ޕޮލިސް ކޮމިޝަނަރުގެ މަގާމަށް ޝުޖާއު އާއި ނަވީން ކުރިމަތިލައްވައިފި

ޕޮލިސް ކޮމިޝަނަރުގެ މަގާމަށް އެސިސްޓެންޓް ކޮމިޝަނަރު އަލީ ޝުޖާއު އާއި އެސިސްޓެންޓް ކޮމިޝަނަރު އިސްމާއިލް ނަވީން ކުރިމަތިލައްވައިފި އެވެ.

ހޯމް ލޭންޑް ސެކިއުރިޓީ މިނިސްޓަރު އަލީ އިހުސާން "މިހާރު" އަށް ވިދާޅުވީ ޕޮލިސް ކޮމިޝަނަރުގެ މަގާމަށް ހުށަހެޅުއްވުމުގެ މުއްދަތު މިއަދުގެ މެންދުރު 12 ޖެހުމާ ހަމައަށް ހުޅުވައިލުމުން ފޯމު ހުށަހެޅުއްވީ އޭސީޕީ ޝުޖާއު އާއި ނަވީން ކަމަށެވެ. އެހެންވެ، އެ ދެ ބޭފުޅުންގެ ނަން ޕޮލިސް ބޯޑަށް މިހާރު ފޮނުއްވާފައިވާ ކަމަށް އޭނާ ވިދާޅުވި އެވެ.

"ޕޮލިސް ބޯޑުން ބައްލަވާފައި ގޮތެއް ނިންމަވާނީ. އެއީ ފުދޭވަރެއްގެ ދިގު ޕްރޮސެސްއެއް،" މިނިސްޓަރު ވިދާޅުވި އެވެ.

ފުލުުހުންގެ ހިދުމަތުގެ ގާނޫނު ބުނާގޮތުން ޕޮލިސް ކޮމިޝަނަރު ކަމަށް ނަގަން ޖެހެނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކުގެ ބޭފުޅެކެވެ.

ޕޮލިސް ކޮމިޝަނަރުގެ މަގާމަށް ބޭފުޅަކު އައްޔަން ކުރަނީ އެ މަގާމަށް ކުރިމަތިލައްވާ ބޭފުޅުންނާ ޕޮލިސް ބޯޑުން އިންޓަވިއުކޮށް، ގާބިލްކަން ވަޒަން ކުރުމަށް ފަހު ކަމަށް ގާނޫނުގައި ވެ އެވެ. ޕޮލިސް ކޮމިޝަނަރު ކަމަށް ބޭފުޅަކު ކަނޑައަޅަނީ ގާނޫނުގައިވާ ގޮތުން ޕޮލިސް ބޯޑުން ވަޒަންކޮށް، މިނިސްޓަރަށް ހުށަހަޅާ ނަންތަކުގެ ތެރެއިން، މިނިސްޓަރުގެ ލަފާގެ މަތިން ރައީސުލްޖުމްހޫރިއްޔާ އެވެ.

ޕޮލިސް ކޮމިޝަނަރުގެ މަގާމު މިދިޔަ ނޮވެމްބަރު މަހުގެ 15 އިން ފެށިގެން ހުސްވީ އެ މަގާމުގައި ހުންނެވި މުހައްމަދު ހަމީދު ފުލުހުންގެ ހިދުމަތުން އެ ދުވަހު ރިޓަޔާ ކުރެއްވުމުންނެވެ. އެހެންވެ، އެކްޓިން ކޮމިޝަނަރުގެ މަގާމު މިހާރު ފުރުއްވަނީ އެސިސްޓެންޓް ކޮމިޝަނަރު ފަރުހާދު ފިކުރީ އެވެ.

އެނގިފައިވާ ގޮތުގައި މިދިޔަ ނޮވެމްބަރު 17 ގައި ވެރިކަމާ ހަވާލުވި ރައީސް ޑރ. މުހައްމަދު މުއިއްޒުގެ ސަރުކާރުން ޕޮލިސް ކޮމިޝަނަރަކު އައްޔަން ނުކޮށް މިހާ ހިސާބަށް ލަސްކުރީ ޕޮލިސް ބޯޑުން ދިން ލަފައަކަށް ބިނާކޮށް ފުލުހުންގެ ވަޒީފާއިން ވަކިކޮށްފައިވާ އޮފިސަރުންގެ ތެރެއިން އެސިސްޓެންޓް ކޮމިޝަނަރުގެ ރޭންކުގައި ހުންނެވި އަހުމަދު މުހައްމަދުގެ މައްސަލަ ޝަރުއީ މަރުހަލާ އިން ނިމޭ ގޮތެއް ބެލުމަށެވެ.

އެކަމަކު، މި މަހުގެ 13 ގައި ހައި ކޯޓުން ނިންމީ އަހުމަދު މުހައްމަދާ އެކު އިތުރު ހަތަރު އޮފިސަރަކަށް އަލުން ވަޒީފާ ދިނުން މަޑުޖައްސާލަން ހައި ކޯޓުން ނެރެފައިވާ ވަގުތީ އަމުރު މުރާޖައާ ކުރަންޖެހޭ ސަބަބެއް ނެތް ކަމަށެވެ.

އިސްތިއުނާފު ނިމެންދެން، ސިވިލް ކޯޓުގެ ހުކުމަށް އަމަލުކުރުން ފަސްކުރުމުގެ އަމުރެއް ހައި ކޯޓުން ކުރިން އޮތީ ނެރެފަ އެވެ. އެ އަމުރު މުރާޖައާ ކުރަން އެދުނީ ޖަމްޝީދާއި އަހުމަދު މުހައްމަދުގެ ފަރާތުންނެވެ. ދެން ތިބި އޮފިސަރުން އަދިވެސް ތިބީ ފުލުހުންގެ ވަޒީފާގަ އެވެ.

ހައި ކޯޓުން ނިންމި ނިންމުމުގައި ވަނީ އެ އަމުރު ނެރުނުއިރު އޮތް ހާލަތަށް އެއްވެސް ބަދަލެއް އައިސްފައިނުވާ ކަމަށެވެ. ދެން ތިބި އޮފިސަރުން ވަޒީފާގައި ތިބިއިރު، ޖަމްޝީދާއި އަހުމަދު މުހައްމަދަށް ވަޒީފާ ނުލިބި އޮތުމަކީ އެ އަމުރު މުރާޖައާ ކުރަންޖެހޭ ސަބަބެއް ނޫން ކަމަށް އެ ނިންމުމުގައިވެ އެވެ.