ޝަރުތު ހަމަވެ ގެދޮރު ނުލިބޭ މީހުންނަށް އެލަވަންސެއް ދޭ ގޮތަށް ސޯޝަލް ހައުސިންގެ ބިލް މަޖިލީހަށް

ސަރުކާރުން އިއުލާނުކުރާ ސޯޝަލް ހައުސިން މަޝްރޫއުތަކަށް ޝަރުތުވެ ހަމަވިޔަސް ފްލެޓު ނުލިބޭ ނަމަ އެލަވަންސެއް ލިބޭ ގޮތަށް ކަނޑައަޅައި ސޯޝަލް ހައުސިންއާ ބެހޭ ބިލު ރައްޔިތުންގެ މަޖިލީހަށް މިއަދު ހުށަހަޅައިފި އެވެ.

ސަރުކާރުގެ ފަރާތުން ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލްހަކީމް ހުށަހެޅުއްވި ބިލުގައި ވަނީ ބިލުން ސޯޝަލް ހައުސިން މިންގަނޑުތަކާއި، ފޯރުކޮށްދިނުމުގެ ޝަރުތުތަކާއި ސޯޝަލް ހައުސިން ބޭނުންކުރުމުގެ ޝަރުތުތައް ކަނޑައަޅައިފަ އެވެ.

ބިލުގައިވަނީ ބޯހިޔާވަހިކަމުގެ ބޭނުން ޖެހިފައިވާ މީހުންގެ ދަފްތަރު ގާނޫނެއްގެ ދަށުން އެކުލަވާލަން މަޖުބޫރުކޮށް، ކޮންމެ އަހަރަކު އެއް ފަހަރަކު އާންމު ކުރަން ޖެހޭނެ ކަމަށް ބަޔާންކޮށްފަ އެވެ. ދަފްތަރުގައި ހިމެނޭ ފަރާތްތަކުގެ ހާލަތު މޮނިޓަކޮށް އަދާހަމަކުރަން ޖެހެ އެވެ.

ހައުސިން ބެނެފިޓެއް ނުވަތަ އެލަވަންސެއް ދެނީ ދަފްތަރުގައި ޖައްސާފައިވާ، ފްލެޓު ނުލިބޭ ފަރާތްތަކަށެވެ. އެލަވަންސް ލިބޭނެ ކަމަށް ބަޔާންކޮށްފައިވަނީ ކުލީގެ އެއްބަސްވުމަކާ އެކު ކުއްޔަށް ދިރިއުޅޭ، އަދި ބިލު ގާނޫނަކަށް ވުމަށް ފަހު މިކަމަށް ހަދާ ގަވައިދުގައި ބަޔާންކުރާ އަދަދަށް ވުރެ ބޮޑު ކުއްޔަކަށް ނުވާ ފަރާތްތަކަށެވެ.

މި ބެނެފިޓް ދޫކުރާނީ މަހުން މަހަށް ދޫކުރާ މާލީ އެހީއެއްގެ ގޮތުގަ އެވެ.

މި ބިލުގައިވަނީ ބޯހިޔާވަހިކަން ދިނުމުގައި އިސްކަން ދޭނެ އިތުރު ފަރާތްތަކެއް ވެސް ހިމަނައިފަ އެވެ. އެއީ:

- ނުކުޅެދުންތެރިކަމެއް ހުންނަ ފަރާތްތައް

- ނުކުޅެދުންތެރިކަމެއް ހުންނަ ފަރާތެއްގެ ބަލަދުވެރިން ނުވަތަ ބަލަމުން އަންނަ މީހެއް

- ބޮޑު ބައްޔެއް ތަހައްމަލު ކުރަމުންދާ މީހުން

- ބޮޑު ބައެއް ތަހަމައްލު ކުރަމުންދާ މީހުންގެ ޑިޕެންޑެންޓެއް ބަލަމުންދާ މީހުން

- އުމުރުން ދުވަސްވީ، ބަލި ހާލަތު ދަށް ޑިޕެންޑެންޓް ބަލަމުންދާ ފަރާތްތައް

ބިލުގައި ވަނީ ސޯޝަލް ހައުސިންގެ ދަށުން ބޯހިޔާވަހިކަން ދިނުމުގައި ދިރިއުޅުމުގެ ހާލަތާއި މާލީ ތަނަވަސްކަން ކަށަވަރުކުރުން ލާޒިމްކޮށް، އެކަން ކުރާނެ ގޮތްތައް ވެސް ބަޔާންކޮށްފަ އެވެ. އަދި ސޯޝަލް ހައުސިން ޕްރޮގްރާމްތަކުގެ ފެންވަރާއި، ސޯޝަލް ހައުސިން ހުންނަން ޖެހޭ މިންގަނޑުތަކުގެ އިތުރުން ހިންގާނެ ގޮތުގެ އުސޫލުތައް ވެސް ވަނީ ބަޔާންކޮށްފަ އެވެ.