މަޖިލީހުގެ ރައީސްގެ ގެކޮޅުގެ ޗީފް އޮފް ސްޓާފްގެ މަގާމަށް އާދަމް ހަލީމް

ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު މުރައިދޫގެ ޗީފް އޮފް ސްޓާފްގެ މަގާމަށް ތަޖުރިބާކާރު ނޫސްވެރިޔާ އާދަމް ހަލީމް (މުންޑޫ) ހަމަޖައްސައިފި އެވެ.

މަޖިލީހުގެ ކޮމިއުނިކޭޝަން ޑިރެކްޓަރު ހަސަން ޒިޔާއު މިއަދު ވިދާޅުވީ، ރައްޔިތުންގެ މަޖިލީހުގެ ރައީސަށް ލިބިވަޑައިގަންނަވާ ބާރުގެ ދަށުން މުރައިދޫގޭ ޗީފް އޮފް ސްޓާފްގެ މަގާމަށް އާދަމް ހަލީމް އައްޔަން ކުރެއްވީ ކަމަށެވެ. އޭނާ އެ މަގާމަށް އައްޔަން ކުރެއްވީ މިދިޔަ މަހުގެ 28 ވަނަ ދުވަހު އެވެ.

އަބްދުއްރަހީމް ނިސްބަތްވާ ލ. އަތޮޅުގެ މުންޑު އަށް އުފަން އާދަމް ހަލީމަކީ ނޫސްވެރިއެއްގެ ގޮތުގައި 20 އަހަރަށް ވުރެ ގިނަ ދުވަހު މަސައްކަތް ކުރައްވާފައިވާ ބޭފުޅެކެވެ. "އާފަތިސް" ނޫހުން ނޫސްވެރިކަން ފެއްޓެވި އާދަމް ހަލީމް ވަނީ "ހަވީރު"ގައި ވެސް ނޫސްވެރިއެއްގެ ގޮތުގައި މަސައްކަތް ކުރައްވައިފަ އެވެ.

"ސަން" އާއި "ވީނިއުސް" އަދި "އަވަސް" ގައި އެޑިޓަރެއްގެ ގޮތުގައި ވެސް އާދަމް ހަލީމް މަސައްކަތް ކުރެއްވި އެވެ. މި ފަހުން އޭނާ ވަނީ "ދަ މިރަ"ގެ ނަމުގައި އަމިއްލަ ނޫހެއް އުފައްދައިފަ އެވެ.

އާދަމް ހަލީމަކީ ނޫސްވެރިކަމުގެ ދާއިރާއިން އާންމު ހިދުމަތުގެ އިނާމާއި ރަން ގަލަން ހާސިލް ކުރައްވާފައިވާ ބޭފުޅެކެވެ.

މަޖިލިހުގެ ރައީސަށް ދައުލަތުން ހާއްސަ ކޮށްފައިވާ ގެކޮޅު މުރައިދޫގެ އަށް، މަޖިލިހުގެ މިހާރުގެ ރައީސް އަބްދުއްރަހީމް އަބްދުﷲ ބަދަލުވެވަޑައިގަތީ މިދިޔަ ޖުލައި 26ގަ އެވެ. މުރައިދޫގެއަށް އަބްދުއްރަހީމް ބަދަލުވެވަޑައިގަތުމަށް އެ އިމާރާތް މަރާމާތު ކުރި އެވެ.

މުރައިދޫގެއަކީ މެއި 6، 2021 ގައި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއަށް ފަހު، ސަލާމަތީ ގޮތުން ބަލަން ޖެހޭ ކަންކަމާ ގުޅިގެން މަޖިލީހުގެ ރައީސުން ދިރިއުޅުއްވުމަށް ދައުލަތުން ހާއްސަ ކުރި ގެކޮޅެކެވެ.

ބޮމުގެ ހަމަލާއަށް ފަހު ނަޝީދު މުރައިދޫގޭގައި ދިރިއުޅުއްވި ނަމަވެސް ނަޝީދަށް ފަހު، މަޖިލީހުގެ ރައީސްގެ މަގާމު އެންމެ ފަހުން އަދާ ކުރެއްވި ހިތަދޫ އުތުރު ދާއިރާގެ އެމްޑީޕީގެ މެންބަރު މުހައްމަދު އަސްލަމް އެ ގެކޮޅުގައި ދިރިނޫޅުއްވަ އެވެ.