މަޖިލީހުގެ ރައީސްގެ ގެކޮޅުގެ މުވައްޒަފުންގެ މައުލޫމާތު ސިއްރުކުރަން 241 ކޮމިޓީން ފާސްކޮށްފި

ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު މ. މުރައިދޫގެގެ މުވައްޒަފުންގެ މައުލޫމާތު ސިއްރުކުރަން ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން މިއަދު ފާސްކޮށްފި އެވެ.

މަޖިލީހުގެ ރައީސް އަބްދުއްރަހީމް އަބްދުﷲ މުރައިދޫ ގެކޮޅަށް މިދިޔަ ޖުލައި މަހު ބަދަލުވެވަޑައިގަތީ އެ ތަން މަރާމާތުކޮށް ނިމުމުންނެވެ. އެހެންވެ، ރަސްމީ ގެކޮޅުގެ މަރާމާތަށް ކުރި ހަރަދުތަކާއި އެ ތަނުގައި މަސައްކަތްކުރާ މުވައްޒަފުންގެ އަދަދާއި އެ މީހުންގެ މުސާރައިގެ ތަފުސީލު ހޯދަން "މިހާރު" އިން އެދުނީ މިދިޔަ ޖުލައި 28 ގަ އެވެ.

އާރުޓީއައިގެ މުއްދަތު އިތުރުކުރުމަށް ފަހު، މުވައްޒަފުންގެ އަދަދާ ގުޅޭ ގޮތުން މަޖިލީހުގެ އިދާރާ އިން އޭރު ދިން ޖަވާބުގައި ބުނީ، މަޖިލިހުގެ އިމްތިޔާޒުތަކާއި ބާރުތަކުގެ ގާނޫނުގެ ދަށުން މަޖިލީހުގެ ރައީސަކީ ހިމާޔަތާއި ރައްކާތެރިކަން ލިބިވަޑައިގެންފައިވާ ބޭފުޅަކަށް ވާތީ، މުވައްޒަފުންގެ އަދަދު ހާމަކުރުމާ މެދު ގޮތް ނިންމާނީ 241 ކޮމިޓީން ކަމަށެވެ.

އެ މައްސަލާގައި އެ ކޮމިޓީން މިއަދު ސިއްރުން ބޭއްވި ބައްދަލުވުމުގައި މި މައުލޫމާތު ހާމަނުކުރުމަށް ނިންމާފައިވާ ކަން "މިހާރު" އަށް ވަނީ ކަށަވަރުވެފަ އެވެ.

އެނގިފައިވާ ގޮތުގައި އެ ކޮމިޓީގެ ބައްދަލުވުމުގައި މާފަންނު އުތުރު ދާއިރާގެ އެމްއެންޕީގެ މެމްބަރު މުހައްމަދު ނާޒިމް ހުށަހަޅުއްވައި މާމިގިލީ ދާއިރާގެ މެމްބަރު ގާސިމް އިބްރާހިމް ތާއީދު ކުރެއްވީ މުވައްޒަފުންގެ ނަމާއި ވަނަވަރު ފިޔަވައި އެހެނިހެން މައުލޫމާތު ހާމަކުރުމަށެވެ. ނަމަވެސް އެ ހުށަހެޅުން ފާހެއް ނުވި އެވެ.

ނަމަވެސް، ސަރުކާރު ހިންގާ ޕާޓީ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ހުށަހެޅުވީ މުރައިދޫގެ ހުރިހާ މުވައްޒަފުންގެ މައުލޫމާތުތައް ސިއްރު ކުރާށެވެ. އެ ހުށަހެޅުމަށް ތާއީދު ކުރެއްވީ ކާށިދޫ ދާއިރާގެ މެންބަރު މުންތަޒިމް އިބްރާހީމެވެ.

ފަލާހުގެ ހުށަހެޅުން ފާސްކުރީ ވޯޓުގައި ބައިވެރިވެވަޑައިގެންނެވި ފަސް މެންބަރުންގެ ތެރެއިން ހަތަރު މެންބަރުންގެ ވޯޓުންނެވެ.

ކޮމިޓީގެ މިއަދުގެ ބައްދަލުވުން ސިއްރުކުރުމުގެ ކުރިން އެ ކޮމިޓީގެ މުގައްރިރު އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވީ، މި މައްސަލާގެ މުއްދަތު ހަމަވެ، އިތުރަށް 15 ދުވަސް ހޯދައިގެން ވެސް ޖަވާބު ނުދެވި އޮތީ މަޖިލިސް ޗުއްޓީގައި އޮތުމުން ކަމަށެވެ.

މުރައިދޫގޭގެ އެންމެ އިސް ވެރިޔަކީ ތަޖުރިބާކާރު ނޫސްވެރިޔާ މުންޑޫ އާދަމް ހަލީމެވެ. އޭނާ އަށް ދީފައިވަނީ ޗީފް އޮފް ސްޓާފްގެ މަގާމެވެ. އެއީ އެ ގެކޮޅުގެ އެންމެ އިސް މަގާމެވެ. ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގް (ދަގަނޑޭ) ވެސް ވަނީ އެ ގެކޮޅުގެ ޑިރެކްޓަ ޖެނެރަލަކަށް އައްޔަން ކުރައްވައިފަ އެވެ.

މަޖިލިހުގެ ރައީސްގެ ގެކޮޅަށް އިތުރަށް އައްޔަން ކުރެއްވީ ކިތައް ބޭފުޅުން ކަމެއް އަދި އެ ބޭފުޅުންގެ މުސާރަ އަށް ހޭދަވާ އަދަދެއް ވެސް ހާމަކޮށްފައެއް ނުވެ އެވެ. މި މައުލޫމާތު ސިއްރު ކުރަން ނިންމީ ކޮން ސަބަބެއް ސާފެއް ނުވެ އެވެ.

މުރައިދޫގެއަކީ މެއި 6، 2021 ގައި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއަށް ފަހު، ސަލާމަތީ ގޮތުން ބަލަން ޖެހޭ ކަންކަމާ ގުޅިގެން މަޖިލީހުގެ ރައީސުން ދިރިއުޅުއްވުމަށް ދައުލަތުން ހާއްސަކުރި ގެކޮޅެކެވެ.