އެމްޓީސީސީގެ އެމްޑީއަކަށް ޒިޔާދު

އެމްޓީސީސީގެ ޗީފް އެގްޒެކެޓިވް އޮފިސަރު (ސީއީއޯ) އަދި މެނޭޖިން ޑިރެކްޓަރުގެ މަގާމަށް ކުރީގެ އެކި ސަރުކާރުތަކުގައި އިސް މަގާމުތައް ފުރުއްވި އަބްދުﷲ ޒިޔާދު އައްޔަންކޮށްފި އެވެ.

އޭނާ ވަނީ ކުރިން ހައުސިން ޓްރާންސްޕޯޓް އެންޑް އެންވަޔަރުމެންޓް މިނިސްޓްރީގެ ސީނިއާ އިންޖިނިއަރުކަމާއި ހައުސިން އެންޑް އިންފްރާސްޓްރަކްޗަ މިނިސްޓްރީ އާއި އެންވަޔަރުމެންޓް އެނާޖީ މިނިސްޓްރީގެ ސްޓޭޓް މިނިސްޓަރުކަން ކުރައްވައިފަ އެވެ.

އޭނާ މަތީ ތައުލީމަށް ކިޔަވައި ވިދާޅުވީ، އިންޖިނިއަރިން މެނޭޖްމަންޓުގެ ދާއިރާއިންނެވެ. ރާއްޖެ އާއި ރާއްޖެ އިން ބޭރުގެ އެކި ކުންފުނިތަކުގައި ވެސް ކުރިން މަސައްކަތް ކުރެއްވި ޒިޔާދު ކިޔަވައި ވިދާޅުވީ ބަހުރެއިން ޔުނިވާސިޓީންނެވެ.

އެމްޓީސީސީގެ ސީއީއޯ އަދި އެމްޑީކަން އެންމެ ފަހުން ކުރެއްވީ އާދަމް އާޒިމެވެ. އޭގެ ކުރިން މި ސަރުކާރުގައި ދެން އެ ދެ ދެ މަގާމު ފުރުއްވީ ހަސަން ޝާހެވެ.

މި މަހުގެ 17 ގައި މަގާމުގެ ހުވާކުރެއްވި ރައީސް ޑރ. މުހައްމަދު މުއިއްޒު މިއަދު ވަނީ ސަރުކާރު ހިއްސާވާ ގިނަ ކުންފުނިތަކަށް މެނޭޖިން ޑިރެކްޓަރުން އައްޔަން ކުރައްވައިފަ އެވެ.