އިގުތިސާދީ ހާލަތު ކިޔައިދޭން ބޭއްވި ކޮމިޓީ ސިއްރުކޮށްފި

ދައުލަތުގެ މާލީ ހާލަތާއި އިގްތިސާދީ ހާލަތާ ގުޅޭ ގޮތުން ފިނޭންސް މިނިސްޓްރީގެ މުވައްޒަފުންނާ ބައްދަލު ކުރުމަށް ތާވަލްކުރި މާލިއްޔަތު ކޮމިޓީގެ މިއަދުގެ ބައްދަލުވުން ސިއްރު ކޮށްފި އެވެ.

އެ ބައްދަލުވުމަށް ފިނޭންސް މިނިސްޓްރީގެ މުވައްޒަފުންނަށް ދައުވަތު ދީފައިވީ ނަމަވެސް، ބަލި ހާލަތު ހުރި ގޮތުން ކޮމިޓީއަށް ވަޑައިގަންނަވަން އުޒުވެރިވާކަން މިނިސްޓަރު ޑރ މުހައްމަދު ޝަފީގު ވަނީ ކޮމިޓީއަށް އަންގަވައިފަ އެވެ. އަދި މިއަދުގެ ކޮމިޓީއަށް ބޭނުންވާ މައުލޫމާތު ލިޔުމުން ހުށަހަޅާފައިވާ ކަމަށް ވެސް ކޮމިޓީގެ މުގައްރިރު ގާސިމް އިބްރާހިމް ބައްދަލުވުން ފެއްޓެވި އިރު ވަނީ ވިދާޅުވެފަ އެވެ.

ކޮމިޓީގައި މައުލޫމާތު ހިއްސާކުރުމަށް ފިނޭންސް މިނިސްޓަރު ޝަފީގު ކުރިން އެދިވަޑައިގެންފައި އޮތީ ސިއްރުކޮށްގެންނެވެ. އެހެންވެ، މިނިސްޓަރު ފޮނުވާފައިވާ ލިޔުންތައް ކޮމިޓީގައި މަޝްވަރާކުރުމައްޓަކައި ސިއްރު ބައްދަލުވުމެއް ބޭއްވުމަށް ކޮމިޓީގައި ވޯޓުގައި ނެގި އެވެ. އެ ވޯޓުގައި ބައިވެރިވި މެންބަރުންގެ އަގުލަބިއްޔަތުން ވަނީ ކޮމިޓީ ސިއްރު ކުރަން ނިންމައިފަ އެވެ.

މި ބައްދަލުވުމަކީ އީދު ބަންދުގެ ކުރިން ބޭއްވި މާލިއްޔަތު ކޮމިޓީގައި މަޖިލީހުގެ ނައިބު ރައީސް އަހުމަދު ނާޒިމްގެ އިސްނެންގެވުމުގެ މަތިން ރާއްޖޭގެ އިގްތިސާދީ ހާލަތު ދެނެގަތުމަށްޓަކައި ބޭއްވި ބައްދަލުވުމެކެވެ.

އެ ދުވަހު ބޭއްވި ކޮމިޓީ ބައްދަލުވުމުގައި އޭނާ ވަނީ ރާއްޖޭގެ މިވަގުތުގެ މާލީ ހާލަތާ ގުޅޭ "ހިތި ބޭސް ސިޓީއެއް އޮތިއްޔާ" އެ ކަން ނުފޮރުވައި، ރައްޔިތުންގެ މަޖިލީހަށާއި ރައްޔިތުންނަށް ހާމަކޮށްދިނުމަށް ސަރުކާރުގައި އެދިވަޑައިގެންފަ އެވެ.

އަންނަ އަހަރުގެ ބަޖެޓު ފާސްކުރަން ނޮވެމްބަރު މަހާ ހަމައަށް މަޑުނުކޮށް، މިހާރުން މިހާރަށް ރާއްޖޭގެ އިގުތިސާދީ އަދި މާލީ ހާލަތު ތެދުބަހުން ކިޔައިދޭން ނާޒިމް ވަނީ ފިނޭންސް މިނިސްޓްރީއަށް އިލްތިމާސް ކުރައްވައިފަ އެވެ.