މުބާރާތްތައް ބާއްވަން އެފްއޭއެމުން ބޭނުންވާ ތަކެތި ވާނީ ހަވާލުކޮށްފައި: ޕޮލިސް

އެފްއޭއެމަށް ލިބޭ ފައިސާއަށް ހިޔާނާތްތެރިވާ ކަމަށް ތުހުމަތުކުރެވޭ މައްސަލައިގެ ތަހުގީގަށް ފުލުހުން އެފްއޭއެމަށް ވަދެ ގެންދިޔަ ތަކެތީގެ ސަބަބުން އެތަން ހިންގުމަށް ދަތިވެ މުބާރާތްތައް ވެސް ބޭއްވެން ނެތް ކަމަށް ބުނުމުން އެފްއޭއެމުން އެދުނު ތަކެތި ވަގުތުން ހަވާލުކޮށްފައިވާ ކަމަށް ފުލުހުން ބުނެފި އެވެ.

ޕްރޮސިކިއުޓާ ޖެނެރަލްގެ އަމުރަށް ފުލުހުން ތަހުގީގު ފަށައި މިދިޔަ މަހުގެ 22 ވަނަ ދުވަހު އެފްއޭއެމަށް ފުލުހުން ވަނުމާ ގުޅިގެން އެފްއޭއެމުން ނެރުނު ނޫސްބަޔާނުގައި ބުނީ ގިނަ އަދަދެއްގެ ލިޔެކިޔުމާއި މަސައްކަތުގެ މާހައުލުގައި ކޮންމެހެން ބޭނުންކުރަން ޖެހޭ އެތަކެއް އާލާތްތަކެއް ފުލުހުންގެ ތަހުގީގަށް ގެންގޮސްފައިވާ ކަމަށެވެ. އެހެންވެ އެފްއޭއެމްގައި ދުވަހުން ދުވަހަށް ކުރަން ޖެހޭ މަސައްކަތްތަކަށް ބުރޫއަރައި ހުއްޓުމަކަށް އައިސްފައިވާ ކަމަށް ބުންޏެވެ.

"... މިހާލަތުގައި ފުޓްބޯޅަ ލީގާއި ރޭވިފައި ހުރި އެނޫން ވެސް އެހެނިހެން މުބާރާތްތައް ކުރިއަށް ގެންދިޔުމަކީ ކުރެވޭނެ ކަމެއް ނޫން" ކަމަށް ވެސް އެ ބަޔާނުގައިވެ އެވެ.

"މިހާރު" ގެ "މެދުސަފުހާ" އަށް ދެއްވި ފުލުހުންގެ އެސިސްޓެންޓް ކޮމިޝަނަރު އޮފް ޕޮލިސް މުހައްމަދު ރިޔާޒް ވިދާޅުވީ އެފްއޭއެމްގެ ބަޔާނާ އެކު ފުލުހުން ވާނީ މުބާރާތްތައް ކުރިއަށް ގެންދިއުމަށް ބޭނުންވާ އަދި އިދާރީ ހިންގުންތަކަށާއި މުބާރާތްތައް ބާއްވަން ދަތިވާ އެއްވެސް އެއްޗެއް ފުލުހުންގެ ބެލުމުގެ ދަށަށް ގެނެވުނުތޯ ބަލައި، އެފްއޭއެމުން އެދުނު ސާމާނު ވަގުތުން ހަވާލުކޮށްފައި ކަމަށެވެ.

ރިޔާޒް ވިދާޅުވީ ފުލުހުންގެ ތަހުގީގާ ގުޅިގެން، އެފްއޭއެމް ނުވަތަ އެ އިދާރާއިން ހިންގާ އެއްވެސް މުބާރާތެއް ކުރިއަށް ގެންދަން ހުރަހެއް މެދުވެރިވެގެން ނުވާނެ ކަމަށެވެ. އެފްއޭއެމްގެ ބަޔާނާ ގުޅިގެން ފުލުހުން އިސްވެ އެފްއޭއެމާ ވާހަކަ ދައްކައިގެން އެފަދަ އެއްޗެއް ފުލުހުންގެ ބެލުމުގެ ދަށަށް ގެނެވިފައި ވޭތޯ ބެލި ކަމަށް އޭނާ ވިދާޅުވި އެވެ. އަދި އެފްއޭއެމުން އެދުނު ކޮމްޕިއުޓަރު ހާޑްޑިސްކުގެ އިމޭޖް އެކްސްޓްރެކްޝަން ހެދުމަށް ފަހު ވަގުތުން އެފްއޭއެމާ ހަވާލުކޮށްފައި ވާނެ ކަމަށް ވިދާޅުވި އެވެ.

"ފުލުހުން ހިފެހެއްޓި ތަކެއްޗާ ގުޅިގެން އެފްއޭއެމްގެ ހިންގުމަށް ނުވަތަ އެފްއޭއެމް އިން ރާވާ މުބާރާތްތައް ހިންގުމަށްވެސް އެއްވެސް ހުރަހެއް މެދުވެރިވާން ޖެހޭ ހާލަތެއް ނެތް،" ރިޔާޒް ވިދާޅުވި އެވެ.

އެފްއޭއެމަށް ބޭރުން ލިބޭ ފައިސާ ނަހަމަ ގޮތުގައި ބޭނުންކުރާ ކަމަށް ތުހުމަތުކުރެވޭ މައްސަލައިގެ ތަހުގީގާ ގުޅޭ ގޮތުން އެފްއޭމުން ދެއްކި ވާހަކައަށް އިޝާރާތްކުރައްވައި ރިޔާޒް ވިދާޅުވީ މިއީ މާލީ މުއާމަލާތްތަކުގެ ކިތާބީ ހެކިތަކުގެ މައްޗަށް ހިންގާ ތަހުގީގެއް ކަމަށާއި އެހެންވެ މިއީ ޒާތީ ކަމެއްގެ ގޮތުގައި ސިފަކުރަން ޖެހޭ އެއްވެސް ސަބަބެއް ނެތް ކަމަށެވެ.

ރިޔާޒް ވިދާޅުވީ މި ތަހުގީގަކީ ސީދާ އެފްއޭއެމްގެ މައްޗަށް ހިންގާ ތަހުގީގެއް ނޫން ކަމަށާއި މިއީ އެފްއޭއެމްގެ ރައީސް ބައްސާމް އަދީލް ޖަލީލް ހިމެނޭހެން އިދާރާގެ ބައެއް އެހެން ފަރާތްތަކުގެ މައްޗަށް ފަރުދީގޮތުން ތުހުމަތުކުރެވޭ ޖިނާއީ ކުށްތަކެއްގެ ތަހުގީގެއް ކަމަށެވެ. އެ އިދާރާއަށް ވަދެ ބަލައި ފާސްކުރަން ޖެހުނީ ތަނުގެ ލިޔެކިޔުންތަކާއި ޑިޖިޓަލް ވަސީލަތްތަކުގައި މައްސަލަތަކާ ގުޅޭ ހެއްކާއި ގަރީނާ ލިބެން ހުރި ކަމަށް ގަބޫލުކުރެވޭ އެކަށީގެންވާ ސަބަބުތަކެއް ހުރުމުން ކަމަށް ވެސް ވިދާޅުވި އެވެ.

ތަހުގީގުގައި މިހާތަނަށް ކުރި މަސައްކަތުން، އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާކަން އޭގެ ސާފު ކިތާބީ ހެކި ބޭންކް ސްޓޭޓްމަންޓްތަކުން ފެންނަން އެބަހުރި ކަމަށާއި މި މުއާމަލާތްތައް ތަފްސީލީ ގޮތެއްގައި ބަލަންޖެހޭތީ ޕްރޮސެކިއުޓާ ޖެނެރަލްގެ ލަފަޔާ އެކު ހާއްސަ އޮޑިޓެއް ހަދަން ވެސް ފުލުހުން ވަނީ ރަސްމީކޮށް އެދިފައިވާ ކަމަށް އޭނާ ވިދާޅުވި އެވެ.

ފުލުހުން މިހެން ބުނި ނަމަވެސް ބައްސާމް ވަނީ މި ހުރިހާ ތުހުމަތުތަކަށް ވެސް އިންކާރު ކުރައްވައިފަ އެވެ. އޭނާ ވިދާޅުވީ އަމިއްލަ އެކައުންޓަށް އަދި އެފްއޭއެމްގެ އިސް އެހެން މީހެއްގެ އެކައުންޓަށް ވެސް ސައްހަ ނޫން ގޮތެއްފައި ފައިސާ ފޮނުވައި އަމިއްލަ ކަންކަމަށް ބޭނުންކޮށްފައި ނުހުންނާނެ ކަމަށެވެ.