ތިނަދޫގެ 200 ފްލެޓަށް ކުރިމަތިލުމުގެ ފުރުސަތު އާދީއްތަ ދުވަހު ހުޅުވާލަނީ

ސަރުކާރުން ގދ. ތިނަދޫގައި އިމާރާތްކުރި 200 ފްލެޓަށް ކުރިމަތިލުމުގެ ފުރުސަތު އަންނަ އާދީއްތަ ދުވަހު ހުޅުވާލަން ނިންމައިފި އެވެ.

ތިނަދޫ ސިޓީ ކައުންސިލުން މިދިޔަ ބުރާސްފަތި ދުވަހު ކުރި އިއުލާނެއްގައި ބުނީ، އެ ރަށަށް ކުރިމަތިވެފައިވާ ބޯހިޔާވަހިކަމުގެ ދަތިކަމުގެ މައްސަލަ އަށް ހައްލު ހޯދައިދިނުމަށް ކައުންސިލާއި ސަރުކާރުން އެކަށައަޅާފައިވާ ސިޔާސަތުގެ ދަށުން، އެ ރަށުގެ ރައްޔިތުންނާއި އެ ރަށަށް ހިޖުރަ ކުރަން ބޭނުންވާ މީހުންނަށް އިމާރާތް ކުރަމުން އަންނަ 200 ފްލެޓް ދޫކުރަން ނިންމާފައިވާ ކަމަށެވެ.

ނަމަވެސް، އެ 200 ފްލެޓް ދޫކުރުމުގެ އުސޫލު އަދި އާންމެއް ނުކުރެ އެވެ.

އެ އިއުލާނުގައި ބުނީ، ފްލެޓަށް ކުރިމަތިލާން ބޭނުންވާ މީހުންނަށް އަންނަ އާދީއްތަ ދުވަހުން ފެށިގެން ޕޯޓަލް މެދުވެރިކޮށް ފޯމު ހުށަހެޅޭނެ ކަމަށެވެ.

ހުވަދު އަތޮޅުގެ އެންމެ އާބާދީ ބޮޑު ރަށް، ތިނަދޫގައި 200 ފްލެޓް އިމާރާތްކުރަން ސްރީ ލަންކާގެ ސިއޭރާ ކޮންސްޓްރަކްޝަނާއި ސްޓާ ކޮންސްޓްރަކްޝަން އެންޑް އިންޖިނިއާސްގެ ޖޮއިންޓް ވެންޗާ (ޖޭވީ)އާ ހަވާލުކުރީ އޮކްޓޯބަރު 2022 ގަ އެވެ. އެއީ 253 މިލިއަން ރުފިޔާގެ މަޝްރޫއެކެވެ.

އެ މަޝްރޫއުގެ ދަށުން އަޅާ ހައުސިން ޔުނިޓެއްގެ ބޮޑުމިނަކީ 700 އަކަފޫޓެވެ. ކޮންމެ ޔުނިޓެއްގައި ސިޓިންރޫމަކާއި ފާހާނާއާ އެކު ތިން ކޮޓަރި އާއި ބަދިގެ އާއި ކާގެ އާއި ލޯންޑްރީ އޭރިއާ އަދި ސްޓޯ ރޫމެއް ވެސް ހުންނާނެ އެވެ.