ދެން ފެންނާނީ ދުވެލި އަވަސްކޮށް އަމަލުން ކަން ކަން ކުރާ ތަން: ރައީސް

ނިމުނު ރައްޔިތުންގެ މަޖިލީހުގެ އިންތިހާބުގައި ސަރުކާރުގެ ކެންޑިޑޭޓުންނަށް ރައްޔިތުން ކުރި ފުރިހަމަ ތާއީދާ އެކު ދެން ފެންނާނީ އަމަލީ ގޮތުން ކަން ކަން ކުރާ ތަން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އިއްޔެގެ އިންތިހާބުގައި ސަރުކާރަށް ލިބުނު ބޮޑު ކާމިޔާބީ ފާހަގަކުރަން މިރޭ ކާނިވާ ސަރަހައްދުގައި ބޭއްވި ހަފްލާގައި ވާހަކަ ދައްކަވަމުން ރައީސް ވިދާޅުވީ ރައްޔިތުން ކުރި އިތުބާރުގެ މަތީގައި، މުޅި ސަރުކާރު އަޒުމް އާ ކުރަންވީ އިހްލާސްތެރިކަމާ އެކީގައި ކުރިއަށް ދިޔުމަށް ކަމަށެވެ.

އެ މަނިކުފާނު ވިދާޅުވި ގޮތުގައި ރިޔާސީ އިންތިހާބާއި މަޖިލިސް އިންތިހާބުގެ ނަތީޖާއިން ރައްޔިތުން ސާބިތުކޮށްދިނީ، ގައުމުގެ މިނިވަންކަން ޔަގީންވެފައި އޮތުމަށާއި ތަރައްގީ ބާރު ދުވެލީގަ ހޯދުމާ އެކު ހަމަޖެހުމާއި ހިތްހަމަޖެހުން ބޭނުންވެފައި އޮތް މިންވަރެވެ.

"...ތިޔަ ދެއްވި އިތުބާރާ ދެއްވި ތާއީދުގެ މައްޗަށް އެތައް ގުނައަކުން މައްޗަށް ސްޕީޑު އަވަސްކޮށް، ރައްޔިތުން އެދޭ ތަރައްގީ ގެނައުމުގެ މަސައްކަތް. ދެން ފެށޭނީ ގައުމު ތަރައްގީވާން،" ރައީސް ވިދާޅުވި އެވެ.

"އަޅުގަނޑު ވަޒީރުންނަށާއި ސަރުކާރުގެ އިސްވެރިންނަށް ދަންނަވާލަން ބޭނުންވަނީ، ދެން ތިއްބަވަންޖެހޭނީ 24 ގަޑިއިރު ހޭލައޭ. ސީރިއަސްކޮށް މި ދަންނަވަނީ. އަޅުގަނޑު ބޭނުންވަނީ ރައްޔިތުން ބޭނުންވާ ތަރައްގީ ގެނެސްދޭން."

އެ މަނިކުފާނު ވިދާޅުވި ގޮތުގައި ރައްޔިތުންނަށް ދެން ފެންނާނީ ސަރުކާރުގެ އިސްވެރިން ނުނިދާ ތިބެ، އަމަލީ ގޮތުން ކަން ކަން ކުރާ ތަނެވެ.

ގެދޮވެރިކަމުގެ ދަތިކަން ފަދަ ޒަމާންވީ މައްސަލަތައް ދާއިމީކޮށް ހައްލުކޮށް، ޒަމާނުއްސުރެ ރައްޔިތުންނަށް ނުފުދިފައި ތިބި ހުރިހާ ކަމެއް ވާ ތަން ފެންނާނެ ކަމަށް ރައީސް ވިދާޅުވި އެވެ.

އިއްޔެ ބޭއްވި އިންތިހާބުގެ ވަގުތީ ނަތީޖާ ދައްކާ ގޮތުން ސީދާ ޕީއެންސީގެ ކެންޑިޑޭޓުން ވަނީ 66 ގޮނޑި ކާމިޔާބުކޮށްފަ އެވެ. އެކަމަކު ސަރުކާރާ އެކު ކޯލިޝަން ހަދާފައިވާ އެމްޑީއޭ، އެމްއެންޕީ އަދި ޖޭޕީގެ އިތުރުން އަމިއްލަ ގޮތުން ވާދަކޮށް ހޮވުނު ކެންޑިޑޭޓުންގެ ތެރޭގައި ހިމެނޭ ސަރުކާރުން ތާއީދުކުރި ކެންޑިޑޭޓުންނާ އެކު، މަޖިލީހުގެ 93 ގޮނޑީގެ ތެރެއިން ސުޕާ މެޖޯރިޓީއަށް ބޭނުންވާ 70 ގޮނޑި ސަރުކާރުން ވަނީ ފަސޭހައިން ހުރަސްކޮށްފަ އެވެ.

ސަރުކާރަށް ތާއީދުކުރާ އެތަކެއް ސަތޭކަ ސަޕޯޓަރުން ބައިވެރިވި މިރޭގެ ހަފްލާގައި 20 ވަނަ މަޖިލީހުގައި ސަރުކާރުގެ މެމްބަރުންގެ ގޮތުގައި 74 ކެންޑިޑޭޓުން ވަނީ ތައާރަފްކޮށްދީފަ އެވެ.

އެއާ އެކު ރައީސް ވަނީ ހިޔާލުތަފާތުވުންތައް އެއްފަރާތްކޮށް، ގައުމާއި ރައްޔިތުންގެ ހައްގުގައި އެކުގައި މަސައްކަތް ކުރުމުގެ ދައުވަތު ސިޔާސީ ވާދަވެރިންނަށް ވެސް މިރޭ ދެއްވައިފަ އެވެ.