މަޖިލިސް އިންތިހާބު: ރީ-ރަޖިސްޓްރޭޝަނަށް 11،000 އަށްވުރެ ގިނަ ފޯމު، ވޯޓު ފޮށި ބަހައްޓާނީ ބޭރުގެ ތިން ގައުމެއްގައި

ރައްޔިތުންގެ މަޖިލިސް އިންތިހާބުގައި ވޯޓުލާ ތަން ބަދަލުކުރަން 11،000 އަށްވުރެ ގިނަ މީހުން ފޯމު ހުށަހެޅިއިރު، ރާއްޖެއިން ބޭރުގެ ތިން ގައުމެއްގައި ވޯޓު ފޮށި ބަހައްޓަން އިލެކްޝަންސް ކޮމިޝަން (އީސީ)ން ނިންމައިފި އެވެ.

އެ ކޮމިޝަނުން މިއަދު ބުނީ، ރީ-ރަޖިސްޓްރޭޝަންގެ މުއްދަތު އިއްޔެގެ 3:00 ގައި ހަމަވިއިރު، ޖުމްލަ 11،169 ފޯމު ލިބިފައިވާ ކަމަށެވެ. އޭގެ ތެރެއިން، 1،141 ފޯމެއް ބާތިލްކުރުމުން ރަޖިސްޓްރީކޮށްދީފައިވަނީ 10،028 ފޯމެވެ.

ރާއްޖެއިން ބޭރުގައި ބަހައްޓަން އިއުލާންކުރި ހަ ވޯޓު ފޮއްޓަކަށް، ވޯޓުލާން 1،338 މީހުން ރީ-ރަޖިސްޓްރޭޝަން ފޯމު ހުށަހެޅި އެވެ. ނަމަވެސް، 100 އަށްވުރެ ގިނަ މީހުން ރީ-ރަޖިސްޓްރީކޮށްގެން ވޯޓު ފޮށި ބަހައްޓަން ހަމަޖައްސާފައިވަނީ މެލޭޝިއާގެ ކުއާލަލަމްޕޫރާއި ސްރީލަންކާގެ ކޮލޮމްބޯ އަދި އިންޑިއާގެ ޓްރިވެންޑްރަމްގަ އެވެ.

އެންމެ ގިނަ މީހުން ރަޖިސްޓްރީކޮށްފައިވަނީ މެލޭޝިއާގައި ވޯޓުލާށެވެ. އެ ގައުމުގައި ވޯޓުލާން 702 މީހުން ރަޖިސްޓްރީކޮށްފައިވެ އެވެ.

ރިސޯޓު އަދި ސިނާއީ މަސައްކަތްކުރާ ތަންތަނުގައި ވޯޓު ފޮށި ބަހައްޓާނީ 30 އަށްވުރެ ގިނަ މީހުން ރީ-ރަޖިސްޓްރީކުރުމުންނެވެ.

މީގެ ކުރިން އިއުލާންކުރި ގޮތުން ނަމަ، މަޖިލިސް އިންތިހާބުގެ ވޯޓުލުން މިއަދު އޮންނާނެ އެވެ. އެކަމަކު، ރޯދަ މަހު އިންތިހާބުތައް ނުބާއްވާ ގޮތަށް، އާއްމު އިންތިހާބުތަކާ ބެހޭ ގާނޫނަށް ގެނައި ބަދަލުތަކާއެކު، ވޯޓުލާ ތާރީހު ވެސް ބަދަލުވީ އެވެ. އީސީން މިހާރު ނިންމާފައިވަނީ އަންނަ މަހުގެ 21 ގައި މަޖިލިސް އިންތިހާބު ބާއްވާށެވެ.