"ލަވް އެންޑް ވޯ"އަށް ރަންބީރު 12 ކިލޯ، ވިކީ 15 ކިލޯ ލުއިކޮށްލައިފި

ކުޅަދާނަ ޑައިރެކްޓަރު ސަންޖޭ ސީލާ ބަންސާލީގެ ކުރިއަށް އޮތް ފިލްމު "ލަވް އެންޑް ވޯ"ގައި ކުޅޭ ރޯލަށް ރަންބީރް ކަޕޫރާއި ވިކީ ކައުޝަލް ވަރަށް ބޮޑަށް ބަރުދަން ލުއިކޮށްލައިފި އެވެ.

ރިޕޯޓްތައް ބުނި ގޮތުގައި، މިހާރު މަންޒަރުތައް ނަގަމުން އަންނަ އެ ފިލްމަށް ތައްޔާރުވުމަށް ރަންބީރު ވަނީ 12 ކިލޯ ލުއިކޮށްލައިފަ އެވެ. އަދި ވިކީ ވަނީ 15 ކިލޯ ލުއިކޮށްލައިފަ އެވެ. މި ފިލްމަށް ތައްޔާރުވުމަށް އެ ދެ ތަރިންގެ ހަށިގަނޑަށް ވެސް ވަރަށް ބޮޑު ބަދަލެއް ގެނެސްފައިވެ އެވެ.

މި ފިލްމުގެ މަންޒަރުތައް ނަގަން އެކަނި، މިދިޔަ އަހަރު ފަހުކޮޅުން ފެށިގެން މި އަހަރުގެ ނިޔަލަށް 200 ދުވަސް ވިކީ ދޭން ނިންމާފައިވާ ކަމަށް ރިޕޯޓްތައް ބުންޏެވެ.

"ލަވް އެންޑް ވޯ"އަކީ ވިކީ ކުޅޭ ބަންސާލީގެ ފުރަތަމަ ފިލްމެވެ.

މި ފިލްމުގެ މަންޒަރުތައް ނަގާ ނިމޭނީ މި އަހަރު ފަހުކޮޅުގައި ކަމަށް ރިޕޯޓްތައް ބުންޏެވެ.

ބަންސާލީގެ "ލަވް އެންޑް ވޯ"ގެ ލީޑު އަންހެން ތަރިއަކީ އާލިއާ ބަޓެވެ.

މިއީ ބަންސާލީގެ ފިލްމަކުން އާލިއާ އާއި ރަންބީރް ފެންނާނެ ދެވަނަ ފަހަރެވެ. އޭނާ އެންމެ ފަހުން ގެނެސްދިން ފިލްމު "ގަންގޫބާއީ ކަތިއަވާޑީ"ގައި ލީޑު ރޯލު ކުޅުނީ އާލިއާ އެވެ. އަދި އޭނާ 2007 ވަނަ އަހަރު ގެނެސްދިން "ސާވަރިޔާ" އަކީ ރަންބީރް ފިލްމީ ދާއިރާއަށް ތައާރަފުވި ފިލްމެވެ.

"ގަންގޫބާއީ ކަތިއަވާޑީ"އަށް ފަހު ބަންސާލީ ގެނެސްދިނީ "ހީރާމަންޑީ" ކިޔާ ސީރީޒެކެވެ. ނެޓްފްލިކްސް އިން މިދިޔަ އަހަރު ގެނެސްދިން އެ ސީރީޒަށް ބޮޑު ތަރުހީބެއް ލިބި، ދެވަނަ ސީޒަނެއް ވެސް ވަނީ އިއުލާންކޮށްފަ އެވެ.

"ލަވް އެންޑް ވޯ" ސިނަމާތަކަށް ގެންނަނީ އަންނަ އަހަރު މާޗު 20 ގަ އެވެ.