އެންސްޕާގެ ސީއީއޯއަކަށް ހީނާ

ދައުލަތުގެ ހަރަދުގައި ބޭސްފަރުވާ އާއި އެހެނިހެން އެހީތެރިކަން ބޭނުންވާ މީހުންނަށް ފައިސާގެ އެހީ ފޯރުކޮށްދޭ އިދާރާ އެންސްޕާގެ ސީއީއޯގެ މަގާމަށް މީޑިއާގެ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރެއްވި ހީނާ ވަލީދު މިއަދު ހަމަޖައްސައިފި އެވެ.

އެންސްޕާގެ އެންމެ އިސްވެރިޔާގެ މަގާމަށް ޕީޕީއެމްގެ ތަރުޖަމާން ހީނާ ހަމަޖެއްސެވިއިރު އޭނާ ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި ފޮރިން މިނިސްޓްރީގެ ޕޮލިޓިކަލް ޑިރެކްޓަރުގެ މަގާމު ފުރުއްވައިފަ އެވެ. މީޑިއާއާ ގާތްގުޅުމެއް ބާއްވާ ހީނާ އެންމެ ގިނަ ދުވަހު މަސައްކަތް ކުރެއްވީ ޕީއެސްއެމް ނުވަތަ ޓީވީއެމްގަ އެވެ. އެ ތަނުގެ ޕްރެޒެންޓަރެއްގެ ގޮތުގައި ގިނަ ބައެއްގެ މަގުބޫލުކަން ހޯއްދަވައި، ޕީއެސްއެމް ދޫކުރެއްވިއިރު ހީނާ ހުންނެވީ އެގްޒެކެޓިވް އެޑިޓަރުގެ މަގާމުގަ އެވެ.

ހީނާ ވަނީ މީޑިއާގެ ދާއިރާ އިން މަތީ ތައުލީމު ވެސް ހާސިލް ކުރައްވައިފަ އެވެ.

އެންސްޕާގެ ސީއީއޯގެ މަގާމަށް ހަމަޖެއްސެވިއިރު މި ވަގުތު އޭނާ ހުންނެވީ އާލާސްކަންފުޅަކަށް ފަރުވާ ހޯއްދަވަން ރާއްޖެ އިން ބޭރުގަ އެވެ.

ދައުލަތުން ހިލޭ ބޭސްފަރުވާ ކޮށްދޭ ނިޒާމުގެ ހިދުމަތް ދޭ އާސަންދައިގެ މެނޭޖިން ޑިރެކްޓަރަކަށް ވެސް އާ ރައީސް ޑރ. މުހައްމަދު މުއިއްޒު ހަމަޖެއްސެވީ އަންހެންބޭފުޅެކެވެ. އެއީ އާސަންދަ ކުންފުނީގެ އެންމެ ފުރަތަމަ މުވައްޒަފު އާމިނަތު ޒީނިއާ އެވެ.

ޒީނިޔާ އެންމެ ފުރަތަމަ އާސަންދައާ ގުޅިވަޑައިގަތީ 2012 ވަނަ އަހަރު މެޑިކަލް ޑައިރެކްޓަރެއްގެ ގޮތުގަ އެވެ. އޭރު އެ ކުންފުނި ހިންގީ އެލައިޑުގެ ދަށުންނެވެ. އާސަންދަ ވަކި ކުންފުންޏެއްގެ ގޮތުގައި ހިންގަން ފަށާފައި ވަނީ 2014 ވަނަ އަހަރު އެވެ.

އެންސްޕާގެ ސީއީއޯއަކަށް އެންމެ ފަހުން ވެސް ހުންނެވީ އަންހެންބޭފުޅެކެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ދައުރު މި މަހުގެ 17 އަށް ހަމަވިއިރު އެ މަގާމުގައި ހުންނެވީ މަރިޔަމް ޝަފީގެވެ.