މުރައިދޫގޭ މުވައްޒަފުންގެ އަދަދާ ގުޅޭ 241 ކޮމިޓީ ސިއްރުކޮށްފި

ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު، މ. މުރައިދޫގެގެ މުވައްޒަފުންގެ މައުލޫމާތު ހާމަކުރުމަށް ހުށަހެޅި އާރުޓީއައި އާ ގުޅޭ މައްސަލައިގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) މިއަދު ސިއްރުކޮށްފި އެވެ.

މަޖިލީހުގެ ރައީސް، އަބްދުއްރަހީމް އަބްދުﷲ މުރައިދޫ ގެކޮޅަށް މިދިޔަ ޖުލައި މަހު ބަދަލުވެވަޑައިގަތީ އެ ތަން މަރާމާތުކޮށް ނިމުމުންނެވެ. އެހެންވެ، ރަސްމީ ގެކޮޅުގެ މަރާމާތަށް ކުރި ހަރަދުތަކާއި އެ ތަނުގައި މަސައްކަތްކުރާ މުވައްޒަފުންގެ އަދަދާއި އެ މީހުންގެ މުސާރައިގެ ތަފްސީލު ހޯދަން "މިހާރު"ން އެދުނީ މިދިޔަ ޖުލައި 28 ގަ އެވެ.

އާރުޓީއާއިގެ މުއްދަތު އިތުރުކުރުމަށް ފަހު، މުވައްޒަފުންގެ އަދަދާ ގުޅޭ ގޮތުން މަޖިލީހުގެ އިދާރާއިން އޭރު ދިން ޖަވާބުގައި ބުނީ ޖިލީހުގެ އިމްތިޔާޒުތަކާއި ބާރުތަކުގެ ގާނޫނުގެ ދަށުން މަޖިލީހުގެ ރައީސަކީ ހިމާޔަތާއި ރައްކާތެރިކަން ލިބިވަޑައިގެންފައިވާ ބޭފުޅަކަށް ވާތީ، މުވައްޒަފުންގެ އަދަދު ހާމަކުރުމާ މެދު ގޮތް ނިންމާނީ 241 ކޮމިޓީން ކަމަށެވެ.

މި މައްސަލަ ދިރާސާކުރުމަށް 241 ކޮމިޓީން މިއަދު ބޭއްވި ބައްދަލުވުމުގައި އެ ކޮމިޓީގެ މުގައްރިރު އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވީ، މި މައްސަލާގެ މުއްދަތު ހަމަވެ، އިތުރަށް 15 ދުވަސް ހޯދައިގެން ވެސް ޖަވާބު ނުދެވި އޮތީ މަޖިލިސް ޗުއްޓީގައި އޮތުމުން ކަމަށެވެ.

ކޮމިޓީ ސިއްރުކުރުމާ މެދު ގޮތެއް ނިންމަން ހުޅުވާލުމުން، ސިއްރު ކުރަން ހުށަހެޅުއްވީ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު އެވެ. އޭނާގެ ހުށަހެޅުމަށް މާމިގިލި ދާއިރާގެ މެންބަރު ގާސިމް އިބްރާހިމް ތާއީދު ކުރެއްވުމާ އެކު، ކޮމިޓީން ވަނީ ބައްދަލުވުން ސިއްރު ކުރަން ފާސްކޮށްފަ އެވެ.

މުރައިދޫގޭގެ އެންމެ އިސް ވެރިޔަކީ ތަޖުރިބާކާރު ނޫސްވެރިޔާ މުންޑޫ އާދަމް ހަލީމެވެ. އޭނާ އަށް ދީފައިވަނީ ޗީފް އޮފް ސްޓާފްގެ މަގާމެވެ. އެއީ އެ ގެކޮޅުގެ އެންމެ އިސް މަގާމެވެ.

ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގް (ދަގަނޑޭ) ވެސް ވަނީ އެ ގެކޮޅުގެ ޑިރެކްޓަ ޖެނެރަލަކަށް އައްޔަން ކުރައްވައިފަ އެވެ.

މަޖިލިސް ރައީސްގެ ގެކޮޅަށް އިތުރަށް އައްޔަން ކުރެއްވީ ކިތައް ބޭފުޅުން ކަމެއް އަދި އެ ބޭފުޅުންގެ މުސާރައަށް ހޭދަވާ ވަރެއް ވެސް މިހާތަނަށް ހާމަކޮށްފައެއް ނުވެ އެވެ.

މުރައިދޫގެއަކީ މެއި 6، 2021 ގައި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއަށް ފަހު ސަލާމަތީ ގޮތުން ބަލަން ޖެހޭ ކަންކަމާ ގުޅިގެން މަޖިލީހުގެ ރައީސުން ދިރިއުޅުއްވުމަށް ދައުލަތުން ހާއްސަ ކުރި ގެކޮޅެކެވެ.

އަބްދުއްރަހީމް ގެކޮޅަށް ވަޑައިގަތުމުގެ ކުރިން އެ ގެ މަރާމާތު ކުރުމުގެ މަސައްކަތް ކޮށްފައިވަނީ ވެމްކޯ އިންނެވެ. ނަމަވެސް އެކަމަށް ހަރަދުކުރީ ކޮން ބައެއް ކަމެއް އަދި ކިހާ ވަރެއް ކަމެއް އެއްވެސް ފަރާތަކުން ހާމައެއް ނުކުރެ އެވެ.