އިންޑިއާގެ މަޝްހޫރު ޑޮލީ ޗައިވާލާ ހާއްސަ ދައުވަތަކަށް ރާއްޖޭގައި

އިންޑިއާގެ ނާގަޕޫރުގައި މަގުމަތީ ސައި ވިއްކަން އުޅޭ އަދި ސޯޝަލް މީޑިއާގައި މަޝްހޫރު "ޑޮލީ ޗައިވާލާ" އިއްޔެ ރާއްޖެ އަތުވެއްޖެ އެވެ.

އޭނާ ރާއްޖެ އައީ އެލްޖީއޭގެ ކުރީގެ ނައިބު ރައީސް ޝުޖާއު ހުސެއިންގެ ދައުވަތަކަށެވެ.

ޝުޖާއު ވިދާޅުވީ ރާއްޖެ އަންނަން ޑޮލީ އަށް ދައުވަތު ދިނީ ޗުއްޓީއަކަށް މިތަނަށް އަންނަ އޭނާ ވަރަށް ބޭނުންވާ ކަމަށް ބުނުމުން ކަމަށެވެ. އޭނާ ހަފުތާއެއްހާ ދުވަހު ރާއްޖޭގައި މަޑުކުރާނެ ކަމަށް ޝުޖާއު ވިދާޅުވި އެވެ.

"އެހެން ރާއްޖޭގެ ރީތިކަމާއި މިތަނުގެ މީހުން ދިރިއުޅުމާއި ސަގާފަތް ބަލައިލަން އަންނަން އޭނާ ދިން ދައުވަތެއް މިއީ،" ޝުޖާއު ވިދާޅުވި އެވެ.

ޑޮލީ ވަނީ އިންސްޓަގްރާމްގައި މި ދަތުރުގެ ބައެއް ފޮޓޯތަކާއި ވީޑިއޯތައް ހިއްސާކޮށްފަ އެވެ.

އޭނާ ޗުއްޓީ ހޭދަކުރަމުން އަންނަނީ މާލެ އަތޮޅު އަދާރަން ހުދުރަންފުށީގަ އެވެ.

ޑޮލީ ރާއްޖެ އައިތަނުން އިއްޔެ ވަނީ ބޮލީވުޑްގެ އެކްޓަރު ސޮހައިލް ހާންއާ ވެސް ދިމާވެފަ އެވެ. އެ ދެމީހުން އެކުގައި ވެލާނާ އިންޓަނޭޝަނަލް އެއާޕޯޓުގައި ނަގާފައިވާ ފޮޓޯއެއް ވެސް ޑޮލީ އިންސްޓަގްރާމްކޮށްފައިވެ އެވެ.

ސޮހައިލް ރާއްޖެ އައީ އޭނާގެ ދެކުދިންނާ އެކު ޗުއްޓީ އަށެވެ.

ޑޮލީގެ އިންސްޓަގްރާމްގައި ދެ މިލިއަނަށް ވުރެ ގިނަ ފޮލޮވާސް ވެސް ތިބެ އެވެ.

އޭނާ މަގުމަތީގައި ސައި ވިއްކުމުގެ މަސައްކަތް ކުރަމުން އަންނަތާ 17 އަހަރު ވެއްޖެ އެވެ.

މަގުމަތީ ސައި ވިއްކަން އުޅޭއިރު އޭނާ ގެންގުޅޭ ތަފާތު ސްޓައިލަކީ ވެސް ގިނަ ބަޔަކު ޝައުގުވެރިވާ ކަމެކެވެ. އޭނާ އަޅައިގެން ހުންނަ އައިނާއި އިސްތަށިގަނޑުގެ ސްޓައިލާއި ކަރުގައި އަޅާފައި އޮންނަ ފަށަކީ ޑޮލީގެ ސިގްނޭޗާ ސްޓައިލް ރަމްޒުކޮށްދޭ އެއްޗެއްސެވެ.

ޑޮލީ އަށް މިފަހުން ދުނިޔޭގެ ބޮޑު ސަމާލުކަމެއް ލިބުނީ އިންޑިއާގެ މަހުޖަނު މުކޭޝް އަމްބާނީގެ ދަރިފުޅުގެ ކައިވެންޏަށް އިންޑިއާއަށް ގޮސް އުޅުނު މައިކްރޮސޮފްޓްގެ ފައުންޑާ ބިލް ގޭޓްސް އަށް އޭނާ ސައި ތައްޔާރުކޮށްދޭ ވީޑިއޯއެއް މިދިޔަ ފެބްރުއަރީ މަހު ސޯޝަލް މީޑިއާގައި އާންމުވުމުންނެވެ. އޭރު ބިލް ގޭޓްސް އަކީ ކާކުކަން ވެސް ޑޮލީ އަށް ނޭނގެ އެވެ.

ސޯޝަލް މީޑިއާ އިންފުލުއެންސަރުންނާއި އިންޑިއާގެ ފިލްމީ ތަރިންނާ އެކު ވެސް ޑޮލީ މަސައްކަތް ކޮށްފައިވެ އެވެ. އޭނާގެ މަޝްހޫރު ކަމުން ބައެއް ސެލެބްރިޓީން އޭނާއާ ބައްދަލުކުރުމަށް ނާގަޕޫރަށް ވެސް ދެ އެވެ.