މަޖިލިސް އިންތިހާބާ ހެދި ދަރިވަރުންނާއި ޓީޗަރުންނަށް ބޮޑު ބުރައެއް!

މަޖިލިސް އިންތިހާބު ބާއްވާ ދުވަހާ ޓެސްޓްތައް ދިމާވާތީ، ގްރޭޑް 7، 8 އަދި 9ގެ ދަރިވަރުންގެ ފައިނަލް ޓެސްޓުތައް ނެގުން އަވަސްކުރުމުން ޓީޗަރުންނާއި ބެލެނިވެރިން ކަންބޮޑުވުން ފާޅުކޮށްފި އެވެ.

މި ދިރާސީ އަހަރުގެ ކަލަންޑަރުގައިވާ ގޮތުން އެ ގްރޭޑްތަކުގެ ދަރިވަރުންގެ ދެވަނަ ޓާމުގެ ޓެސްޓުތައް ނަގަން ކުރިން ނިންމާފައި ވަނީ އަންނަ މަހުގެ 16 އިން 27ގެ ނިޔަލަށެވެ. ނަމަވެސް ރައްޔިތުން މަޖިލީހުގެ އިންތިހާބު ބާއްވާ ތާރީހަކީ އަންނަ މަހުގެ 21 ކަމުގައި އިލެކްޝަން ކޮމިޝަން (އިސީ)ން ކަނޑައެޅުމުން އެޑިއުކޭޝަން މިނިސްޓްރީން ވަނީ ޓެސްޓު ބާއްވާ ތާރީހަށް ބަދަލު ގެނެސްފަ އެވެ.

މިދިޔަ ބުރާސްފަތި ދުވަހު މިނިސްޓްރީން ތާރީހު ބަދަލުކޮށްފައި ވަނީ އަންނަ ބުދަ ދުވަހު ޓެސްޓުތައް ނަގަން ފަށާ ގޮތަށެވެ. ޓެސްޓުތައް ނަގާ ނިންމަން ދީފައިވާ ތާރީހަކީ އަންނަ މަހުގެ 25 އެވެ.

ޓެސްޓުތައް ފެށުން އަވަސްކޮށް، ކުލިއަކަށް ގެނައި އެ ބަދަލާ ގުޅިގެން ކަންބޮޑުވުން ފާޅުކޮށް ބެލެނިވެރިންނާއި ޓީޗަރުން ވެސް އަންނަނީ ވާހަކަ ދައްކަމުންނެވެ.

"މިހާރު" އާ ވާހަކަ ދެއްކި ގްރޭޑް 8ގައި ކިޔަވާ ބެލެނިވެރިޔަކު ބުނީ ޓެސްޓަށް ތައްޔާރުވާ ވަރަށް ކުދިންނަށް ކިޔަވައިދީފައި ނުވާ ކަމަށެވެ. އަދި އެ ގްރޭޑްގެ ދަރިވަރުން އޯލެވެލްގެ ސިލަބަސް ކިޔަވައިދޭން ފެށި ނަމަވެސް ފޮތްތައް ވެސް ހަމަ ނުވާ ކަމަށް އޭނާ ބުންޏެވެ.

"މި ސްކޫލުގައި ޓީޗަރު އަންނަނީ ކޮންމެ ދުވަހަކު ޕްރިންޓް ނަގައިގެން. ފޮތްތައް އަދިވެސް ކުދިންނަކަށް ނުލިބޭ، އަނެއްކާ ޓެސްޓު ނެގުން އަވަސް އެ ކުރީ. ކުދިންނަށް ކިހާ ބޮޑު ގެއްލުމެއް މިއީ،" އެ ބެލެނިވެރިޔާ ބުންޏެވެ.

އެހެން ސްކޫލެއްގެ ގްރޭޑް 9ގައި ކިޔަވާ ދަރިވަރެއްގެ ބެލެނިވެރިޔަކު ބުނީ އެ ސްކޫލުގެ ސިލަބަސް ވެސް އެއްކޮށް ކިޔަވައިދީ ނުނިމޭ ކަމަށެވެ. އޭނާ ވަނީ ސިޔާސީ މީހުން ދަރިވަރުންނާ ދޭތެރެ ނުވިސްނާ ކަމަށް ބުނެ ކަންބޮޑުވުން ފާޅުކޮށްފަ އެވެ.

"ޓެސްޓް ހަދަނީ ކުދިންނަށް ކިޔަވައި ދިނުމަށް އޮންނަ ވަކި މުގައްރަރެއް ކިޔަވައި ދީ އަދި އެ ފިލާވަޅުތައް މުރާޖާކުރުމަށް ފަހު. ކުދިން އަދި އެ އުޅެނީ ކިޔަވަން ޖެހޭ ބައި ކިޔަވާ ނުނިމިގެން. އެކަމަކު އަނެއްކާ ޓެސްޓު މި އަވަސް ކުރީ،" އެ ބެލެނިވެރިޔާ ބުންޏެވެ.

ބެލެނިވެރިންގެ އިތުރުން ޓީޗަރުން ވެސް ވަނީ ޓެސްޓުތައް އަވަސް ކުރުމުން ކަންބޮޑުވުން ފާޅުކޮށްފަ އެވެ. އެއް ޓީޗަރަކު ބުނީ މިހާތަނަށް ކިޔަވައިދިން ބައިތަކުން ޓެސްޓު ނެގުމަށް މިނިސްޓްރީން ސްކޫލުތަކަށް އަންގާފައިވާ ކަމަށެވެ.

"މިސާލަކަށް ބަލަމާ ގްރޭޑް 8. ޖެނުއަރީގައި މި ކިޔަވައިދޭން ފެށީ އެ ކުދިންނަށް އޯލެވެލްގެ ސިލަބަސް. އަދި އޭގެ ވަރަށް ކުޑަ މިންވަރެއް މި ކިޔަވައިދެވުނީ. އެއިން ޓެސްޓު ނެގީމަ ދަރިވަރަށް އެއިން ހާސިލް ނުކުރެވޭނެ އެއްވެސް އެއްޗެއް،" އެ ޓީޗަރު ބުންޏެވެ.

އެހެން ސްކޫލެއްގެ ޓީޗަރަކު ކަންބޮޑުވުން ފާޅުކުރީ ޓެސްޓުގެ މެދުން 16 ދުވަހުގެ ބަންދެއް އަންނާތީ އެވެ. ސްކޫލުތަކުން ޓެސްޓުގެ ޓައިމް ޓޭބަލް ދަރިވަރުންނަށް ދީފައި ވާއިރު ގިނަ ސްކޫލުތަކުގެ ޓޭބަލް ތައްޔާރުކޮށްފައި ވަނީ އެ ބަންދު ލައިގެންނެވެ. އެއީ މި މަހު 28 އިން އަންނަ މަހުގެ 14 އަށް ބަންދު ވާ ގޮތަށެވެ.

"ބައެއް ސްކޫލުތަކުގައި ދެ ޓެސްޓު، އަނެއްބައި ސްކޫލުތަކުގައި ތިން ޓްސްޓު ނަގާފަ މި އަންނަނީ ބްރޭކް. އަނެއްކާ ކިޔެވުން މި ފެށެނީ ޓެސްޓާއެއްކޮށް،" އެ ޓީޗަރު ބުންޏެވެ.

ސްކޫލެއްގެ ޕްރިންސިޕަލަކު ވިދާޅުވީ އެކަޑަމިކް ކަލަންޑަރަށް ގެނައި ބަދަލާއެކު ސިލަބަސް ކަވާ ކުރަން ލިބުނު ވަގުތު އިތުރުވި ކަމަށެވެ.

"މި ބަދަލު ގެނަޔަސް އަސްލު މާ ބޮޑު ތަފާތެއް ނުފެންނާނެ. އައިޖީސީއެސްއީ ސިލަބަހަކަށް މި އޮންނަނީ 160 ގަޑިއިރު. ކަލަންޑަރަށް ގެނައި ބަދަލުން އެބަ އިތުރުވޭ 38 ގަޑިއިރު. އެއީ ކުރިން ކޮވިޑްގައި ގެނައި ބަދަލުން ބައެއް މި ލިބުނީ. އެހެންވެ މި ސްކޫލުގެ ގްރޭޑްތަކަށް ސިލަބަސް ކަވާވި،" އެ ޕްރިންސިޕަލް ވިދާޅުވި އެވެ.

ނަމަވެސް އެ ގެނައި ބަދަލަކީ ހުރިހާ ދަރިވަރުންނަށް އެންމެ ރަނގަޅު ބަދަލަކަށް ނުވާނެ ކަމަށް އޭނާ ވިދާޅުވި އެވެ.

"ހުރިހާ ސްކޫލަކަށް އެގޮތަކަށް ނުވާނެ، އެކި ކުދިންގެ ވެސް ހުންނާނީ އެކި ލެވެލް. އެހެންވެ ސްކޫލުތަކުން ވެސް ސިލަބަސް ކަވާ ކުރުމުގައި އުޅޭނީ އެކި ލެވެލްގައި. އެގޮތަށް ވިސްނާ ނަމަ މިއީ ދަރިވަރުންނަށް ވަރަށް ބޮޑު ގެއްލުމެއް. އެ ކުދިންގެ މެންޓަލް ހެލްތަށް އޭގެ އަސަރު ކުރާނެ،" އެ ޕްރިންސިޕަލް ވިދާޅުވި އެވެ

ޓެސްޓުނަގާ ތާރީހަށް އެ ގެނައި ބަދާލާ ގުޅޭގޮތުން "މިހާރު"ން ސުވާލު ކުރުމުން އެޑިޔުކޭޝަން މިނިސްޓަރު ޑރ. އިސްމާއިލް ޝަފީއުއާ ހަވާލާދީ މިނިސްޓްރީގެ އޮފިޝަލަކު ވިދާޅުވީ ރައްޔިތުން މަޖިލީހުން އިންތިހާބު ފަސް ކުރުމަށް ގާނޫނަށް ގެނައި ބަދަލާ ގުޅިގެން އިންތިހާބު ބާއްވާ ދުވަސް ދިމާވަނީ ޓެސްޓު އޮންނަ ދުވަހަކާ ކަމަށެވެ.

"އޭޕްރިލް 21 އަދި 22 ވެސް ބަންދު ވާނެ ކަމަށް ނިންމާފައި ވަނީ. އެހެންކަމުން މި ދެ ދުވަހުގެ ބަދަލުގައި ޓެސްޓް ދިނުމަށް އިތުރު ދުވަސްތަކެއް ހަމަޖެއްސީ،" މިނިސްޓަރު ވިދާޅުވި އެވެ.

މިއީ އެކަޑަމިކް ކަލަންޑަރަށް ގެނައި ބޮޑު ބަދަލެއް ނޫން ކަމަށް މިނިސްޓަރު ވިދާޅުވި އެވެ. ޓީޗަރުންނާއި ބެލެނިވެރިންގެ ކަންބޮޑުވުންތަކާ ގުޅޭގޮތުން ސުވާލު ކުރުމުން އިތުރަކަށް ޖަވާބެއް ނުދެއްވަ އެވެ.