ލިޓަސްގެ ޓީމު ވަރުގަދަކުރަން 100 އެއްހާ މުވައްޒަފުން ގޮވައިގެން މިފަހަރު ލަންކާ އަށް!

ރާއްޖޭގައި ފުޅާ ދާއިރާއެއްގައި ސައިކަލުގެ ވިޔަފާރިކުރާ ކުންފުނީގެ މުވައްޒަފުންގެ އެކުވެރިކަން އާލާކޮށް، ޓީމު ވަރުގަދަކުރުން މި ފަހަރު އޮތީ މުޅިން ތަފާތު ގޮތަކަށެވެ. ކުންފުނީގެ 100 އެއްހާ މުވައްޒަފުން ގޮވައިގެން ދިޔައީ އަވަށްޓެރި ސްރީލަންކާ އަށެވެ. މިއީ ރާއްޖޭގެ ކުންފުންޏަކުން މިހާތަނަށް އެންމެ ގިނަ މުވައްޒަފުން ގޮވައިގެން ރާއްޖެއިން ބޭރަށް ކުރި ދަތުރެވެ.

ލިޓަސްގެ ކުޑައިގެ ދަށުން ހިންގާ ކުންފުނިތަކުގައި މަސައްކަތްކުރާ ހުރިހާ މުވައްޒަފުން ކަހަލަ ގޮތަށް މިދިޔަ ހަތަރު ދުވަސް ހޭދަކުރީ މުޅިން ޗުއްޓީއެއް ގޮތަކަށް ވެސް ނޫނެވެ. އެކި ސަރަހައްދުތަކަށް ގޮސް ތަފާތު ހަރަކާތްތައް ހިންގައި، ތަޖުރިބާ ހޯދުމުގަ އެވެ.

"އަޅުގަނޑުމެންގެ މިދަތުރުގެ މައިގަނޑު ބޭނުމަކީ މުވައްޒަފުންގެ މެދުގައި އެކުވެރިކަން އާލާކޮށް، ޓީމް ބިލްކުރަން ތަފާތު ހަރަކާތްތައް ކުރިޔަށް ގެންދިއުން. އެގޮތުން ބައެއް ވޯކްޝޮޕެއް ގޮތަށް ވެސް ބައެއް ހަރަކާތްތައް ކުރިޔަށް ގެންދިޔަ،" ލިޓަސްގެ ސޭލްސް އެންޑް މާކެޓިން މެނޭޖަރު އާސިފް ރަޝީދު ވިދާޅުވި އެވެ.

އާސިފް ވިދާޅުވީ މުވައްޒަފުންނަށް ތަފާތު އެކި އެކި ތަޖުރިބާތައްކޮށްލުމުގެ ފުރުސަތު ދިނުމުގެ ގޮތުން ލަންކާގެ އެކި ސަރަހައްދުތަކަށް ގެންދިޔަ އެވެ. އެގޮތުން ވޭޔަންގޮޑާ، ކިތުލްގަލަ، ތަލަވައްކަލެ، ނުވަރަލިޔާ އަދި ނިގޮމްބޯ އަށް މުވައްޒަފުން ގެންގޮސް ވަރަށް ތަފާތު ތަޖުރިބާތަކެއް ކުރެވުނު ކަމަށް ވެސް އޭނާ ވިދާޅުވި އެވެ.

"މެނޭޖްމަންޓުން މި ދަތުރު އިންތިޒާމްކުރި މައިގަނޑު ސަބަބަކީ މުވައްޒަފުން މިދިޔަ އަހަރު ކުރި ބުރަ މަސައްކަތުގެ އަގު ވަޒަންކުރުމަށް. ކުންފުންޏަށް މިދިޔަ އަހަރު ވަރަށް ބޮޑު ކުރިއެރުންތަކެއް ހޯދައިދީފައި،" އާސިފް ވިދާޅުވި އެވެ.

އޭނާ ވިދާޅުވީ މި ދަތުރުގެ ސަބަބުން އެކި ރަށްރަށުގައި މަސައްކަތްކުރާ މުވައްޒަފުންނާއި މާލޭގައި މަސައްކަތްކުރާ މުވައްޒަފުން ބައްދަލުވެ އެކުވެރިކަން އާލާވެ، ވަރަށް ބޮޑަށް ހިތްހަމަޖެހިފައިވާ ކަމަށެވެ.

"އަޅުގަނޑުމެން މުވައްޒަފުން އަތޮޅުތަކުގައި ވެސް އެބަ މަސައްކަތްކުރޭ. މި ދަތުރުގެ ސަބަބުން އެ މުވައްޒަފުންނާ ވެސް ބައްދަލުވެ، ތައާރަފްވުމުގެ ފުރުސަތު ލިބިގެން ދިޔަ. އަދި މި ދަތުރުގެ ސަބަބުން ހުރިހާ މުވައްޒަފުންގެ މެދުގައި އެކުވެރިކަން އާލާވެ، ވަރަށް ބޮޑަށް ހިތްހަމަޖެހިފައި ތިބީ،" އާސިފް ވިދާޅުވި އެވެ.

އޭނާ ވިދާޅުވީ އެ ދަތުރުގައި މުވައްޒަފުންނަށް ވިޔަފާރި އިތުރަށް ވަރުގަދަކުރުމަށް މަސައްކަތްކުރަންވީ ގޮތާއި އެނޫން ވެސް ތަފާތު ކަންތައްތައް ދަސްކޮށްދެވުނު ކަމަށެވެ.

"އަޅުގަނޑު މިފަހަރު މިދިޔަ ދަތުރަކީ ވަރަށް ކާމިޔާބު ދަތުރެއް. މީގެ ކުރިން ވެސް އަޅުގަނޑުމެންގެ މުވައްޒަފުން ގޮވައިގެން ރިސޯޓްތަކަށާއި އެކި ރަށްރަށަށް ދަތުރު ދިޔައިން. އެކަމަކު މިފަހަރު މިއީ މުޅިން ތަފާތު ތަޖުރިބާކުރެވުނު ދަތުރެއް،" އާސިފް ވިދާޅުވި އެވެ.

ލިޓަސްގެ ޓީމް ވަރުގަދަކުރުމަށް ލަންކާގައި ހޭދަކުރި ހަތަރު ދުވަހަށްފަހު ބައެއް މީހުން މިހާރު ވަނީ ރޭ އެނބުރި ރާއްޖެ އައި މަސައްކަތަށް ނުކުމެފަ އެވެ.