ޖަމީލް ހެއްދެވީ އިތުރުފުޅެއް، ޔާމީން އަޅުގަނޑަށް ނުގުޅުއްވާ، މެސެޖެއް ވެސް ނުކުރައްވާ: އަބްދުއްރަހީމް

ކުރީގެ ރައީސް އަބްދުﷲ ޔާމީންގެ ފޯން ކޯލްތަކަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ ޖަވާބު ނުދެއްވާ ކަމަށް ވިދާޅުވެ، ޔާމީންގެ އިސް ގާނޫނީ ވަކީލު ޑރ. މުހައްމަދު ޖަމީލް އަހުމަަދު ހެއްދެވީ އިތުރުފުޅެއް ކަމަށް އަބްދުއްރަހީމް މިއަދު ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރުގެ މަގާމު ވެސް ފުރުއްވާ އަބްުދުއްރަހީމް "މިހާރު" އަށް އެހެން ވިދާޅުވީ، ޕީޕީއެމްގެ ލީޑަޝިޕާ މެދު ޔާމީން ހިތްހަމަޖެހިވަޑައިނުގެން އެ ޕާޓީ ދޫކުރެއްވި މައިގަނޑު އެއް ސަބަބަކީ އެ ބޭފުޅުން ޔާމީންގެ ކޯލްތަކަށް ޖަވާބު ނުދެއްވުން ކަމަށް ޖަމީލް ވިދާޅުވުމުންނެވެ. މަޝްވަރާ ނުކުރެއްވުން ކަމަށެވެ. އޭގެ ތެރޭގައި އަބްދުއްރަހީމްގެ ނަން ވެސް ޖަމީލް ވިދާޅުވި އެވެ.

އެކަމަކު، އެ ވާހަކަތައް ދޮގުކުރައްވަމުން އަބްދުއްރަހީމް ވިދާޅުވީ، ރައީސް ޑރ. މުއިއްޒަށް ވެރިކަން ލިބުނު ދުވަހުގެ ފަހު ދުވަހު ޔާމީން ޖަލުން ގެ އަށް ބަދަލުކުރި ފަހުން ޔާމީންގެ ކޯލެއް ވެސް އަދި މެސެޖެއް ވެސް ލިބިވަޑައިނުގަންނަވާ ކަމަށެވެ.

"އެހެންވީމާ، އެއީ ކަނޑައެޅިގެން ޖަމީލް ހެއްދެވި އިތުރުފުޅެއް،" އޭނާ ވިދާޅުވި އެވެ.

ޕީޕީއެމްގެ ލީޑަޝިޕާއި ޔާމީނާ އެއްވެސް ގުޅުމެއް ނެތް ކަމަށް ވިދާޅުވެ، ޖަމީލް ދެއްކެވި ވާހަކަތަކާ ވެސް އަބްދުއްރަހީމް ދެކޮޅެވެ. ވިދާޅުވީ، ޕީޕީއެމްގެ ދެ ނައިބު ރައީސުން ކަމަށްވާ މިހާރުގެ ފިޝަރީޒް މިނިސްޓަރު އަހުމަދު ޝިޔާމާއި ޑިފެންސް މިނިސްޓަރު މުހައްމަދު ޣައްސާން މައުމޫން ވެސް ދާދިފަހަކާ ޖެހެންދެން ޔާމީނާ މުއާމަލާތު ކުރެއްވި ކަމަށެވެ. އަދި ޝިޔާމް ޕީޕީއެމްގެ އޮފީހަށް ވަޑައިގެން މަސައްކަތް ކުރައްވާ ކަމަށް އަބްދުއްރަހީމް ވިދާޅުވި އެވެ.

"އެކަމަކު އަޅުގަނޑަށް [ޔާމީން] ނުގުޅުއްވާތީ އަޅުގަނޑެއް ނުގުޅަން. އަޅުގަނޑަށް [ޔާމީން] މެސެޖެއް ނުކުރައްވާތީ އަޅުގަނޑެއް މެސެޖެއް ނުކުރަން،" ފޮނަދޫ ދާއިރާގެ ކުރީގެ މެމްބަރު ވިދާޅުވި އެވެ.

އަބްދުއްރަހީމް އިސްވެ ނުގުޅުއްވާ ސަބަބު!

ޔާމީންގެ ފޯންކޯލެއް ނުވަތަ މެސެޖެއް މިދިޔަ ދެ މަހެއްހާ ދުވަހު ލިބިވަޑައިނުގަތަސް އަމިއްލަ އަށް ޔާމީނަށް ނުގުޅުއްވަނީ ސަބަބުތަކެއް ހުރެގެން ކަމަށް ވިދާޅުވި އެވެ.

ހަވާލާ ދެއްވީ ޔާމީން ފުރަތަމަ ޖަލުން މިނިވަންވުމުން ކާނިވާ ސަރަހައްދުގައި ބޭއްވި ޖަލްސާގައި އަބްދުއްރަހީމާ ބެހޭ ގޮތުން ޔާމީން ދެއްކެވި ވާހަކައަށެވެ.

"އެ ރޭ [ޔާމީން] ވިދާޅުވީ، ތިމަންނަގެ ސިޔާސީ އެންމެ ގާތް އަހު، ތިމަންނަ އެންމެ އިތުބާރުކުރާ، ތިމަންނައާ އެކު ސިޔާސީ މަސައްކަތުގައި އެންމެ ގިނަ ދުވަސްވީ، އެ ތިން ޖުމުލަ ބޭނުންކުރައްވާފައި [ޔާމީން] އަޅުގަނޑަށް އެޑްރެސް ކުރެއްވީ. އެހެންވީމާ އެހާ އިތުބާރު ކުރެއްވި، އެހާ ގިނަ ދުވަހު އެކުގައި މަސައްކަތް ކުރި ބޭފުޅަކު ހަވާލުކުރެއްވި މަސްއޫލިއްޔަތުތައް އަދާކުރަނިކޮށް ކުއްލިއަކަށް ގުޅުން ކަނޑާލީމާ ފަސޭހައެއް ނޫން،" އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވި ގޮތުގައި، އޭނާއާ ގުޅޭ ގޮތުން އެކި މީސްމީހުން ކައިރީގައި ވެސް ޔާމީން ވަނީ ނޭދެވޭ ވާހަކަތައް ދައްކަވައިފަ އެވެ. އަބުރަށް ހުތުރުވާ އެތައް ވާހަކަތަކެއް ޔާމީން އެކި މީސްމީހުން ކައިރީގައި ދެއްކެވި ކަމަށް އަބްދުއްރަހީމް ތުހުމަތު ކުރައްވަ އެވެ.

"އެހެންވީމާ އަޅުގަނޑު އިސްވެ [ޔާމީނަށް] ގުޅުމުގެ ބޭނުމެއް ނެތް ކަމަށް އަޅުގަނޑަށް ފެނުނީ. އެކަން [އަބްދުއްރަހީމްގެ ނޭދެވޭ ކަންކަން] ކުއްލިއަކަށް ބާވައޭ އަޅުގަނޑު ހިތަށް އަރަނީ ރައީސް ޔާމީނަށް އެނގިވަޑައިގަތީ. ވިއްސަކަށް އަހަރު ރައީސް ޔާމީނާ އެކު ސިޔާސީ މަސައްކަތް ކޮށްފިން،" އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވި ގޮތުގައި، ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ޕީޕީއެމް/ޕީއެންސީ ގުޅިގެން ވާދަކުރުމާ މެދު ގޮތެއް ނިންމަން ރައީސް ޑރ. މުއިއްޒުގެ އެދިވަޑައިގަތުމަކަށް އެ ކޯލިޝަންގެ ފަސް މެމްބަރުންގެ ޓީމެއް ޔާމީންގެ އަރިހަށް ދިޔަ އެވެ. މަޖިލިހުގެ އިންތިހާބަށް ދެ ޕާޓީ އެކުގައި ޕްރައިމަރީ ބާއްވަން ކަނޑައަޅައި އެ ދުވަހަކީ އަންނަ އަހަރުގެ ޖެނުއަރީ 20 ކަމަށް އެއްބަސްވީ ވެސް އެ ބައްދަލުވުމުގެ މަޝްވަރާގައި ކަމަށް އަބްދުއްރަހީމް ވިދާޅުވި އެވެ.

ޔާމީންގެ އަރިހަށް ވަޑައިގަތް ޓީމުގައި ހިމެނެނީ އަބްދުއްރަހީމް ވިދާޅުވި ގޮތުގައި ޝިޔާމާއި ޕީއެންސީގެ ނައިބު ރައީސް އިބްރާހިމް ޝުޖާއު އާއި ޕީއެންސީގެ ނައިބު ރައީސް އަދި ލޯކަލް ގަވަމެންޓް މިނިސްޓަރު އާދަމް ޝަރީފާއި މަހިބަދޫ ދާއިރާގެ މެމްބަރު އަހުމަދު ތޯރިގް (ޓޮމް) ހިމެނެ އެވެ.

"އެ ބޭފުޅުން ވިދާޅުވި، ރައީސް ޔާމީން ވިދާޅުވިއޭ ތިމަންނަ އަށް ވެސް އެންމެ ރަނގަޅޭ އެ ގޮތް. އެހެންވީމާ އަޅުގަނޑު ގަބޫލު ކުރަނީ މަޝްވަރާ ކުރިއަށް ގެންދިޔައޭ،" ޕީޕީއެމް/ޕީއެންސީގެ ލީޑަޝިޕްގެ އެންމެ އިސް ބޭފުޅާ ވިދާޅުވި އެވެ.

ޔާމީން، ޕީޕީއެމް ދޫކުރެއްވުމުން އަބްދުއްރަހީމް ވިދާޅުވީ، "ކަންކަން މިހާރު ވަރަށް ސާފު" ކަމަށާއި މަޖިލިސް އިންތިހާބުގައި ޕީޕީއެމް/ޕީއެންސީ ނުކުންނާނީ އެއްކޮށް ކަމަށެވެ.

އަޅުގަނޑަށް ހީވަނީ ޕީޕީއެމް/ޕީއެންސީގެ މެމްބަރުންނަށް ވެސް މިވީ ފަސޭހައޭ ވޯޓުލާން. އެއީ އޮޅުމެއްގެ ތެރޭގައި ތިބޭކަށް ނުޖެހޭނެ. ކެންޑިޑޭޓަކީ ކޮބައިކަން ނޭނގިގެން ތިބޭކަށް ނުޖެހޭނެ،" އަބްދުއްރަހީމް ވިދާޅުވި އެވެ.

ޔާމީން ނެތަސް މާ ބޮޑު އުނދަގުލެއް ނެތް

އަބްދުއްރަހީމް ދެކެވަޑައިގަންނަވާ ގޮތުގައި ޕީޕީއެމް/ޕީއެންސީގެ މެމްބަރުންނާ އެކު ޔާމީން ނެތަސް މަޖިލިސް އިންތިހާބަށް މާ ބޮޑު އުނދަގުލެއް ނުވާނެ ކަމަށެވެ. ކުރިން ވެސް ގަބޫލު ކުރެއްވި ގޮތަށް މަޖިލިހުގެ އަޣުލަބިއްޔަތު އެ ކޯލިޝަނަށް ލިބޭނެކަމުގެ ޔަގީންކަން އެބައޮތް ކަމަށް އޭނާ ވިދާޅުވި އެވެ.

ވިދާޅުވީ، ދިވެހިން ވޯޓު ދިނީ ރައީސް ޑރ. މުއިއްޒުގެ ވައުދުތަކާއި މެނިފެސްޓޯ އަށް ކަމަށެވެ.

"އެއްވެސް ހާލެއްގައި އަޅުގަނޑު ނުދަންނަވަން ރައީސް ޔާމީނަށް ތާއީދުކުރާ މީހުން ރައީސް ޑރ. މުއިއްޒަށް ވޯޓު ނުދެއެކޭ. އެކަމަކު، ޖުމުލަ ގޮތެއްގައި ދިވެހި ރައްޔިތުން އެ ބަލައިގަތީ ރައީސް ޑރ. މުއިއްޒުގެ މެނިފެސްޓޯ. އެ ތަންފީޒު ކުރުމަށް ފުރުސަތު ދެއްވީ ރައްޔިތުން. އެހެންވީމާ ރައީސް ޑރ. މުއިއްޒުގެ ކެބިނެޓާއި އެ މަނިކުފާނުގެ ޓީމާ އެކީގައި އަޅުގަނޑު ގަބޫލު ކުރަނީ މާ އުނދަގޫ ނުވެ ކުރިއަށް ދެވޭނެއޭ،" އަބްދުއްރަހީމް ވިދާޅުވި އެވެ.