ރާއްޖޭގައި އަލަށް، އޭ ލެވެލް ޓެސްޓުތަކުގެ ގުރޭޑްތައް ކަނޑައަޅާފައިވާ މިންގަނޑު އާންމުކުރަން ފަށައިފި

އޭ ލެވެލް އިމްތިހާނުގެ ދިވެއްސާއި އިސްލާމް މާއްދާގައި ގުރޭޑްތައް ކަނޑައަޅާފައިވާ ގޮތުގެ މިންގަނޑު (ގުރޭޑް ތްރެޝްހޯލްޑް) އާންމުކުރަން ފަށައިފި އެވެ.

މީގެ ކުރިން ރާއްޖޭގައި އެ ނަތީޖާ އާއްމެއް ނުކުރެ އެވެ.

ޑިޕާޓްމަންޓް އޮފް ޕަބްލިކް އެގްޒަމިނޭޝަންސް (ޑީޕީއީ) އިން މިއަދު ދޫކުރަން ފެށި މިދިޔަ އަހަރުގެ އޭލެވެލް ނަތީޖާއާ އެކު ވަނީ 2017 ވަނަ އަހަރުން ފެށިގެން މިދިޔަ އަހަރުގެ ނިޔަލަށް ހުރި ގުރޭޑް ތްރެޝްހޯލްޑްތައް އާންމު ކޮށްފަ އެވެ.

އެޑިއުކޭޝަން މިނިސްޓަރު ޑރ. އިސްމާއިލް ޝަފީއު "މިހާރު" އަށް ވިދާޅުވީ މީގެ ކުރިން އެ ނަތީޖާއަކީ ގެންގުޅެފައި ވަނީ ވަރަށް ސިއްރުން ކަމަށެވެ.

ނަމަވެސް މިނިސްޓަރު ގަބޫލު ކުރައްވަނީ އެ ނަތީޖާ އަކީ ރާއްޖޭގައި ހަދާ އެހެނިހެން އިމްތިހާން (ކެމްބްރިޖް އަދި އެޑެކްސެލް) ތަކުގެ ނަތީޖާއެކޭ އެއްގޮތަށް ވަރަށް ހާމަކަން ބޮޑު ގޮތެއްގައި އޮންނަން ޖެހޭނެ އެއްޗެއް ކަމަށެވެ.

"ކެމްބްރިޖް އަދި އެޑެކްސެލް އިން މި ގެންދަނީ އެ މާއްދާތަކުގެ ތްރެޝްހޯލްޑްތައް އިއުލާން ކުރަމުން. އެހެންވެ ދިވެހި/އިސްލާމުގެ ވެސް އަޅުގަނޑު ގަބޫލު ކުރަނީ ހަރުދަނާ ބީދައަކުން ހަމަ އިއުލާން ކުރެވެން ޖެހޭނެ ކަމަށް،" މިނިސްޓަރު ވިދާޅުވި އެވެ.

"ގުރޭޑް ތްރެޝްހޯލްޑާއެކު ކިޔަވާ ދަރިވަރުންނަށާއި ޓީޗަރުންނަށް ދެން އެނގޭނެ ގްރޭޑް ތަކުގެ ލޯވާ އެންޑް އަޕާ ބައުންޑްރީސްތައް."

އިސްމާއިލް ވިދާޅުވީ ދެން ކޮންމެ އަހަރެއްގައި ވެސް އޭލެވެލްގެ ދިވެހި/އިސްލާމުގެ ގުރޭޑް ތްރެޝްހޯލްޑް އާންމު ކުރާނެ ކަމަށެވެ. މި އަހަރު މޭ/ޖޫންގައި އޮންނަ އޯލެވެލް އިމްތިހާނުގެ ނާތީޖާއާ އެކު ދިވެހި/އިސްލާމުގެ ގުރޭޑް ތްރެޝްހޯލްޑްތައް އާންމު ކުރާނެ ކަމަށް ވެސް މިނިސްޓަރު ވިދާޅުވި އެވެ.