސިނަމާގައި މަސައްކަތް ކުރާ ނަޔަންތާރާގެ ފުރަތަމަ ބޮލީވުޑް ފިލްމު "ޖަވާން" އަށް ފަހު އޭނާގެ މަގުބޫލު ކަން މިހާރު ވަނީ އިތުރުވެފަ އެވެ. ޝާހުގެ "ޖަވާން" އަށް ލިބުނު ބޮޑު ކާމިޔާބީ އަށް ފަހު އެ ފިލްމުގައި މަސައްކަތް ކުރި އެކި އެކްޓަރުންނަށް އޮފާތައް އަންނަނީ ލިބެމުންނެވެ.

ރިޕޯޓްތައް ބުނި ގޮތުގައި، ނަޔަންތާރާ އަށް ފުރުސަތު ލިބުނީ ބަންސާލީގެ ކުރިއަށް އޮތް ފިލްމު "ބައިޖޫ ބަވްރާ"ގެ ރޯލެއް ކުޅުމަށެވެ. އެ ރޯލާ ގުޅޭ ގޮތުން ބަންސާލީ އާއި ނަޔަންތާރާ މިހާރު އަންނަނީ މަޝްވަރާ ކުރަމުން ކަމަށް ވެސް ރިޕޯޓްތައް ބުންޏެވެ.

ބަންސާލީގެ ފިލްމެއްގައި މަސައްކަތް ކުރަން ފުރުސަތު ލިބުމަކީ ވަރަށް ބޮޑު ފަހުރެއް ކަމަށް ގިނަ ތަރިން ގަބޫލުކުރާތީ، އެ ރޯލު ކުޅެން ނަޔަންތާރާ އެއްބަސްވާނެ ކަމަށް ރިޕޯޓްތައް ބުންޏެވެ.

"ބައިޖޫ ބަވްރާ"ގެ ކާސްޓު އަދި އިއުލާން ނުކުރެ އެވެ. ނަމަވެސް ކުރިން ރިޕޯޓްތައް ބުނި ގޮތުގައި، އެ ފިލްމުގައި ލީޑު ރޯލު ކުޅޭނީ ރަންވީރު ސިންހު އާއި އާލިއާ ބަޓެވެ.

އެ ފިލްމު އަންނަ އަހަރު ގެނެސްދޭން ނިންމާފައި ވާއިރު، ބަންސާލީ އަންނަނީ ނެޓްފްލިކްސްއާ ގުޅިގެން "ހީރާމަންޑީ" ކިޔާ ވެބް ސީރީޒެއްގެ މަސައްކަތް ވެސް ކުރަމުންނެވެ.