އިނގިރޭސިން ދުނިޔޭގެ އެއް ވަނައާ އެކު އަމްނާ ހއ. އަތޮޅު މަދަރުސާއަށް ހޯދައިދިން ކާމިޔާބީ

ހއ. ހޯރަފުށީ ގައި ހުންނަ، އަތޮޅު މަދަރުސާގެ ޕްރިންސިޕަލް ހުސެއިން ނައީމް އަހްމަދަށް އާދަޔާ ޚިލާފު އުފަލެއް ލިބުނު ނަތީޖާ އަކީ އެ ރަށުގެ ދަރިވަރަކަށް އިނގިރޭސި މާއްދާއިން މުޅި ދުނިޔެއިން އެއް ވަނަ ލިބުމެވެ. އޯ ލެވެލްގައި އެ ސްކޫލުން ރަނގަޅު ނަތީޖާ ހޯދަމުން އަޔަސް މިހާތަނަށް އެއްވެސް ދަރިވަރަކަށް ދުނިޔެއިން އެއް ވަނަ ލިބިފައި ނުވާތީ އެވެ.

އެކަމަކު މަރިޔަމް އަމްނާ ބަދަލުކޮށްލީ ސްކޫލުގެ ތާރީހެވެ. އެ ކާމިޔާބީއާ މެދު ޕްރިންސިޕަލް ވަރަށް ފަހުރުވެރިވެ އެވެ.

"ވަރަށް ކުރިން މި ރަށުގެ ދަރިވަރަކަށް ލިބުނު އާޓް މާއްދާއިން ދުނިޔެއިން 9 ވަނަ. މިފަހަރު، އަޅުގަނޑުމެން ވެސް މިކަހަލަ ނަތީޖާއެއް ލިބިދާނެ ކަމަށް އުއްމީދު ކޮށްގެން ތިއްބައެއް ނޫން މި ލިބުނީ،" އޭނާ ވިދާޅުވި އެވެ.

ޕްރިންސިޕަލް ވިދާޅުވި ގޮތުގައި މިދިޔަ އޮކްޓޫބަރު/ނޮވެމްބަރުގައި ބޭއްވި އޯ ލެވެލް ގައި ބައިވެރިވި މަރިޔަމް އަމްނާއަކީ ކިޔެވުމަށާއި ރަނގަޅު ނަތީޖާ ހޯދުމަށް ގަދައަޅައި މަސައްކަތް ކުރި ދަރިވަރެކެވެ.

އިނގިރޭސި މާއްދާއިން އެ ސްޓާ ހޯދަން މަސައްކަތްކުރި އަމްނާ ދުނިޔޭގެ އެއް ވަނާގައި ހިމެނުމަކީ އޭނާ އަށް ވެސް ލިބުނު އާދަޔާ ޚިލާފު އުފަލެކެވެ.

"އެއްވެސް ވަރަކަށް އުންމީދެއް ނުކުރަން މިކަހަލަ ނަތީޖާއެއް ލިބިދާނެ ކަމަކަށް. އެކަމަކު ޕޭޕަރު ހެދިއިރު އުންމީދު ކުރިން އޭ ސްޓާއެއް ލިބޭނެ ކަމަށް. އެއީ ގްރޭޑް9 ގައި ވެސް އަޅުގަނޑު އިންގްލިޝް އޯ ލެވެލްގައި ބައިވެރިވެ، އޭ ސްޓާއެއް ލިބުނީމަ. އެކަމު މިކަހަލަ ވަނައެއް ލިބޭނެ ކަމަކަށް ހިއެއް ނުކުރަން،" އަބަދުވެސް އިނގިރޭސި މާއްދާއަށް ޝައުގުވެރިކަން ހުންނަ އަމްނާ ބުންޏެވެ.

ސްކޫލުގެ ޕްރިންސިޕަލާއި ޓީޗަރުންގެ އިތުރުން އަމްނާއަށް ވެސް ހައިރާންވި ނަތީޖާއެއް އެ މާއްދާއިން ލިބުނު ނަމަވެސް އަމްނާ ގަބޫލުކުރާ ގޮތުގައި އޯލެވެލްގައި އޭނައަށް ލިބުނު ނަތީޖާ އަކީ އެންމެ ހިތްހަމަ ޖެހޭ ނަތީޖާއެއް ނޫނެވެ.

"ނަތީޖާ އެންމެ ރަނގަޅެއް ނޫން. އަޅުގަނޑު ކިޔަވަން ޖެހޭ ވަރަށް އަސްލު މަސައްކަތް ނުކުރެވުނީ ކަމަށް ވެސް ވެދާނެ،" އޭނާ ކިޔައިދިނެވެ.

ސްކޫލް ކެޕްޓަންގެ މަގާމުގައި ވެސް ހުރި އަމްނާ ބުނީ އޭނާ އުއްމީދުކުރީ އޯލެވެލް ގަދަ 10 ގައި ހިމެނުމަށެވެ. އެކަމަކު ނަތީޖާ ލިބުނުއިރު، އެވަރަށް ހުރިހާ މާއްދާއަކުން މަސައްކަތް ނުކުރެވުނީ ކަން ގަބޫލުކުރާ ކަމަށް އޭނާ ބުންޏެވެ.

އެންމެ ހިތްހަމަ ޖެހޭ ވަރަށް މަސައްކަތް ނުކުރެވުނީ ވަގުތު މެނޭޖްކުރަން އުނދަގޫވުމުން ކަމަށް އަމްނާ ބުންޏެވެ. ނަމަވެސް ލިބުނު ނަތީޖާއާ ދޭތެރޭ އޭނާ ހިތްހަމަޖެހެ އެވެ.

އޯލެވެލްގައި ރަނގަޅު ނަތީޖާއެއް ހޯދަން ބޭނުންވާ ކުދިންނަށް އަމްނާގެ ނަސޭހަތަކީ، ޕާސްޕޭޕަރު ހެދުމާއި ވަގުތު މެނޭޖްކޮށްގެން އިތުރަށް ޓެސްޓަށް ދުރާލައި މަސައްކަތް ކުރުމެވެ.