ކޮވިޑް ކޭސްތައް އިތުރުވާތީ ބައެއް ތަންތަނުން ރައްކާތެރިކަމުގެ ފިޔަވަޅުތައް އަޅައިފި

ރާއްޖޭގައި މި ދުވަސްވަރު ކޮވިޑް ޖެހޭ މީހުންގެ އަދަދު ދުވާލަކު 100 އިން މަތީގައި އުޅޭ ކަމަށް އެޗްޕީއޭގެ އެންމެ ފަހުގެ ތަފާސްހިސާބުތަކުން ދައްކާފައިވާއިރު، ބައެއް ތަންތަނުން އެ ބަލިން ރައްކާތެރިކަމުގެ ފިޔަވަޅުތައް އަޅަން ފަށައިފި އެވެ.

އައިޖީއެމްއެޗުން މިއަދު ބުނީ ކޮވިޑްގެ ކޭސްތައް މައްޗަށް ދާތީ، އިއްޔެ އިން ފެށިގެން އެ ހޮސްޕިޓަލުގައި ބަލި މީހުންނަށް ޒިޔާރަތް ކުރެވޭ ގަޑި އަށް ބަދަލު ގެނެސްފައިވާ ކަމަށެވެ. މިހާރު ބަލި މީހުންނަށް ޒިޔާރަތް ކުރެވޭނީ ކޮންމެ ދުވަހެއްގެ ހަވީރު 5 އިން ރޭގަނޑު 7 އަށް ކަމަށް އައިޖީއެމްއެޗުން ބުނެ އެވެ.

ރައްކާތެރިކަމުގެ ފިޔަވަޅެއްގެ ގޮތުން އެ ހޮސްޕިޓަލަށް ދާއިރު، މާސްކު އެޅުން މިއަދު ވަނީ މަޖުބޫރުކޮށްފަ އެވެ.

ވެލާނާ އިންޓަނޭޝަނަލް އެއާޕޯޓް ހިންގާ އެމްއޭސީއެލުން ވެސް ވަނީ އެ އެއާޕޯޓަށް ދާއިރު މާސްކު އަޅަން އިލްތިމާސްކޮށްފަ އެވެ. ބައެއް އެއާލައިންތަކުން ވެސް ބައިނަލްއަގްވާމީ ދަތުރުތަކަށް ދާއިރު މާސްކު އަޅަން އަންގައިފަ އެވެ.

ކޮވިޑް ޖެހޭ މީހުންގެ އަދަދު އިތުރުވާތީ އިތުރު ފިޔަވަޅުތަކެއް އަޅަން މަޝްވަރާ ކުރޭތޯ ސާފުކުރުމަށް އެޗްޕީއޭ އަށް ގުޅި ނަމަވެސް އަދި ވަކި ޖަވާބެއް ނުލިބެ އެވެ.

އެޗްޕީއޭއިން އިއްޔެ އާންމުކުރި ތަފާސްހިސާބުތައް ދައްކާ ގޮތުން މިދިޔަ ހަފުތާގައި 1،202 މީހަކަށް ކޮވިޑް ޖެހިފައިވެ އެވެ. އެއީ މާލެ ސަރަހައްދުން 528 މީހަކާއި ރަށްރަށުން 452 މީހަކާއި އަދި އެހެން ތަންތަނުން 222 މީހެކެވެ. މިދިޔަ ހަފުތާގައި 51 މީހަކު އެޑްމިޓުކޮށްގެން ފަރުވާދޭން ޖެހުނު ކަމަށް ބުންޏެވެ.

އެންމެ ގިނަ ކޭސްތައް ރިޕޯޓްކޮށްފައި މި މަހުގެ 22 ގަ އެވެ. އެ ދުވަހު 237 މީހަކަށް އެ ބަލި ޖެހުނެވެ. އެހެން ދުވަސްތަކުގައި ކޭސްތައް އުޅެނީ 100 އާއި 200 އާ ދެމެދުގަ އެވެ.

ފާއިތުވި ހަފުތާގައި ކޮވިޑް ބަލީގައި ތިން މީހަކު މަރުވި އެވެ. އޭގެ ތެރޭގައި 20 އަހަރުގެ ޒުވާނަކު ވެސް ހިމެނެ އެވެ. އެ ބަލީގައި މިހާތަނަށް ރާއްޖެއިން 305 މީހަކު މަރުވެފައިވެ އެވެ.