މި އަހަރު ސިޔާސީ ޕާޓީތަކަށް 44 މިލިއަން ރުފިޔާ، ޕީޕީއެމް/ޕީއެންސީ އަށް 18 މިލިއަން

ސިޔާސީ ޕާޓީތަކަށް ދައުލަތުގެ ބަޖެޓުން ދޭންޖެހޭ ފައިސާގެ ގޮތުގައި މި އަހަރު 44 މިލިއަން ރުފިޔާ ދޫކުރަން ހަމަޖެހިފައިވާ ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.

އީސީން އެކްސްގައި ކުރި ޕޯސްޓެއްގައި ބުނީ އެ ކޮމިޝަންގައި ރަޖިސްޓްރީކޮށްފައިވާ ސިޔާސީ ޕާޓީތަކުގެ ތެރެއިން މި އަހަރުގެ ބަޖެޓް، ރައްޔިތުންގެ މަޖިލީހުން ފާސްކުރި ދުވަހާ ހަމައަށް 10،000 މެމްބަރުން ހަމަވި ސިޔާސީ ޕާޓީތަކަށް ދޫކުރަން ކަނޑައަޅާފައި ވަނީ 44،099،905ރ. ކަމަށެވެ.

އެ ފައިސާ ޕާޓީތަކަށް ބަހާނެ ގޮތުގެ ތަފުސީލު ވެސް އީސީން މިއަދު ވަނީ އާންމުކޮށްފަ އެވެ.

މި އަހަރު އެންމެ ގިނަ އަދަދެއްގެ ފައިސާ ލިބެނީ ޕީޕީއެމް/ޕީއެންސީ ކޯލިޝަނަށެވެ. އެއީ 36،223 މެމްބަރުން ތިބި ޕީޕީއެމް އަށް ލިބޭ 10.5 މިލިއަން ރުފިޔާ އާއި 28،201 މެމްބަރުން ތިބި ޕީއެންސީ އަށް ލިބޭ 8.1 މިލިއަން ރުފިޔާއާ އެކު ޖުމްލަ 18 މިލިއަން ރުފިޔާ އެވެ.

އެއް ޕާޓީއަކަށް އެންމެ ގިނައިން ފައިސާ ލިބޭ ޕާޓީއަކީ މިހާރު މެމްބަރުން އެންމެ ގިނަ އެމްޑީޕީ އެވެ. އެ ޕާޓީއަށް 15.1 މިލިއަން ރުފިޔާ ލިބެ އެވެ. އެ ޕާޓީގައި 52،142 މެމްބަރުން އެބަ ތިއްބެވެ.

ޕާޓީތަކަށް ލިބޭ ފައިސާގެ އަދަދުތައް

• އެމްޑީޕީ - 15.1 މިލިއަން ރުފިޔާ

• އަދާލަތު ޕާޓީ - 2.5 މިލިއަން ރުފިޔާ

• ޖުމްހޫރީ ޕާޓީ - 5.3 މިލިއަން ރުފިޔާ

• ޕީޕީއެމް - 10.5 މިލިއަން ރުފިޔާ

• އެމްޑީއޭ - 2.5 މިލިއަން ރުފިޔާ

• ޕީއެންސީ - 8.1 މިލިއަން ރުފިޔާ

އެ ފައިސާ ދޫކުރަން ފަށާނެ ދުވަހެއް އަދި އީސީން ނުބުނެ އެވެ.

ސިޔާސީ ޕާޓީތަކުގެ ގާނޫނުގައިވާ ގޮތުން ކޮންމެ އަހަރެއްގެ ވެސް ދައުލަތުގެ ބަޖެޓުން 0.1 އާއި 0.2 ޕަސެންޓާ ދެމެދުގެ އަދަދެއް ޕާޓީތަކަށް ދޭން ޖެހެ އެވެ.