ޔޫކްރޭން ރޮއްވާލުމަށް ފަހު، ރޮމޭނިއާ އާއި ބެލްޖިއަމް އަދި ސްލޮވޭކިއާ އިން އުފާފާޅު ކުރަނީ

ފްރެންކްފާޓް (ޖޫން 26) - ގުރޫޕް އީ ގެ ހަތަރު ޓީމުގެ މެދުގައި ޕޮއިންޓްތައް ބަހާލައި، ޔޫކްރޭން ފުލަށް ދުއްވާލުމަށް ފަހު ރޮމޭނިއާ އާއި ބެލްޖިއަމް އަދި ސްލޮވޭކިއާއިން ވެސް ދެވަނަ ބުރުން ޖާގަ ކަށަވަރު ކޮށްފި އެވެ.

ގުރޫޕްގެ ކޮންމެ ޓީމަކަށް ވެސް ހަތަރު ޕޮއިންޓް ލިބުނެވެ. އެކަމަކު އޭގެ ހިތްހަމަޖެހުން ނުލިބުނު ހަމަ ޓީމަކީ ޔޫކްރޭން އެވެ. ރޮމޭނިއާއިން ގުރޫޕްގެ އެއްވަނ ހޯދީ އެ ޓީމުން ޖެހި ގޯލްގެ އަދަދު އިތުރުވުމުންނެވެ. ފައިދާ ގޯލަށް ބެލި އިރު ބެލްޖިއަމް އަށް ވެސް އަދި ރޮމޭނިއާ އަށް ވެސް އޮތީ ފައިދާ އެއް ގޯލެވެ. ޖެހި ލަނޑުގެ އަދަދުން ރޮމޭނިއާ އަށް ކުރި ލިބެ އެވެ.

މިރޭ، ސްލޮވޭކިއާ އަތުން 1-1 ން އެއްވަރު ކުރި ލަނޑާ އެކު، ރޮމޭނިއާއިން ވަނީ ހަތަރި ލަނޑު ޖަހައިފަ އެވެ. ބެލްޖިއަމް އަށް ޖެހުނީ ދެ ލަނޑެވެ.

ސްލޮވޭކިއާ ދެވަނަ ބުރުން ޖާގަ ހޯދީ ތިންވަނަ ހޯދި ޓީމުތަކުގެ ތެރެއިން، އެންމެ ރަނގަޅު ނަތީޖާ ހޯދި ލިސްޓުން ޖާގަ ލިބުމުންނެވެ. އެ ޓީމަށް ޔޫކްރޭނަށް ވުރެ މައްޗަށް ގުރޫޕްގެ ތާވަލުގައި ކުރި ލިބުނީ ފައިދާ ގޯލެއް އަދި ގެއްލުން ގޯލެއް ވެސް ނެތުމުންނެވެ. ޔޫކްރޭނަށް ގެއްލުން ދެ ގޯލް އެބައޮތެވެ.

މިރޭ ލަނޑުތައް ފެނުނު މެޗުގައި، ފުރަތަމަ ލީޑް ނެގީ ސްލޮވޭކިއާއިންނެވެ. އެ ޓީމުގެ ލަނޑު 24 ވަނަ މިނެޓްގައި ޖެހީ އަންޑްރޭ ޑޫޑާ އެވެ. އެކަމަކު އޭގެ 10 މިނެޓް ފަހު، ވީއޭއާރްގެ ލޮލުން ބަލައިގެން ލިބުނު ޕެނަލްޓީއެއްގައި ރޮމޭނިއަށް ނަތީޖާ ހަމަހަމަ ކޮށް ދިނީ ރަޒްވާން މާރިން އެވެ.