މިއަހަރުގެ ޒުވާނުންގެ އެވޯޑް ވެސް ފަސްކޮށްފި

ޔޫތު މިނިސްޓްރީން ބާއްވާ ޒުވާނުންގެ އެވޯޑް ހަފްލާ ވެސް ފަސްކޮށްފި އެވެ.

ކޮންމެ އަހަރަކު ދެމުން އަންނަ ޒުވާނުންގެ އެވޯޑް ހަފްލާ ބާއްވަން ކުރިން ހަމަޖައްސާފައި އޮތީ އަންނަ މަހު 12 ވަނަ ދުވަހު އެވެ. ނަމަވެސް މިއަދު އެ މިނިސްޓްރީން ކުރި އިއުލާނުގައި ބުނީ ހަފްލާ ބޭއްވުން ފަސްކޮށްފައިވާ ކަމަށާއި އަދި އެ ހަފްލާ ބާއްވާނެ ތާރީހެއް ފަހުން އިއުލާން ކުރާނެ ކަމަށެވެ.

ހަފުލާ ފަސް ކުރަން ނިންމި ސަބަބެއް ޔޫތު މިނިސްޓްރީއަކުން ނުބުނެ އެވެ. ބެލެވޭ ގޮތުގައި އެ ހަފްލާ ފަސް ކުރީ ހަރަދުކުޑަކުރުމުގެ ފިޔަވަޅުތައް އެޅުމުގެ ގޮތުންނެވެ.

މިއީ ސަރުކާރުން ބާއްވާ އެވޯޑް ހަފުލާތަކުގެ ތެރެއިން ފަސް ކުރި ދެވަނަ އެވޯޑެވެ. ސްޕޯޓްސް މިނިސްޓްރީން ބާއްވާ ސްޕޯޓްސް އެވޯޑް ވެސް ދައުލަތުގެ ހަރަދު ކުޑަކުރުމުގެ ފިޔަވަޅެއްގެ ގޮތުން ވަނީ ފަސްކޮށްފަ އެވެ. ސްޕޯޓްސް މިނިސްޓްރީން ކުރިން ރާވާފައި އޮތީ، އެވޯޑް ހަފުލާ މިރޭ ބޭއްވުމަށެވެ.

މި ހަފުތާގައި އެ މިނިސްޓްރީން ބުނީ އެވޯޑް ފަސް ކުރަން ނިންމީ ހަރަދު ކުޑަކުރުމަށް ސަރުކާރުން ނިންމާފައިވުމުން ކަމަށެވެ. އަދި މިއަހަރު ފަހުކޮޅު އެވޯޑް ހަފުލާ ބާއްވާނެ ކަމަށް އެ މިނިސްޓްރީން ބުންޏެވެ. އެކަމަކު ވަކި ތާރީހެއް އިއުލާނެއް ނުކުރެ އެވެ.

ދައުލަތުގެ ހަރަދުތައް ކުޑަ ކުރުމަށްޓަކައި ހާއްސަ ފިޔަވަޅުތަކެއް ސަރުކާރުން ގެންދަނީ އަޅަމުންނެވެ. އެގޮތުން ކޮންމެހެން ބާއްވަންޖެހޭ ހަފްލާތައް ނޫނީ ނުބޭއްވުމަށާއި ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރަން ވެސް އޮތީ އަންގައިފަ އެވެ.

ސިޔާސީ މަގާމުތައް މަދުކުރަން ވެސް ރައީސް ޑރ. މުހައްމަދު މުއިއްޒު ވަނީ ނިންމަވައިފަ އެވެ.