ކަޅުދިޔަފުށި ވިއްކާލަން ތިން ވަނަ ފަހަރަށް އިއުލާނުކޮށްފި

ބޭންކް އޮފް މޯލްޑިވްސް (ބީއެމްއެލް) އިން ނެގި ލޯނު ނުދައްކައިގެން ތ. ކަޅުދިޔަފުށި ވިއްކާލަން އަނެއްކާ ވެސް އިއުލާންކޮށްފި އެވެ.

މިއީ ހަދަމުން އަންނަ މި ރިސޯޓު ވިއްކާލަން ހުޅުވާލި ތިން ވަނަ ފަހަރެވެ.

ބޭންކުން ކޮށްފައިވާ އިއުލާނުގައިވާ ގޮތުން މި މަހުގެ 30 ގެ ކުރިން އެ ރަށް ގަންނަން ބޭނުންވާ ފަރާތްތަކުން ބިޑް ހުށަހަޅަން ޖެހޭނެ އެވެ. މިގޮތަށް ބިޑް ހުށަހަޅާ ބިޑް ކާމިޔާބުކުރާ ފަރާތަކުން ބިޑް ޑިޕޮސިޓްގެ ގޮތުގައި ބޭންކަށް އެއް ލައްކަ ޑޮލަރު ހުށަހަޅަން ޖެހޭނެ އެވެ.

އެރަށް ގަތުމަށް ހުށަހަަޅަން ޖެހޭނެ އެންމެ ކުޑަ އަގަކީ 34 މިލިއަން ޑޮލަރު (525 މިލިއަން ރުފިޔާ) އެވެ. މިއީ ސެޕްޓެމްބަރު 2021، ވަނަ އަހަރު އެ ރަށް ވިއްކާލަން ހުށަހެޅި އަގަށް ވުރެ ހަތަރު މިލިއަން ޑޮލަރު ބޮޑު އަދަދެކެވެ. އެފަހަރު އެ ރަށް ވިއްކާލަން ހުޅުވާލީ 30 މިލިއަން ޑޮލަރު (462 މިލިއަން ރުފިޔާ) އަށެވެ.

ބީއެމްއެލް އިން އެ ރަށް ވިއްކާލަން އެންމެ ފުރަތަމަ ހުޅުވާލީ ސެޕްޓެމްބަރު 2019 ގަ އެވެ. އެފަހަރު ވިއްކާލަން އިއުލާނުކުރީ 29.5 މިލިއަން ޑޮލަރު (454.9 މިލިއަން ރުފިޔާ) އަށެވެ.

ތ. ގުރައިދޫ ދާއިރާގެ ކުރީގެ މެމްބަރު ހުސައިން މަނިކު ދޮންމަނިކުގެ ބޮޑު ހިއްސާއެއް އޮންނަ ހުރަވީ އިންވެސްޓްމެންޓުން މި ކްރެޑިޓް ފެސިލިޓީ ބީއެމްއެލުން ނެގީ 2016 ވަނަ އަހަރު އެވެ. ބީއެމްއެލް އަށް އެ ރަށް ނަގާފައި ވަނީ ފެބްރުއަރީ 2019، ގައި ސިވިލް ކޯޓުން ކުރި ހުކުމުގެ ދަށުންނެވެ.

އެ ރަށަކީ، އެމްއެމްޕީއާރްސީ މެދުވެރިކޮށް ދޫކުރި ރަށްތަކުގެ ތެރޭގައި ހިމެނޭ ރަށެކެވެ. ކަޅުދިޔަފުށި ރިސޯޓެއްގެ ގޮތުގައި ތަރައްގީކުރަން ދިން މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ވެސް ބެލި އެވެ.

ރިސޯޓެއްގެ ގޮތުގައި، ކަޅުދިޔަފުށި ތަރައްގީ ކުރުމަށް ޓޫރިޒަމް މިނިސްޓްރީއާ އެކު ސޮއިކޮށްފައި ވަނީ އޮގަސްޓް 24، 2015 ވަނަ އަހަރު އެވެ. އަދި އެކަމާ ގުޅޭ އެއްބަސްވުމުގައި ސޮއި ކުރެއްވީ އޭރުގެ ޓޫރިޒަމް މިނިސްޓަރު އަހުމަދު އަދީބެވެ.

ތ. ގާދިއްފުށި ކައިރީގައި އޮންނަ އެ ރަށް ރިސޯޓެއްގެ ގޮތުގައި ތަރައްގީކޮށް ހުޅުވަން ނިންމާފައި އޮތީ 2017 ވަނަ އަހަރު އެވެ. ބައިނަލްއަގްވާމީ ހޮޓެލް ޗެއިނެއް ކަމަށްވާ މެލިއާ ހޮޓެލްސްއާ ގުޅިގެން އެ ރަށުގައި 97 ޕްރައިވެޓް ވިލާ އާއި 100 ކޮޓަރި އަދި ތިން ރެސްޓޯރެންޓް އެޅުމަށް ޕްލޭންކޮށްފައިވެ އެވެ.

ކަޅުދިޔަފުށި ރިސޯޓަކަށް ހެދުމުގެ ގާތްގަނޑަކަށް 80 ވަރު މަސައްކަތް އޮތީ ނިމިފަ އެވެ.