އިންފުލުއެންޒާ ޖެހިގެން 35 އަހަރުގެ މީހަކު ނިޔާވެއްޖެ

އިންފުލުއެންޒާ ޖެހިގެން ފަރުވާ ދެމުންދަނިކޮށް އިތުރު މީހަކު ރޭ ނިޔާވެއްޖެ އެވެ.

އައިޖީއެމްއެޗުން ބުނީ އިންފުލުއެންޒާއަށް ޕޮޒިޓިވްވެގެން ފަރުވާދެނިކޮށް ނިޔާވީ 35 އަހަރުގެ ދިވެހި އަންހެނެއް ކަމަށެވެ. އޭނާއަށް ފަރުވާދިނީ ވެންޓިލޭޓަރުގަ އެވެ.

އެ ހޮސްޕިޓަލުގައި އެތެރެހަށީގެ ބަލިތަކަށް ހާއްސަ ޑޮކްޓަރު، މުހައްމަދު އަލީ މީގެ ކުރިން ވިދާޅުވެފައި ވަނީ އިންފްލުއެންޒާ ޖެހުމުގެ ސަބަބުން ނިއުމޯނިއާ އަށް ހުށަހެޅުނު ތިން މީހަކަށް ވެންޓިލޭޓަރުގައި ފަރުވާ ދެމުން އަންނަ ކަމަށެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސްހިސާބުތައް ދައްކާ ގޮތުން މިދިޔަ ހަތަރު މަސް ތެރޭގައި އިންފްލުއެންޒާގެ 154 ކޭސް ރާއްޖެ އިން ފެނިފައިވެ އެވެ. އެންމެ ގިނައިން ފެނުނީ އިންފްލުއެންޒާގެ H1N1 އެވެ.

މި ދުވަސްވަރު ރާއްޖޭގައި އިންފްލުއެންޒާ ފެތުރޭ ވަރު އިތުރުވީ ސަރަހައްދީ ގައުމުތަކުގައި ވެސް އިންފްލުއެންޒާ އަދި ކޮވިޑް ފަދަ އަރިދަފުސް ރޯގާތައް އިތުރު ދުވަސް ވަރަކަށް ވެފައި ސްކޫލް ބަންދާ ދިމާކޮށް، ދަތުރުފަތުރު ކުރުން އިތުރުވާމާ ގުޅިގެން ކަމަށް އެޗްޕީއޭން ވަނީ ބުނެފަ އެވެ.

އިންފްލުއެންޒާގެ އަލާމާތްތައް:

- ހުން އައުން.

- ނޭފަތުން ފެން އައުން.

- ގައިން ވަރު ދެރަވުން.

- ބޮލުގައި ރިއްސައި ގައިގަ އާއި ކަރުގައި ރިއްސުން.

- ކެއްސުން

ޑޮކްޓަރުން ލަފާދޭ ގޮތުގައި ތިން ދުވަސް ވަސްދެން އެ އަލާމާތްތައް ފެންނަ ނަމަ ވީހާ ވެސް އަވަހަކަށް ޑޮކްޓަރަށް ދައްކަން ވާނެ އެވެ.