އާރަށް މައްސަލާގައި ޔާމީންގެ ޝަރީއަތް ލައިވްކުރަން ނިންމައިފި

ވ. އާރަށް މައްސަލާގައި ކުރީގެ ރައީސް އަބްދުﷲ ޔާމީންގެ މައްޗަށް ކުރާ ދައުވާގެ ޝަރީއަތް އަލުން ހިންގާއިރު އެ މައްސަލަ ލައިވްކޮށް ދައްކަން އެމަނިކުފާނުގެ ފަރާތްޕުޅުން އެދިވަޑައިގަތުމުން އެ ޝަރީއަތް ލައިވްކުރަން ކްރިމިނަލް ކޯޓުން ނިންމައިފި އެވެ.

އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތާއި މަނީ ލޯންޑްރިންގެ ކުށުގައި ޔާމީން 11 އަހަރަށް ޖަލަށްލާން ކްރިމިނަލް ކޯޓުން ކުރި ހުކުމް ބާތިލްކޮށް، އެ މައްސަލަ އަލުން ބަލަން ހައި ކޯޓުން އޮތީ އަންގައިފަ އެވެ.

އެ މައްސަލާގެ ޝަރީއަތް އަލުން ފެށުމަށް ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ޔާމީންގެ ވަކީލުންގެ ޓީމުން ބުނީ އެ މައްސަލާގެ ޝަރީއަތް ކުރިން ވެސް ލައިވްކޮށް ދެއްކި ކަމަށާއި އެހެންވެ، މިފަހަރު ވެސް ޝަރީއަތް ލައިވްކުރަން އެދޭ ކަމަށެވެ.

އެހެންވެ، ދެން އޮންނަ އަޑުއެހުމުން ފެށިގެން ޝަރީއަތް ލައިވްކުރަން އެ މައްސަލަ ބައްލަވާ ގާޒީ އަލީ ނަދީމް ނިންމެވި އެވެ.

އެ މައްސަލާގައި މިއަދު ކުރިއަށް ގެންދިޔައީ އެ މައްސަލަ ދެން ކުރިއަށް ގެންދާނެ ގޮތް ކަނޑައެޅުމަށެވެ.

އެ މައްސަލަ އަލުން ބަލަން ހައި ކޯޓުން އެންގި އެންގުމުގައި، ޝަރީއަތުގެ ކުރީގެ ހުށަހެޅުންތަކަށް އަލުން ފުރުސަތު ދިނުމަށާއި ޔާމީނާ ދެކޮޅަށް ފަހުން ދައުލަތުން ހުށަހެޅި އާ ހެކިތައް ބަލައިނުގަތުމަށް އެ ކޯޓުން އަންގާފައިވެ އެވެ. ނަމަވެސް އޭގެ ތެރެއިން އާ ހެކި ބަލައިނުގަތުމަށް ނިންމި ނިންމުން ދައުލަތުން މިހާރު އޮތީ ސުޕްރީމް ކޯޓުގައި އިސްތިއުނާފްކޮށްފަ އެވެ. އެހެންވެ، ދައުލަތުން ބުނީ ސުޕްރީމް ކޯޓުން މައްސަލަ ނިމޭ ގޮތަކުން ހެކިތަކާ ގުޅޭ ބަޔަށް ބަދަލެއް އަތުވެދާނެ ކަމަށެވެ.

ނަމަވެސް ދެން ހުރި ބައިތައް މިވަގުތު ކުރިއަށް ގެންދިއުމަށް ދައުލަތުން ދެކޮޅެއް ނަހަދަ އެވެ. ޔާމީންގެ ވަކީލުން ވެސް ބުނީ އެގޮތަށެވެ. އެހެންވެ، ގާޒީ ނިންމެވީ ޝަރީއަތުގެ ކުރީގެ ހުށަހެޅުންތަކުގެ ބައި ކުރިއަށް ގެންދިއުމަށެވެ.

އެހެންކަމުން ޝަރީއަތުގެ ކުރީގެ ހުށަހެޅުންތަކަށް ދެ ފަރާތުން ވެސް އަންނަ ބުރާސްފަތި ދުވަހާ ހަމައަށް ޖަވާބު ހުށަހަޅަން ގާޒީ ފުރުސަތު ދެއްވި އެވެ.

އެ މައްސަލާގެ ދެން އޮންނަ އަޑުއެހުމެއް އަންނަ މަހު ބާއްވާނެ ކަމަށް ގާޒީ ނަދީމް ވިދާޅުވި އެވެ.

އާރަށް މައްސަލާގައި ޔާމީންގެ އިތުރުން ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ވެސް ޖަލު ހުކުމެއް އިއްވި އެވެ. އެ ހުކުމް ވެސް ބާތިލްކޮށް، އެ މައްސަލަ އަލުން ހައި ކޯޓުން އޮތީ އަންގައިފަ އެވެ.

އާރަށް މައްސަލާގެ އިތުރުން ރ. ފުއްގިރި ކުއްޔަށް ދިނުމުގެ މުއާމަލާތުގެ މައްސަލާގައި ވެސް ޔާމީންގެ މައްޗަށް ދައުވާކުރެ އެވެ. އެ މައްސަލަ ކުރިއަށް ގެންދަނީ ވަކިންނެވެ.