ހިންދޫންގެ އެއްވުމެއްގައި އެތެއް ރުޅިގަދަވެ ދުވަން ފެށުމުން ބަޔަކަށް އަނިޔާވެއްޖެ

ސްރީ ލަންކާގައި ހިންދޫންގެ ބަޔަކު ބޭއްވި އެއްވުމެއްގައި އެތްތައް ޒީނަތްތެރިކޮށް ހިންގުވާފައި ދަނިކޮށް އެތެއް ރުޅިގަދަވެ ދުވަން ފެށުމުން އުފެދުނު ހާސްކަމުގެ ތެރޭގައި އެތައް ބަޔަކަށް ހޮނިހިރު ދުވަހު އަނިޔާވެއްޖެ އެވެ.

އާންމުވެފައިވާ ވީޑިއޯ ފުޓޭޖުތަކުން ފެންނަ ގޮތުގައި ރުޅިގަދަވެ ދުވަމުން ދިޔަ އެތް ހުއްޓުވަން އެކި ގޮތްގޮތުން މަސައްކަތްކޮށް ކާމިޔާބު ނުވެގެން އެކަކު އެތުގެ ނަގުލުގައި ހިފައިގެން ވެސް އުޅެ އެވެ. އަދި އެންމެން ސަލާމަތްވާން ގޮވަމުން ދިޔަ އެވެ.

ވެރިރަށް ކޮލަމްބޯގެ ދެކުނުން 280 ކިލޯމީޓަރު (175 މޭލު) ދުރުގައި އޮންނަ ކަޓަރަގަމާގައި ހިނގި މި ހާދިސާގައި 13 މީހަކަށް ހޮސްޕިޓަލުގައި ފަރުވާން ދޭން ޖެހުނު ކަމަށް ފުލުހުންގެ މީޑިއާ އޮފިޝަލް ވިދާޅުވި އެވެ. ހޮސްޕިޓަލުން ބުނީ މީހުންނަށް މާބޮޑު އަނިޔާއެއް ނުވާ ކަމަށާއި އެންމެން މިހާރު ދޫކޮށްލާފައިވާ ކަމަށެވެ.

ލަންކާގައި މާތްކޮށް ހިތާ ޖަނަވާރެއް ކަމަށްވާ އެތް ދީނީ ކަންކަމުގައި ބޭނުންކުރާ ގޮތުގެ ސަބަބުން، ޖަނަވާރުންގެ ހައްގުތަކަށް މަސައްކަތްކުރާ މީހުން ނުރުހުން ފާޅުކުރެ އެވެ. ދީނީ އެއްވުންތަކުގައި ބާރަށް ލަވަ ޖެހުމާއި ހަވާ އެރުވުން ފަދަ ކަންކަން ކުރުމުން އެތް ބިރުގަނެ ސަލާމަތްވާން އުޅުމުގެ ތެރޭގައި ނުރައްކާތެރި އެކި ހާދިސާތައް ހިނގަ އެވެ.

ރަސްމީ ރެކޯޑްތަކުން ދައްކާ ގޮތުގައި ލަންކާގައި ގާތްގަނޑަކަށް 200 ވަރަކަށް އެތް އޮޅުކޮށްގެން ގެންގުޅެ އެވެ. އަދި ޖަންގަލީގައި ގާތްގަނޑަކަށް 7،500 ވަރަކަށް އެތް އުޅޭ ކަމަށް އަންދާޒާކުރެވެ އެވެ.

ޖަންގަލީގައި އުޅޭ އެތް ހިފުން ސަރުކާރުން މަނާކޮށްފައި އޮތަސް ވިހައިގެން އުޅޭ ބޮޑެތި އެތް މަރާލައި އޭގެ ދަރިން ވަރަށް ނަގައިގެން ގެންގޮސް އޮޅުކުރުމުގެ މައްސަލަތައް ހިނގަ އެވެ. -- އޭއެފްޕީ