ނޫސްވެރިކަމުގެ އެވޯޑު ޖަލްސާ ބުދަ ދުވަހުގެ ރެއަށް ފަސްކޮށްފި

ނޫސްވެރިކަމަށް މިދިޔަ އަހަރު ނޫސްވެރިން ކޮށްދިން މަސައްކަތުގެ އަގު ވަޒަން ކުރުމަށް މޯލްޑިވްސް މީޑިއާ ކައުންސިލް (އެމްއެންސީ) އިން ދޭ ނޫސްވެރިކަމުގެ އިނާމު ހަފުލާ އަންނަ ހަފުތާގެ ބުދަ ދުވަހުގެ ރެ އަށް ފަސްކޮށްފި އެވެ.

މީގެ ކުރިން އެ ރަސްމިއްޔާތު ބާއްވަން ނިންމާފައި ވަނީ ހުޅުމާލޭގައި ހުންނަ އުމަރު ޒާހިރު އޮފީސް އިމާރާތުގެ މަލްޓި ޕާޕަސް ހޯލްގައި އަންނަ ހޯމަ ދުވަހުގެ ރޭގަ އެވެ.

ލަސްކުރި ސަބަބު ހާމަ ނުކުރި ނަމަވެސް އެ ކައުންސިލުން ބުނީ އެވޯޑު ބާއްވާ ދުވަސް ބަދަލު ކޮށްފައިވާ ކަމަށެވެ.

އެމްއެމްސީން ބުނެފައި ވަނީ ނޫސްވެރިން ކުރާ މަސައްކަތް ބަލައިގަނެ ކުރިއަށް ދިއުމަށް ހިތްވަރު ދިނުމުގެ މަގުސަދުގައި ދެމުން އަންނަ އެ އެވޯޑަށް މި ފަހަރު 18 ކެޓަގަރީއަކަށް 88 ހުށަހެޅުން ލިބިފައިވާ ކަމަށެވެ.

ނޫސްވެރިކަމުގެ އިނާމު ދޭން ފެށީ 2013 ވަނަ އަހަރު އެވެ. މިއީ އެ އެވޯޑު ދޭ 11 ވަނަ ފަހަރެވެ.