މަސްވެރިންނަށް މި ދެ ދުވަހު 70 މިލިއަން ދޫކުރަނީ، ބާކީ 30 މިލިއަން ހޯމަ ދުވަހު!

މިއަދާއި މާދަމާ މަސްވެރިންނަށް 70 މިލިއަން ރުފިޔާ ސަރުކާރުން ދޫކުރާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

މިފްކޯ އަށް މަސް ކިރުވުމަށް ފަހު، މި ސަރުކާރުން މިހާތަނަށް 400 މިލިއަނަށް ވުރެ ގިނަ ފައިސާ ދޫކޮށްފައިވާއިރު އަދިވެސް 300 މިލިއަނާ ގާތަށް ފައިސާ ދޭންޖެހެ އެވެ. އެ ފައިސާ އަށް ޑިމާންޑުކޮށް މަސްވެރިންތަކެއް ގއ. ކޫއްޑޫގައި މީގެ ތިން ދުވަސް ކުރިން ފެށި އިހުތިޖާޖާ ގުޅިގެން ސަރުކާރުން ބުނެފައި ވަނީ އަންނަ ހަފުތާގެ ހޯމަ ދުވަހުގެ ކުރިން 100 މިލިއަން އޮޑިވެރިންނަށް ދޭނެ ކަމަށެވެ. އަދި ބާކީ ފައިސާ އަންނަ މަހުގެ ފަހެއްގެ ކުރިން ޖަމާކޮށްދޭނެ ކަމަށް ސަރުކާރުން އޮތީ ބުނެފަ އެވެ.

ފިޝަރީޒް މިނިސްޓަރު "މިހާރު" އަށް މިއަދު ވިދާޅުވީ، އަންނަ ހަފުތާގެ ހޯމަ ދުވަހުގެ ކުރިން އޮޑިވެރިންނަށް ދޭން ސަރުކާރުން ބުނި 100 މިލިއަން ރުފިޔާގެ ތެރެއިން 70 މިލިއަން ދޫކުރުމުގެ މަސައްކަތް މިހާރު ފަށާފައިވާ ކަމަށެވެ

"މިއަދާއި މާދަމާ އެ 70 މިލިއަން ދޫކުރުމުގެ ކަންކަން ކުރިއަށް ގެންދާނެ. ބާކީ 30 މިލިއަން ރުފިޔާ އަންނަ ހޯމަ ދުވަހު ދީ ނިންމާނެ. ފުރަތަމަ މި ދޭ 70 މިލިއަން އޮޑިވެރިންނަށް ޑިސްޕާސް ކުރުމުގެ ކަންކަން މިހާރު އަޅުގަނޑުމެން ފަށައިފިން،" ޝިޔާމް ވިދާޅުވި އެވެ.

މިނިސްޓަރު ވިދާޅުވި ގޮތުގައި ސަރުކާރުން ބުނަމުން އައި ގޮތަށް، މިހާތަނަށް އޮޑިވެރިންނަށް ނުދީ ހުރިހާ ފައިސާއެއް އަންނަ މަހުގެ ފަހެއްގެ ކުރިން ދޫކުރުމަށް އަންނަނީ މަސައްކަތް ކުރަމުންނެވެ.

"އަޅުގަނޑުމެން ބުނި ބަހުގެ އިތުބާރު އިރާދަކުރެއްވިއްޔާ އަޅުގަނޑުމެން ދަމަހައްޓާނަން،" އޭނާ ވިދާޅުވި އެވެ.

މިނިސްޓަރު ވިދާޅުވީ، މަސްވެރިންނަށް މިހާތަނަށް ދޫކުރަންޖެހޭ ފައިސާތައް އަންނަ މަހުގެ ފަހެއްގެ ކުރިން ދީ ނިންމުމަށް ފަހު، ދެން މަސައްކަތް ކުރާނީ މިފްކޯ އަށް މަސް ކިރާތާ ހަފުތާއެއްގެ ތެރޭގައި ފައިސާ ދޫކޮށް ނިންމާށެވެ. އަދި ސަރުކާރުން ނިންމާފައި ވަނީ މިފްކޯ އަށް ކިރާ މަހުގެ އަގަށް ވާ ފައިސާ ރައީސް ޑރ. މުހައްމަދު މުއިއްޒުގެ ވައުދާ އެެއްގޮތަށް 48 ގަޑިއިރުގެ ތެރޭގައި މަސްވެރިންނަށް ދޫކުރުމުގެ ކަންކަން މި ދައުރުގެ ކުރީކޮޅު ފެށުމަށެވެ. ރައީސް މުއިއްޒު ވެސް ވަނީ އެ ކަމަށް އެއްބަސްވެވަޑައިގެންފަ އެވެ.

މަސްވެރިން މުޒާހަރާ ކުރާތާ ތިން ދުވަސް ވެފައިވާއިރު، އެ މުޒާހަރާތަކާ ގުޅިގެން ފައިސާ ދޫކޮށް ނިންމަން ސަރުކާރުން ފުރަތަމަ ވެސް ތާރީހުތަކެއް ދިނެވެ. އެކަމަކު، މަސްވެރިން ބުނަމުންދަނީ އިހުތިޖާޖު ހުއްޓާލާނީ އެއްކޮށް ފައިސާ ދޫކުރުމުން ކަމަށެވެ.

މައްސަލަ ހައްލުކުރަން ފިޝަރީޒް މިނިސްޓަރު ޝިޔާމާއި މިފްކޯގެ އިސްވެރިން ކޫއްޑު އަށް ވަޑައިގެން މަސްވެރިންނާ މަޝްވަރާ ކުރެއްވި އެވެ. އެ ކަމަކު، އެ މީހުން ސަރުކާރުގެ ބުނުމަކަށް އެއްބަހެއް ނުވި އެވެ.

ރައީސް މުއިއްޒު ގދ. ތިނަދޫގައި ރޭ ވިދާޅުވީ، ސަރުކާރުގައި ފައިސާ ހުރެ، ދޭންޖެހޭ ބަޔަކަށް ނުދީ ނުތިބޭނެ ކަމަށެވެ. ފައިސާ ދޫކުރުން އުނދަގޫވީ ދައުލަތުގެ ދަރަނި ވަރަށް ބޮޑުވެ، ހަރަދުތައް ހަމަޖައްސަން އުނދަގޫވުމުން ކަމަށް އެ މަނިކުފާނު ގެންދަވަނީ ވިދާޅުވަމުންނެވެ.